Le taunu’u fa’aipoipoga ina ua moliga fasioti tagata

O le taule’ale’a mai Savai’i lea na malaga mai i le teritori e fa’amautu tapenaga mo lana fa’aipoipoga i le faaiuga o le tausaga nei, ua le taunuu lea fuafuaga ina ua taofia o ia i le toese i Tafuna, ona o tu’uaiga i lona fa’ao’o lea o se manu’a tuga i le ulu o se ali’i sa la vevesi i le taimi o se inugapia, mulimuli ane maliu ai lava lea ali’i ona o le matuia o ia manu’a.

 

Na taua e le loia a Matulino Taualii e faapea, o le ua molia na malaga mai e tapena atu faatau ma mea uma e manaomia mo le la faaipoipoga ma lana manamea o lo o faatali mai i Niu Sila ia Tesema o le tausaga nei, ae tula’i mai ai loa le faalavelave e pei ona taofia ai o ia.

 

O le amataga o le masina nei na faila ai e le malo le moliaga mamafa o le faaoolima i le tulaga muamua faasaga ia Taualii, ina ua ia faaaoga se samala e faaoo ai manu’a i le ali’i na aafia, ae ina ua faamaonia mai e le falema’i o le LBJ le maliu ai o le alii na aafia ona o le tuga o manu’a sa aafia ai lona ulu, na toe suia ai loa e le malo le mamafa o le moliaga, ma molia ai loa i le solitulafono mamafa o le fasioti tagata i le tulaga muamua.

 

O le solitulafono o le fasioti tagata i le tulaga muamua, o se faasalaga A i le faatulagaina o solitulafono mamafa, e mafai ona faasala ai se tasi i le toese mo le olaga atoa e aunoa ma le nofovaavaaia, pe faatoa palola fo’i ina ua maea ona ia tuli tausaga e 40 o lana faasalaga faafalepuipui.

 

I faamaumauga a le faamasinoga o lo o taua ai e faapea, o le po o le aso 3 Oketopa, 2013 na tulai mai ai le faalavelave e pei ona molia ai Taualii, ina ua ia faaaoga se samala tu’i fao e ta ai le ulu o le alii na aafia i le taimi o se latou inuga pia, ma taofia ai le na aafia i le falema’i i Fagaalu ona o manu’a tuga sa aafia ai lona ulu.

 

O le vaveao o le aso Tofi na te’a nei, Oketopa 10 na faamaonia ai e le falema’i o le LBJ i leoleo le maliu ai o le alii na aafia, ona o le tuga o manu’a sa a’afia ai lona ulu.

 

Na taua e Taualii i leoleo e faapea, o le vevesi na tula’i mai i se latou inugapia sa faia i le fale o le alii ua maliu o Aiano Misilei i Fagaalu, lea fo’i sa i ai ni isi o la uo ma le alii ua maliu.

 

Ao faagasolo le inugapia, sa i ai se feeseeseaiga na tulai mai i le va o Taualii ma Misilei e faatatau i se tama’ita’i, ma faasa ai loa e Misilei ia Taualii ona alu i le fale o le tama’ita’i.

 

Na avea le faifai tetele o le vevesi i le va o le ua molia ma le alii ua maliu ma itu na alu ai loa Misilei i lo latou fale ma aumai se agaese, ma alu atu ai ua faafefe le ua molia e ala i lona tau tipiina o ia, peitai sa taumafai ni isi o la uo e vaevao Misilei mai lona o o atu ma le agaese ia Taualii.

 

Na taua e Taualii i leoleo e faapea, ina ua toe foi Misilei e faafoi le sapelu i lo latou fale, sa tu ai loa i luga ma aga’i atu i se tama’i shack o lo o latalata ane i le nofoaga sa fai ai le latou inuga ma aumai ai se samala, ona toe foi atu lea i le mea o lo o fai ai le latou inuga pia ma ana uo.

 

Na taua e Taualii i leoleo e faapea, a’o tu tu i fafo o le shack ma uu le samala i lona lima, sa ia vaaia Misilei ua toe savali atu i le mea o lo o tu mai ai e aunoa ma se sapelu o u u i lona lima, ae na toe oso atu foi se tasi o latou uo ma taumafai e una’i ese le ua maliu mai le o o atu ia te ia.

 

Na taua e Taualii lona taamilo ane i le isi itu ma osofa’i loa Misilei e ala i lona ta o lona ulu i le samala, e aunoa ma le iloa atu o ia e Misilei po o lana uo fo’i sa taumafai e taofi o ia.

 

Ina ua pau Misilei i lalo ua manu’a, sa tamo’e i le atoa Taualii i le ma’umaga ma lafi ai i le fefe, ae o le taimi lea na aga’i ane loa ni isi sa i ai ma auina atu le ua maliu i le falema’i mo togafitiga.

 

Na faamaonia e le alii foma’i ia Dr. Adriano Oliver i leoleo e faapea, o le matuia o le manu’a na aafia ai Misilei e ala i le sau i fafo o se vaega o lona faiai, na mafua ai ona maliu o ia.

 

O le aso Faraile ua te’a na faatulaga e tuuina atu ai le tali tete’e a Taualii i luma o le faamasinoga maualuga e tusa ai o le moliaga mamafa ua tuuaia ai o ia, peitai ua toe tolopo lea iloiloga seia aulia le aso Faraile o le vaiaso nei, ina ua fesiligia e lana loia fautua ia Douglas Fiaui le faasalaga o le solitulafono lea ua molia ai e le malo le ua molia ua i luma o le faamasinoga, lea o lo o atagia mai ai le i ai o se mea sese o lo o i ai.

 

Na taua e Fiaui i le fa’amasinoga e faapea, i lalo o le tulafono toe teuteu a Amerika Samoa, o le faasalaga o le moliaga o le fasioti tagata, e mafai ona faasala ai se tasi i le toese mo le olaga atoa, po o le taofia i le falepuipui i le umi e le itiiti ifo i le 10 tausaga ae le sili atu i le 30 tausaga, ae o faamaumauga e faatatau i le faasalaga o le solitulafono ua molia ai Taualii ua i luma o le faamasinoga, o lo o taua ai le mafai lea ona faasala se tasi i le toese mo le olaga atoa e aunoa ma se avanoa e nofovaavaaia ai, po o le palola fo’i i tua ina ua maea ona tuli tausaga e 40 o lana faasalaga faa falepuipui.

 

Talu ai e le o manino le faasalaga e pei ona taua i le pepa o tagi ua faaulu e le malo faasaga ia Taualii, na poloaina ai loa e le faamasinoga le toe tolopo o lenei mataupu, ma ua toe taofia i le toese le ua molia e aunoa ma se tupe ua faatulaga e tatala ai o ia, e faatali ai le aso lea ua faamoemoe e toe tulai ai i luma o le faamasinoga.

 

Comment Here