Ads by Google Ads by Google

Le totogia malo kamupani tua fausia VA

O se tasi o mataupu na fesiligia e afioga i senatoa ina ua feiloa’i ma le Faatonusili o le Matagaluega o Galuega Lautele a le malo i le taeao ananafi, o le mafuaaga ua le totogiina ai e le malo tupe i kamupani tua sa fesoasoani atu i le faatinoina o le galuega o le fausiaina lea o le nofoaga autu mo fitafita tuai i Tafuna.

 

NA saunoa le afioga i le sui peresetene ia Nuanuaolefeagaiga Saoluaga Nua e faapea, o le faafitauli lea ua ia maua mai i ni isi o kamupani tua i le atunuu, ua uma ona fausia le nofoaga autu mo le VA i Tafuna, ae ua fiu kamupani e faatali le taimi e totogi atu ai i latou e le malo.

 

“E faapefea ona fai e le malo lena tulaga o le faaaoga o le tautua ma le auaunaga mai kamupani tua, ona nofonofo lea e le totogina tupe i kamupani ma pisinisi sa maua atu ai le fesoasoani,” o le saunoaga lea a Nua.

 

Ae na faamalamalama e le tamaitai faatonusili o le matagaluega o Galuega a le malo ia Faleosina Voigt i luma o le komiti e faapea, o lo o galulue lana matagaluega i le taimi nei i le tau faamautuina o gaioiga uma ma pepa mo le totogiina atu o tupe i kamupani tua ma pisinisi o lo o aitalafu ai le malo.

 

E ui e le i faamaonia e Faleosina le taimi ma le umi e faagaioi ai tulaga e pei ona ia taua, peitai sa ia faamaonia i le komiti, “ua sauni le malo e totogi tulaga uma e pei ona fesiligia, ua fautuaina fo’i e le alii kovana le matou matagaluega ina ia faanatinati gaioiga mo fuafuaga uma e pei ona taua.”

 

O le iloiloga a le komiti o Galuega Lautele a le maota maualuga e pei ona faataunuuina i le taeao ananafi, sa fesiligia ai le tamaitai faatonusili ia Faleosina i le tulaga ua i ai auala i le atunuu, aemaise ai o fuafuaga faataoto a le matagaluega mo ni isi o galuega e pei o taligalu i totonu o afioaga i le atunuu.

 

I le tulaga o auala e pei ona fesiligia e le toatele o le atunuu e aofia ai ma le Fono, na taua ai e Voigt e faapea, o lo o faagasolo pea ni isi o galuega mo auala i totonu o le atunuu i le taimi nei, e o o lava foi i taligalu i nisi o afioaga e pei o Aua ma Nuuuli, o lea ua amata galuega mo le faatinoina o nei galuega tetele.

 

Mo le auala i le malae vaalele, ua maea ona tuuina atu le konekarate i le kamupani a le McConnell Dowell, ma o lo o galulue itu e lua mo le faamautuina o tulaga i le pone ona faailoa ai loa lea o le taimi ma le aso e amata aloaia ai le galuega.

 

O ni isi o faasea mai sui o le komiti, o le taimi e malolosi ai timuga ma tafega i le atunuu, ona vaaia lea o le toe tafea o le asuemu lea o lo o la’u atu ma tanu ai omoomo i luga o auala.

 

Sa fautuaina e ni isi o senatoa ia le tamaitai faatonu ina ia toa silasila toto’a i tulaga ia, ina ia vaai ni auala mautu e faaleleia ai auala ma le tigaina e fai soo.

 

O ni isi o metotia sa mafai ona faailoa e sui o le komiti i le tamaitai faatonu, e fesoasoani ai i le faaleleia atili o auala, o le taumafai lea e faaleleia auala i nuu i tua ona o isi ia nofoaga o lo o toatele turisi e malaga asiasi i ai, pe a afea Amerika Samoa e vaa turisi mai fafo.

 

Na taua e le tofa Gaea Perefoti Failautusi e faapea, o lona nuu i Vaitogi le isi nofoaga e toatele turisi e masani ona afea, ona o lo o i ai se tasi o mata’aga taua i le atunuu, e tatau fo’i ona faaleleia le auala e aga’i atu i lea mata’aga ina ia faigofie i taavale ona latou uia.