O le aso 22 Ianuari 2015 lea ua tolopo i ai le isi iloiloga o le mataupu a le malo ma Siaumau Siaumau Jr, ina ua talia e le fa'amasinoga maualuga i le taeao ananafi le talosaga a Siaumau Jr, mo se avanoa e toe tolopo ai lana mataupu, ae se'i tau saili e lona aiga se isi loia e tula'i mo ia.

O le iloiloga a Siaumau Jr lea na faia i le masina na te'a nei, sa tumu ai fafo o le fale fa'amasino i leoleo sa tiute ai mo le puipuia o le saogalemu, peita'i o le iloiloga ananafi, e leai ma se leoleo sa i ai, se'i vagana ai leoleo e to'alua o le toese sa i ai.

O ananafi na fa'atulaga ai se iloiloga fa'apitoa o le mataupu a Siaumau Jr ma le malo, lea na valaauina e le afioga i le ali'i fa'amasino sili lagolago ia Lyle L. Richmond, mo le iloiloina o le talosaga a le ua molia ua taoto i luma o le fa'amasinoga.

Na fa'ailoa e le ali'i loia fautua ia Michael White sa avea ma loia a Siaumau Jr e fa'apea, ua mae'a ona la talanoa ma le ali'i ua molia, ma ua ia fa'ailoa atu lona mana'o e le toe mana'o e avea o ia ma ana loia fautua, ae o lea ua galulue lona aiga  e saili se isi loia e tula'i mo ia.

Ina ua fesili ia Richmond ia Siaumau Jr pe moni lea tulaga, na tali le ua molia, "o lea lava lau afioga".

Saunoa Richmond e fa'apea, afai o le tulaga lea ua i ai le mataupu a le ua molia, lona uiga e tatau ona toe tolopo lana fa'amasinoga autu lea ua fa'atulaga e faia i le amataga o le masina fou o Tesema, ina ia lava le taimi e galulue ai le ua molia ma lona aiga e saili se isi loia e fautuaina o ia.

Na fa'ailoa e le loia a le malo ia Mitzie Jessop e fa'apea, na pau le atugaluga a le malo i le mataupu lenei, ua silia ma le 4 tausaga le umi o lenei mataupu, ma ua mana'omia le tatau ona fa'agaioi loa.

O le aso Gafua lea o le vaiaso fou na fa'atulaga e faia ai le fa'amasinoga autu a Siaumau Jr, i luma o tagata iloilo iuga mai le atunu'u.

Sa i ai se fautuaga e toe fa'atulaga le isi iloiloga o lenei mataupu i le aso 19 Tesema, peita'i na saunoa Richmond, e le taitai ona lava le taimi lea e amata atu i le vaiaso nei seia aulia le aso 19 Tesema e saili ai e le aiga a Siaumau Jr se loia e tula'i mo ia, ae manaia pe a fa'atulaga se isi iloiloga i le masina o Ianuari 2015, atonu e o o atu ai ua mautu fuafuaga uma o lo o mana'omia.

Na talosaga Siaumau Jr i le fa'amasinoga pe mafai ona fai sana fa'amatalaga, ma sa talia e le fa'amasinoga, ona ia saunoa lea e fa'apea, "pe mafai ona tolopo la'u mataupu mo le umi e 60 aso, ina ia mautinoa e lava le taimi e saili ai e lo'u aiga se loia e tula'i mo a'u".

E ui sa fa'ailoa e le itu a le malo atugaluga i le toe tolopo fo'i o lenei mataupu, peita'i na fa'amanino e Richmond e fa'apea, e amanaia fo'i e le fa'amasinoga aia tatau a le ali'i o lo o molia, e pei o le aia tatau e faia ai lana fa'amasinoga e tagata iloilo iuga, atoa ai ma le aia tatau e tula'i ai se loia fautua mo ia.

I le fa'aiuga o felafolafoaiga uma e fa'atatau i lenei mataupu, na fa'atulaga ai loa e le fa'amasinoga le aso 22 Ianuari 2015 e toe faia ai le isi iloiloga o lenei mataupu, ma le tu'utu'uga atonu e o o atu i le aso lea ua maua se loia e tula'i mo Siaumau Jr.

Sa fa'apea fo'i ona fa'alauiloa aloaia e le fa'amasinoga le fa'aleaoga o le fa'amasinoga autu a Siaumau Jr, lea na fuafua e amata i le aso Gafua o le vaiaso fou.

O le ali'i loia fautua ia Tautai Aviata Fa'alevao na avea ma ulua'i loia a Siaumau Jr ina ua fa'atoa tula'i mai le mataupu lea e pei ona tu'uaia ai o ia, i lona tagatavaleina lea o le ali'i leoleo su'esu'e ia Det. Lt. Lusila Brown i le masina o Iulai 2010.

Ae ina ua fa'ataotolia le afioga a Tautai i atunu'u i fafo ona o gasegase o le tino, na tauave ai loa e le Ofisa o Loia Fautua mo Tagata Lautele a le atunu'u le mataupu a le ua molia, seia o o mai i le taeao ananafi.

O lo o tu'uaia le ua molia i moliaga mamafa e pei o le fasioti tagata i le tulaga muamua, taumafai e fa'aoo le oti i se tagata, fa'ao'olima i le tulaga muamua, atoa ai ma isi moliaga e feso'ota'i ma le fa'aaoga fa'asolitulafono o se a'upega.

O lo’o taofia pea Siaumau Jr i le toese e aunoa ma se tupe faatulagaina e tatala ai i tua.