Ads by Google Ads by Google

Le toe talia kapisi School Lunch ona o anufe na maua meaai tamaiti aoga

Na avea le fa’afitauli lea na tula’i mai i le Aoga Tulaga Muamua a Aua i le amataga o le vaiaso nei, ina ua maua se anufe i le ipu meaai a se tasi o le fanau aoga, ma itu ua faia ai le fa’aiuga a le Fa’atonusili o le Ofisa o Fa’atoaga a le malo, ina ia taofi le toe fa’atauina mai o le kapisi a le aufai fa’atoaga i le polokalame a le School Lunch seia i ai se taimi.

 

Saunoa Lealao M. Purcell e fa’apea, o le fa’afitauli e pei ona tula’i mai i le aoga a Aua, ua tula’i mai ai ma se fesili tele i lona manatu, po o fea lea e mafua mai ai le fa’aletonu, po o le Ofisa o Fa’atoaga po o le pito laau fo’i a le Ofisa o Aoga ma le School Lunch i totonu o Fale o lo o kuka ai meaai, ina ua le mata’ala tagata uma i le fa’atinoina o a latou tiute tauave.

 

“Ou te le tusitusi lima po o ai e mafua mai ai le sese, pau la’u fa’aiuga lea ua faia ina ia taofia ai le toe tula’i mai o se isi fa’aletonu fa’apea i le lumana’i, o le taofi o le toe fa’atauina mai o le kapisi mai le aufai fa’atoaga a le atunu’u i le School Lunch seia i ai se isi aso”, o le saunoaga lea a Lealao.

 

Ina ua fesiligia e le Samoa News le afioga Lealao po o ai tonu lava lea o lo o fa’atamala, po o le Ofisa o Fa’atoaga po o le au kuka, ae na saunoa le ali’i fa’atonu, “manatua fo’i e faigata tele ona iloa tama’i anufe ia e pipi’i mau i le lau o le kapisi, tusa lava pe mama le fufuluina o le kapisi, e i ai lava le avanoa e pipi’i ai se tama’i anufe i se vaega o le kapisi, lea la e pei ona tula’i mai ai le fa’aletonu”.

 

E ui e le i taua e Lealao po o ai tonu lea na mafua ai le fa’aletonu, peita’i e talitonu le ali’i fa’atonusili, so o se taimi lava e fa’atau mai ai e le aufai fa’atoaga fualaau ‘aina po o isi ituaiga fua o fa’aeleeleaga i le School Lunch, e tatau ona matua mautinoa ua mama mea uma ina ia taofia ai le tula’i mai o ni fa’aletonu fa’apenei i fanau aoga.

 

O le aso Gafua o le vaiaso fou lea ua fa’atulaga e le ali’i fa’atonu e amata le toe taliaina ai se kapisi ona toe fa’atau atu i le School Lunch.

 

Na fa’ai’u le saunoaga a le ali’i fa’atonu i lona fa’amalulu i le mamalu o matua, fanau aoga ma le aoga atoa i Aua, ona o le fa’aletonu e pei ona tula’i mai i taumafa a le fanau.

 

Na fa’amaonia mai e le Fa’atonusili o Aoga ia Vaitinasa Dr. Salu Hunkin Finau i le Samoa News le mae’a lea ona faia sa latou fonotaga faapitoa a le Ofisa o Fa’atoaga e fa’atatau i le mataupu lenei, ua mae’a fo’i ona faia fa’aiuga ina ia taofia ai le toe tula’i mai o se isi fa’aletonu fa’apenei i le lumana’i.

 

Ina ua fesiligia e le Samoa News ia Vaitinasa i sona finagalo, po o ai lea o lo o fa’atamala i le mataupu lenei, ae na saunoa le tama’ita’i fa’atonusili e fa’apea, “Manatua fo’i so o se mea lava tau i fa’atoaga ma le School Lunch, e amata mai lava i le pito laau a le tagata faifa’atoaga, e le gata e tatau ona fufulu mama fua o fa’aeleeleaga ao le i tuuina atu i le school lunch, ae tatau fo’i ona teu i totonu o ni atigi pusa mama e sauni ai mo le fofoga taumafa a le atunuu”.

 

E talitonu le tama’ita’i fa’atonusili, e i ai lava ni isi o le aufai fa’atoaga e le o fa’amaoni i le fa’atinoina o le pito laau faigofie lea, o le fufulu mama lea o fua o fa’aeleeleaga i le taimi e avatu ai e fua i le School Lunch.

 

A e ina ua toe fesiligia Vaitinasa, pe le o le aufai faigaluega a le Ofisa o Aoga o lo o gafa ma le kukaina o taumafa a fanau aoga e tatau ona tu’uaia i le fa’aletonu lenei, ina ua fa’atamala e fufulu fa’amama kapisi a o le i fa’aaoga e kuka ai meaai a le fanau, na saunoa Vaitinasa, “atonu lava e mafai ona tuuaia le au kuka, ae manatua fo’i, e i ai lava le taimi e ela ma sasi ai le vaai a le tagata kuka i nai tama’i fa’aletonu fa’apea, ona o le tele o taumafa mo fanau aoga o lo o kuka fa’atasi atu i le Fale Kuka a Samoana i Utulei, lea e aofia ai ma taumafa e la’u mo le aoga a Aua.

