Ads by Google Ads by Google

Leai ni au lakapi mai Niu Sila, Ausetalia ma Fitii

O le fonotaga mulimuli sa faia i le aso ananafi a le Komiti o le Ta’ito’a 7, ma sui o kalapu lakapi uma ia ua faamoemoe e tausinio i le taamilosaga taitoa 7 faavaomalo a le TMO Pago Marist 7’s, i le taeao nei, ua faamaonia mai ai le leai o ni ‘au mai Niu Sila, Ausetalia ma Fiti e auai i lea faamoemoe, se’i vagana ai le ‘au mai i Vava’u i Tonga lea na taunuu mai i le Aso Lua o le vaiaso nei.

E 21 ‘au ua faamautu o le a tauva i le taamilosaga i lenei tausaga, lea e aofia ai ‘au e 10 mai Samoa, o ‘au e 10 a Amerika Samoa nei ma le ‘au e tasi mai Tonga.

E 7 pulu ua vaevaeina i ai le taamilosaga mo le lua aso, ma ua faamoemoe o le ulua’i taaloga i le taeao nei o le a feiloa’i ai le TMO Marist 7’s ma le Tafuna Jets i le itula e 10:00, ma faaauau atu ai lava se ia maea taaloga mulimuli o le aso.

Ua lua tausaga sosoo, o umia pea e le ‘au mai le afioaga o Vailele le siamupini o le taamilosaga lenei, e pei ona la sailia ai ma le ‘au malosi a le Tepatasi i le tausaga na te’a nei, ae o Marist St. Joseph’s i le 2010.

E foliga mai e leai se ‘au o faatamala pe faata’eta’e aluga sana tapenaga ona o le naunau uma e fia avea ma siamupini o lenei tausaga, e ui e tasi lava le ‘au o le a faapaleina i le manumalo, pe a maea le taamilosaga i le afiafi a taeao.

Na taua e le alii faiaoga o le ‘au a Marist St. Joseph’s ia Rodger Warren, o se tasi foi sa taalo muamua i le 15 a le Manu Samoa i tausaga ua mavae, i le Samoa News, “E leai lava se isi autu o lenei faamoemoe, ua na o le manumalo lava, e ui foi o loo o mai tapena uma au mo le faamoemoe, ae o le mea moni lava ua tapena Malisi i soose tulaga o le taaloga”.

Na fa’amaonia mai e Warren le i ai o ni sui o le Manu Samoa, o le a ta’a’alo i lana ‘au, e ui ina e na te le’i fa’ailoa mai po o ai ia sui, atoa ai ma ni isi sa ta’a’alo muamua i le Manu.

O le afiafi ananafi na faatoa taunuu mai ai isi sui o le au mai le afioaga o Vailele, lea o loo latou umia le siamupini o lenei tausaga, ma o nisi o alii iloga a le au taitoa 7 a le Manu Samoa o loo malaga mai ai e aofia ai Mikaele Pesamino, Simaika Mikaele ma Alafoti Faosiliva, ae mo le au a le Tepatasi, o loo malaga mai ai le susuga ia Tom Iosefo le uigi a le Manu Samoa ma le alii o Faalemiga Selesele.

O le faatulagaina la nei o pools mo le taamilosaga i le taeao nei.

Pool A:            TMO Marist Pago, Fagalii ma Tafuna Jets

Pool B:            Vaiala, Taputimu Youth ma Samusu

Pool C:            Vailele, Pago Eagles ma Apia Maroons

Pool D:            Marist St. Joseph’s, Laulii Pago ma Afega

Pool E:            Tepatasi, Utusi’a Knights ma Avele

Pool F:            Vaimoso, Lalomalava ma Lauli’i Lions

Pool G:            Fagatogo Blues, Vava’u Tonga 7s ma Leone White.

O le itula e 9:00 i le taeao a taeao o le a amataina ai loa sailiga siamupini o le Ipu autu ma faasolo atu ai lava i vaega pito i lalo.