Ads by Google Ads by Google

Leai ni fa’alavelave na tutupu i le aso malolo na te’a nei

E leai ni fa’alavelave matuia na tutupu i le fa’aiuga o le vaiaso na te’a nei, ao alo atu le atunu’u e fa’amanatu le aso 4 Iulai e ala i tafaoga faapea ai ma fiafiaga i totonu o nu’u ma aiga, e pei ona fa’amaonia mai e le Ta’ita’i Leoleo ia Vaimaga Maiava i le Samoa News i le taeao ananafi.

 

Na pau nai fa’alavelave na tutupu i le aso malolo faapea ai ma le faaiuga o le vaiaso na te’a nei, “o nai fa’alavelave laiti na mafua ai ona pisi leoleo e fa’afilemu tagata ‘onana”, lea na tutula’i i luma o le fa’amasinoga fa’aitumalo i le taeao ananafi mo le fofogaina o a latou mataupu.

 

Saunoa Maiava e fa’apea, e leai se fa’alavelave na a’afia ai se soifua o se tagata, po o se fa’alavelave fo’i na manu’a tigaina ai se isi.

 

E to’a 8 i latou na taofia e leoleo i le fa’aiuga o le vaiaso na te’a nei, ona o tu’uaiga i solitulafono eseese e aofia ai le fa’ao’olima faapea ai ma le fa’atupu vevesi i nofoaga faitele.

 

O i latou na taofia e aofia ai ni ali’i se to’alua e laiti i lalo o le tulafono, to’atasi se tama’ita’i, ma ni ali’i matutua se to’a 5.

 

O le tama’ita’i sa taofia faapagota e leoleo na pu’eina mai i le vaega e paka ai ta’avale a le fale kalapu o le Bowling Alley i le fa’aiuga o le vaiaso na te’a nei, ina ua logo e leoleo po o le Bowling Alley leoleo mo se fesoasoani, i se tama’ita’i o lo o vaovao gata i totonu o le fale kalapu, o lo o ia faia fo’i ni gaioiga e ono lamatia ai le nonofo filemu o tagata o lo o i ai.

 

Na taunu’u leoleo ma latou pu’e fa’apagota ai le tama’ita’i o Monika Brown ma auina atu loa i le ofisa o leoleo i Tafuna mo ni isi o a latou su’esu’ega.

 

E tusa ai fa’amaumauga a le fa’amasinoga, na palauvale Brown i leoleo i le taimi na latou pu’e fa’apagota ai o ia, sa ia tete’e atu fo’i i leoleo ao taumafai e pu’e fa’apagota o ia.

 

Ao aga’i atu le ta’avale a leoleo i Tafuna, sa fai Brown i leoleo o le a pule i lona ola, ma ia taumafai ai e tatala le faitoto’a o le ta’avale a leoleo ae se’i oso i fafo, peita’i sa vave gaioiga a leoleo ma le mafai ai e le ua molia ona tatala le faitoto’a.

 

O le isi fa’alavelave na tula’i mai i Faleniu i le po o le aso Faraile na te’a nei, ina ua tula’i mai se fusuaga i le va o ni tupulaga talavou, ma taofia mai ai e leoleo le ali’i o Tasele Asiata ma tu’uaia i le fa’atupu vevesi i nofoaga faitele.

 

I le afioaga o Pagai, na taofia mai ai e leoleo le ali’i o Orlando Upulasi ma tu’uaia i le fa’atupu vevesi i nofoaga faitele, ina ua maua atu o ia e leoleo o lo o pisapisao ma ‘ona taumafai ni isi o le nuu ma lona aiga e fa’ato’a filemu o ia.

 

O isi ali’i e to’alua na taofia mai e leoleo i le faaiuga o le vaiaso na te’a nei, ona o fa’alavelave na tutupu i totonu o la aiga, ma i’u ina la fa’ao’olima ai i la ta’ito’alua.

 

Na teena uma e i latou na taofia faapagota i le faaiuga o le vaiaso tuuaiga faasaga ia te i latou, ma ua tatala i latou i tua e faatali ai le aso lea ua faatulaga e toe fofogaina ai a latou mataupu i luma o le fa’amasinoga.

 

A o tatala ai i latou i tua, ua poloaina i latou e le fa’amasinoga e aua nei o latou toe tagofia le ava malosi pe latou toe toe fa’atupuina fo’i ni isi gaioiga e ono lepeti ai le nonofo filemu o tagata, ua faasa fo’i ona latou toe solia se isi tulafono, pe latou te taumafai e fa’afeso’ota’i molimau a le malo.