Ads by Google Ads by Google

Le totogia pili a le malo, ae pagatia ai tagata lautele

Na fa’aalia e le afioga i le matua ia Togiola Tulafono, i luga o lana polokalama i le fa’ai’uga o le vaiaso na te’a nei e faapea, “Ana faapea ua uma ona totogi pili a le malo o loo i le ASPA, ou te talitonu e faigofie ona matou tula’i atu e faamuta siitaga a le ASPA,”

Na taua e se tootoo na valaau atu i le polokalama, e foliga mai o lo o pule lava le ASPA i taimi e fesuiai ai tau o ana tautua, ae o lenei lava e pagatia le atunuu, ona o lo o tumau pea le maualuga o totogi, ae o lo o alu pea i luga o le tau o le soifuaga.

“Ou te iloa ana faapea e oo mai i le taimi lenei ua sii totogi o tagata, ailoga e toe faitio se isi i nei mea, ae o le faafitauli e le o paleni le avega a tagata,” o le finagalo lea o le tootoo.

Na tu’uaia foi e le kovana ia le Fono Faitulafono, o le isi lea mafuaaga ua le mafai ai e le malo ona totogi ana aitalafu, ina ua le talia pili tupe sa tuuina atu i ai mo le faamoemoe e faatupe ai le totogia o pili a le malo i le ASPA.

O pili tupe sa taua e Togiola, e aofia ai pili e sii ai lafoga mo pisinisi, pili e sii ai totogi o laisene mo pisinisi, ma le pili e faaee ai lafoga i luga o nisi o oloa mai fafo e pei o le pia, ava malosi ma le tapa’a.

Ae na taua e nisi o tagata totogi pili, toe totogi lafoga sa mafai ona fesiligia e le Samoa News, lo latou faafetaia o le finagalo o le fono ina ia teena pili tupe a le kovana, leaga e foliga mai o lea ua aapa mai le kovana e faaee lafoga i pisinisi ma oloa ina ia totogi ai aitalafu a le malo, lona uiga o le atunuu lautele lava o le a toe tigaina i le totogia o le aitalafu a le malo.

Fai mai le finagalo o le isi tama matua e lei manao e faailoa lona suafa, e leai se mea o le a oti faalua ai le atunuu e totogi a latou pili toe totogi ma pili a le malo, ae o lea lava e tafili saunoa le malo i le soona faaaoga o le uila ma le vai e aunoa ma le taumafai e faasao.

Ae na taua e Togiola i lana saunoaga e faapea, ana faapea e talia e le Fono pili tupe sa ia tuuina atu i ai, toe uma foi ona totogi ma le aitalafu e silia i le $10 miliona a le malo, atonu ua le toe i ai ni siitaga a le ASPA, pe ua toe tuu foi e le ASPA i lalo le totogi mo ana tautua.

Saunoa Togiola, o lea ua toe tolu aso ona faamutaina lea o le tauaofiaga mulimuli a le Fono mo lenei nofoaiga, ae o lenei lava e le o i ai sa latou faaiuga i le tele o pili taua sa tuuina atu i ai, mo le faamoemoe e maua mai ai se fesoasoani tupe mo le malo i le tau totogiina o lana aitalafu i le ASPA.

O le Aso Lulu o le vaiaso nei lea e atoa i ai aso e 45 o le tauaofiaga lona fa o le nofoaiga lona 32 a le Fono o loo nofoia nei, ma maea ai loa foi ma galuega a le Fono mo lana nofoaiga lenei.