Ads by Google Ads by Google

Leai ni faalavelave matuia na tula’i mai aso tausaga fou

E leai ni faalavelave matuia po o se soifua na maimau a’o alo atu le atunuu e faafeiloa’i le taunu’u mai o le tausaga fou 2013 i le amataga o le vaiaso nei.

I se talanoaga ma le Sui Komesina o le Matagaluega o Leoleo, na faamaonia mai ai e le tofa Leseiau Laumoli, “E leai ma se faalavelave matuia na tulai mai i le aso o le tausaga fou, o se tausaga fou filemu ma fiafia na alo atu i ai le atunuu, e faafetaia ai le agalelei o le Atua ina ua leai se soifua na maimau poo ni faalavelave matuia na tulai mai i le kerisimasi ma le tausaga fou na te’a nei”.

I le iu manuia ai o aso fiafia o lenei tausaga, na avea ai le tofa Leseiau e fai ma fofoga o le afioga i le Komesina o Leoleo, le tofa Tuaolo M. Fruean e faafetaia ai le atunuu atoa i lo latou lagolagoina lea o le tautua sa faatinoina e alii ma tamaitai leoleo.

Fai mai Leseiau, ana leai le lagolago a le atunuu e le faigofie galuega a leoleo, o le agaga foi lea o le matagaluega o leoleo, ina ia faatumauina pea tulaga lelei ma le saogalemu o le atunuu i le amataina ai o lenei tausaga fou.

Na pau faalavelave na mafai ona tali atu i ai leoleo a’o alo atu le atunuu i aso fiafia na mae’a atu nei, o faalavelave laiti e aafia ai tagata ‘onana ma le faatupu vevesi i nofoaga faitele ma totonu o aiga.

I le faaiuga o le vaiaso na te’a nei, na taofia ai e leoleo i le toese i Tafuna tagata e to’a 18, lea na tutula’i i luma o le Faamasinoga Faaitumalo i le Aso Gafua, ona o tuuaiga i le faatupu vevesi i nofoaga faitele, faapea ai le ave taavale ‘ona.

Mai le to’a 18 na taofia i le toese i le faaiuga o le vaiaso, o le to’atolu o fanau talavou; o le isi to’afitu na taofia mai ona o tuuaiga i le ave taavale ‘ona; ma le to’avalu na taofia ma tuuaia i solitulafono e aofia ai le faatupu vevesi i nofoaga faitele ma le ‘ona.

Ae o fanau talavou na taofia i le faaiuga o le vaiaso, e toatasi le alii na tuuaia i le faatupu vevesi i nofoaga faitele, ae o le isi toalua o ni tamaitai sa tuuaia i le taua’i misa, ma ua toe tatala uma i tua i latou i lalo o le vaavaaiga a latou matua, e faatali ai le aso lea ua faatulaga e toe valaau ai a latou mataupu.

O le to’atele o i latou nei na taofia i le faaiuga o le vaiaso, ua toe tatala i tua e faatali ai taimi ma aso ia ua faatulaga e toe fofogaina ai a latou mataupu, ma ua poloaina i latou e le faamasinoga e aua nei o latou toe tagofia le ava malosi, pe latou te toe soliina foi se tulafono a le malo.

Ae mo le aso o le tausaga fou na te’a nei, na taofia ai e leoleo le to’a 15 i le toese i Tafuna, ona o tu’uaiga i solitulafono eseese.

O le to’afa na taofia ona o tuuaiga i le ‘ave taavale ‘ona; o le isi to’a 10 na taofia ona o tuuaiga i le faatupu vevesi i nofoaga faitele atoa ai ma le ‘ona; ma le to’atasi na taofia i le falepuipui o Tamaiti ona o tuuaiga i le inu pia ae le’i atoa le 21 tausaga.

Mai le to’a 10 o lo o tu’uaia i le faatupu vevesi i nofoaga faitele, o lo o aofia ai ma se alii e 23 tausaga mai Faleniu o lo o tuuaia i le faaoolima i le tulaga lua, i le faalavelave lea na ia fasia ai lana uo teine i luma o le Bowling Alley i Tafuna.

Na taua e ni molimau i leoleo e faapea, sa latou vaaia le alii o Ernie Tao o lo o ia fasia lana uo teine i tafatafa o lana taavale, ma mafua ai ona tulioso atu i ai isi alii e toalua ma fasi Ernie, ina ua maea, sa tulioso le au alii ia i le taavale ma sosola ese.

Na taua e le tamaitai na aafia e faapea, o le fua o lana uo tama ia te ia ao la i ai i totonu o le Bowling Alley, na mafua ai ona aumai o ia i fafo ma ta tu’iona foliga ma faaaoga se ma’a e tu’i ai lona ulu ma ta’e ai.

O le taeao ananafi na tulai ai Ernie i luma o le Faamasinoga Faaitumalo, ma ua molia nei o ia i le moliaga o le faaoolima i le tulaga lua.