i le suafa Aumoeualogo

I se fa’aiuga na tu’uina mai e le Fa’amasinoga Apili i le aso 17 o Ianuari, ua fa’amautu atili ai le fa’ai’uga a le Faamasinoga o Fanua ma Suafa, i le tu’uina atu o le suafa Aumoeualogo, e umia e le afioga i le Anava o Taua ia Te’o J. Fuavai.

O i latou sa tagi po o le itu tete’e i lenei mataupu, e aofia ai Malagamali’i L. Misailegalu, Simei Pulu ma Fepulea’i Sila Poasa.

E tusa ai ma fa’amaumauga a le fa’amasinoga o lo o ta’ua ai, ia Novema 28, 2002, na taloina ai e Mamea se fonotaga, lea na fa’atasi ai Simei, Malagamaali’i ma Te’o, ae le’i auai Fepulea’i.

I le fonotaga lea, na faia ai se maliliega e fa’apea, o le a talanoa lava le faletama po o aiga e saili ma filifili mai so latou sui mo le suafa.

Na faia se feiloaiga a le faletua/aiga o Fanuatanu peitai e lei maua se tasi, ae o le faletama/aiga o Falealo, e fa’atolu ona feiloa’i i latou, ma, i le latou feiloaiga lona tolu, na fulisia ai le aiga ia Fepulea’i, peitai sa tete’e Malagamaali’i i lea fa’ai’uga, ma fa’atu mai ai e ia lona lava igoa mo le suafa.

O Aokuso 16, 2003, na feiloai ai loa faletama/aiga ia e lua peitai e lei fa’atasi ai Fepulea’i, se’i vagana ai Simei, Te’o ma Malagamaali’i, ma o lea feiloaiga sa faia lea ina ua maea ona faia ni faasalalauga i luga o le ea ma nusipepa e faalauiloa ai le talanoaga a le aiga.

I lea fonotaga, sa na o Te’o ma Simei na fa’atutu atu o la suafa e sailia ai se tasi e nofo il e suafa, peitai ina mae’a le talanoaga, sa fulisia ai loa le aiga potopoto ia Te’o e nofo i le suafa.

O le tausaga 2006 na lesitala ai e Te’o le suafa Aumoeualogo, peitai sa fa’alavelave i ai i latou e toatolu e pei ona taua i luga, lea foi e lei mafai e le Ofisa o Mataupu Tau Samoa ona fa’ato’a filemu le mataupu, ma tofu atu ai loa i luma o le faamasinoga o fanua ma suafa.

Ia Me 5, 2008, na tu’uina atu ai e le fa’amasinoga lana fa’ai’uga ia Te’o na te umia le suafa Aumoeualogo, ae talu ai o se tulaga faafuase’i na tulai mai ina ua tuumalo se tasi o faamasino sa nofoia le iloiloina o lenei mataupu a’o le’i tuuina mai le faaiuga, sa na o le toalua ai loa faamasino na totoe, ma toe faia ai loa le faamasinoga, lea na tuuina mai ai loa le faaiuga a le faamasinoga i le aso 27 Ianuari 2009 e tuuina atu ai le manumalo i le afioga Te’o, ina ua malilie uma i ai faamasino e toafa sa iloiloina lenei mataupu.

O le faamasino sili lagolago ia Lyle L. Richmond ma John L. Ward II na faatautaia le iloiloina o lenei faaiuga, faatasi ai ma le lagolagosua a afioga i alii faamasino lagolago ia Satele Ali’itai Lili’o ma Fa’amausili P. Pomele.