Leai ni fa’alavelave matuia na tutupu i le aso Tausaga Fou

E leai ni faalavelave matuia e ono maimau ai se soifua o se tasi na tulai mai i le aso o le Tausaga Fou na te’a nei, e pei ona faamaonia mai e le sui komesina o le matagaluega o Leoleo i le Samoa News, le tofa Leseiau Laumoli.

 

Na taua e Leseiau e faapea, e tutusa lelei lava le aso o le Kerisimasi na tea atu nei ma le aso foi o le tausaga fou lea ua mavae atu, i le leai lea o ni faalavelave matuia na tutupu mai ai e ono maimau ai se soifua o se tagata, se i vagana ai lava nai faalavelave laiti na mafua mai ona o le ‘ava malosi, peitai e le i tulai mai ai ni manu’a matuia.

 

Na faafetaia e Leseiau le atunuu e tusa ai o le lagolagoina o le tiute fita sa alo atu i ai le matagaluega, i le puipuia lea o le saogalemu o le atunuu atoa, a’o alo atu aiga uma i le faamanatuina o aso fiafia ma aso faaiu o le tausaga tuai e 2013 ua mavae atu.

 

Saunoa Leseiau e faapea, ana leai le lagolago atu a le atunuu, e leai foi se mea e mafai e le matagaluega a leoleo i le faatinoina o latou tiute.

 

O le po anapo le taimi mulimuli o le poloka a le matagaluega o leoleo mo aso fiafia o lenei tausaga, ona mae’a ai loa lea, e pei ona fuafua e faamuta i le itula e 6:00 i le taeao nei.

 

E to’a 16 le aofai o i latou na taofia e leoleo i le aso o le tausaga fou na te’a nei, ma maua ai le avanoa e tutula’i ai i luma o le faamasinoga faaitumalo i le taeao ananafi.

 

O i latou e toa 16 e aofia ai le toa 12 o lo o tuuaia i moliaga e pei o le ‘ona ma le faatupu vevesi i nofoaga faitele, to’alua o lo o tuuaia i moliaga mama o le ave ta’avale ‘ona, ma le isi to’alua o fanau e laiti i lalo o le tulafono, o lo o tuuaia i moliaga mama o le tagofia o le ‘ava malosi ae le i atoa le ta’i 21 tausaga le matutua, e pei ona faatulaga mai e le tulafono.

 

E tasi lava le faalavelave na manu’a ai se tasi na tula’i mai i le aso o le tausaga fou i Vaitogi, lea o lo o taofia ai se alii talavou i le falema’i ona o manu’a i lona ulu.

 

Na taua i se ripoti mai le fa’amasinoga e faapea, e le i mafai e leoleo ona maua i latou sa aafia i lenei faalavelave, ma o lo o faaauau pea suesuega e uiga i le mea sa tupu.

 

Na pau faamatalaga na mafai ona tuuina mai i le Samoa News e uiga i lenei faalavelave, e toatasi se alii talavou na fasi e ni alii se toatele, ma manu’a tigaina ai o ia.

 

O le to’atele o i latou na taofia mai e leoleo i le faaiuga i le aso o le tausaga fou, na toe tatala i tua e le faamasinoga e aunoa ma se tupe sa manaomia e totogi, ae ua tuu atu i ai poloaiga e le faamasinoga e ao ona latou usita’i i ai, sei vagana ai se vaega itiiti ua toe taofia i le toese i Tafuna, seiloga e totogi le vaega tupe ua faatulaga ona faatoa mafai lea ona tatala i latou i tua.

 

O ni isi o i latou nei e le gata o lo o i ai a latou sala e le i maea ona totogi i luma o le faamasinoga, ae o lo o nofovaavaaia foi i latou i lalo o poloaiga a le faamasinoga, peita’i o le ua toe molia ma tuuaia i nisi o solitulafono e aafia ai le ‘ava malosi, ae o ni isi nei o poloaiga sa fautuaina i latou e le faamasinoga e ao ona usita’i i ai, o le aua lea nei toe tago i le ava malosi.

 

O le faaiuga o le masina nei lea ua toe faatulaga e le faamasinoga faaitumalo, e toe valaau ai mataupu a ni isi o i latou nei ma le faamoemoe, e tatau ona o o atu i lea taimi ua maea ona faia ni maliliega i le va o le malo ma i latou nei, ma faamuta ai loa taualumaga o mataupu o lo o tuuaia ai i latou.

 

O ni isi o tuutuuga ua tuuina atu e le faamasinoga ia i latou ma molia e aofia ai le faasa lea ona toe tagofia le ‘ava malosi, faasa ona toe solitulafono, faasa fo’i ona toe taumafai e faafesootai molimau a le malo.

Comment Here