 

Saunoa Vaitinasa e fa’apea, e ova i le 1,000 le aofa’i o ipu meaai o lo o kuka e le aufaigaluega i le fale’aiga a le aoga maualuga a Samoana i aso taitasi, mo fanau aoga i Samoana atoa ai fo’i ma le aoga i Aua, “ lona uiga e i ai lava le taimi e tula’i mai ai sina sasi i le fa’atinoina o galuega”.

 

Na fa’amalulu Vaitinasa i le mamalu o matua, fanau aoga aemaise ai o le pulega a le aoga atoa, ona o le fa’alavelave e pei ona tula’i mai, faatasi ai ma lana ta’utinoga, e le toe tula’i mai se fa’aletonu fa’apenei i le lumana’i, peita’i na taua e ni isi o sui o le PTA a le aoga a Aua na valaau mai i le Samoa News e fa’apea, e le moni lea fa’aupuga e le toe tupu se isi fa’aletonu i le lumana’i, aua o le fa’alua ai lea ona tula’i mai fa’aletonu fa’apenei i totonu o le aoga, ae foliga mai o lea lava e manatu mama i ai le Ofisa o Aoga.

 

Na taua e le tamaitai faatonusili o aoga i le fonotaga a le kovana ma le aufai fa’atoaga sa faia i le vaiaso na te’a nei, o lo o i ai pea lava ni isi o le aufai fa’atoaga e le o manatu mamafa i le faatinoina o a latou tiute, e ala i le faamama lea o fua o fa’aeleeleaga o lo o la’u atu i le School Lunch, pau lava le mea o lo o naunau i ai latou o le tupe ia maua, ae le o manatu e fa’ataua le soifua maloloina o fanau aoga.

 

O le “fa’atamala” ma le “le fa’amaoni i le fa’atinoina o latou tiute” na tofia i latou e faia, ina ia saogalemu taumafa mo fanau aoga, o ni isi ia o upu na fa’aaoga e ni isi o matua mai le Aoga a Aua e fa’amatala ai o latou lagona le fiafia, fa’asaga i le fa’afitauli lea na tula’i mai i le aoga i le vaiaso nei, ina ua maua se anufe i totonu o le ipu meaai a se tasi o le fanau aoga.

 

“O le itu e laki ai, e le i aia e le fanau aoga e ana le ipu meaai le anufe, ae sa ia fa’aaogaina se vaega o le ipu meaai, e lagona ai le fa’anoanoa ona o lenei mataupu ua alia’e mai, ma ua tula’i mai ai le mau fesili, o ai la lea o lo o fa’atamala i le fa’atinoina o lana pito laau?”, o le saunoaga lea a se tasi o matua e le i finagalo e fa’ailoa lona suafa.

 

E le i ofi gofie i finagalo o ni isi o sui o le PTA a Aua saunoaga a afioga i Fa’atonusili e fa’apea, “o le sasi ua mafua ai le fa’aletonu e pei ona maua ai le anufe i totonu o le ipu meaai.”

 

“E leai se mea e ta’u o le sasi”, o le avaavau mai lea a le isi sui o le PTA i luga o le telefoni, “O ai la e tua i ai le sasi pe ana faapea e fa’aaoga e tamaiti le ipu meaai ma ‘ai fa’atasi atu ai ma le anufe, tula’i mai ai loa lea o se fa’aletonu, o ai la e tua i ai le ola o le tamaititi aoga e ma’imau ona o fa’atamala faapea i vaega laiti o le galuega”.

 

E talitonu isi matua mai Aua, e tu’uaia uma lava le aufai fa’atoaga, o le ofisa o fa’atoaga, vaega o le School Lunch, aemaise lava i le aufai galuega o lo o kukaina taumafa mo fanau aoga i le fa’afitauli lenei.

 

“Ana fa’amaoni le aufaigaluega e fa’atino a latou galuega e ala i le fufulu mama lea o kapisi, pe iloilo uma fo’i le tino o le kapisi ina ia mautinoa ua leai ni manu po o ni anufe o pipi’i ai, atonu e le tula’i mai lenei fa’aletonu”, o le molimau lea a le isi matua e le i finagalo fo’i e fa’ailoa lona suafa.

 

E le i nofo lelei i le finagalo o se tasi o sui o le aufai fa'atoaga i le atunu'u le fa'aiuga ua faia e le Fa'atonusili, e taofi ai le toe fa'atauina atu o kapisi i le School Lunch.

 

"E leai se mea faapea e fa'atamala le Ofisa o Fa'atoaga ma le Ofisa o Aoga e fa'atino a latou tiute tauave, ae pagatia ai fua le aufai fa'atoaga, aua o le isi lea auala o lo o maua ai le tupe mo le aiga, o le kalisi le e la'u atu i le School Lunch", o le saunoaga lea a se sui o le aufai fa'atoaga.