Ads by Google Ads by Google

Le pasia e le Senate sui tofia mo Komiti Faafoe a le Litaea

PASIA E FAIPULE NA’O LE TO’ALUA

 

Na teena e le Senate i le taeao ananafi sui e to’aono o le Komiti Faafoe a le Litaea na tofia e le Kovana, i se palota na faia ina ua mae’a se iloiloga pu’upu’u na faatautaia e le Komiti o le Litaea a le maota maualuga, ae i luma o le maota o sui, na teena ai e le maota o sui le to’afa o le to’aono na teena e le senate sei vagana ai le to’alua na pasia.

 

O i latou na teena e le Senate atoa ai ma latou palota na aofia ai Su’a Carl Schuster e 4 palota ioe ae 8 palota leai; o Talalemotu Mauga e 7-5; Avamua Dave Haleck e 3-9; John Marsh e 6-6; Nanai Afuola Kalasa e 4-8 ma Toafala Iafeta e 7-5.

 

Ae i luma o le maota o sui, e na o Talalemotu ma Toafala na pasia e faipule i palota e 14-2 mo Talalemotu ae 11-5 mo Taofala, a’o i latou na teena na aofia ai Su’a i palota e 6 le ioe ae 10 le leai; Avamua e 5-11; Marsh e 6-10 ma Nanai e 5-11.

 

ILOILOGA A LE SENATE

 

Sa toatele nisi o Senatoa e le’i fesiligia sui tofia na auai atu i le iloiloga, lea na

 

O le 8:30 i le taeao ananafi na faataunuuina ai le iloiloga a le komiti o le litaea a le senate, mo le fesiligia o agavaa o i latou na tofia e le alii kovana e avea ma totino o le komiti fou a le litaea.

 

Mai le to’afono na auai i le iloiloga lea foi ua teena uma e le senate, e na o le susuga lava ia Brandt ‘BJ’ Judy e le’i auai i le iloiloga.

 

I le taimi o le iloiloga, o le toatele lava o senatoa e le’i faia ni a latou fesili sei vagana fautuaga ma timaiga i auala e faatino ai a latou galuega, ona sa latou taua le lava o le agavaa o i latou nei e mafai ai ona avea i latou ma totino o le komiti a le litaea.

 

Na latou faafetaia foi le kovana sili i lana filifiliga ua mafai ai ona tofia i latou nei e avea ma totino o lenei komiti faafoe taua.

 

Na taua e le alii senatoa ia Soliai Tuipine Fuimaono e mafua ona taua le tautua a le komiti faafoe fou a le litaea ua i ai, o le latou tiute e puipui teugatupe a le litaea mo le manuia o fanau o lo o aga’i mai i le lumana’i.

 

“Ia outou alolofa i le lumana’i o tatou fanau aua e mavae atu tatou ae o teugatupe nei e tua i ai lo latou lumana’i, ma soia le toe taliaina ni aitalafu a le malo mai teugatupe a le litaea,” o le saunoaga lea a Soliai.

 

Na saunoa le alii senatoa ia Mauga Tasi Asuega, e i ai lona talitonuga o le tele o vaega eseese a le malo o lo o faaletonu uma a latou teugatupe, sei vagana ai lava le vaega a le litaea.

 

Na taua e le alii senatoa ia Saole Mila e faapea, e manaia tele ae toe faaauau le fuafuaga na taumafai mai e kovana Togiola Tulafono ua mavae atu, i le tulafono e faaee ai se faamanuiaga mo tagata faigaluega a le malo ua latalata ina litaea, ina ia maua ai e i latou se vaega tupe pe a litaea, ae maua ai le avanoa mo fanau aoga ua faauu mai i aoga e galulue ai i galuega a le malo.

 

I finagalo faaiu o le iloiloga, na saunoa ai Magalei Logovii, o ia foi lea sa avea ma totino o le komiti faafoe tuai a le litaea ua mavae atu e faapea, na mafua ona ave e le komiti tuai a le litaea le mataupu e faatatau i le komiti fou na tofia e le kovana i le faamasinoga, e le faapea o le tete’e i le komiti fou ua tofia, ae o le naunau e faamanino se vaega o le tulafono sa latou manatu e le’i ausia ina ua tofia le komiti faafoe fou.

 

ILOGA MAOTA O SUI

 

O le iloiloga a le maota o sui na taitaia e le alii faipule ia Fagasoaia F. Lealaitafea o le taitai komiti. ma o le tele foi o finagalo o afioga i faipule sa latou taua ai lo latou lagolagoina o tofiga a le kovana e tusa ai o le komiti faafoe fou ua i ai nei.

 

O ni isi o fesili na laga e faipule e lei mafai ona tali e le komiti, ona sa latou taua e lei maua se taimi latou te mafuta faatasi ai e tusa ai o le galuega, ona o lea faatoa valaau latou e molimau i luma o le fono.

 

Ae ui e lei maua sa latou feiloaiga, na latou taua ni isi o a latou fuafuaga mo le puipuiina malu o teuga tupe o le litaea a le malo, e ala i le taumafai lea e faatonutonu tulaga o tupe e avatu faaaitalafu ina ia mautinoa o lo o mulimulita’i le komiti faafoe i ala o le tulafono.

 

O se tasi o itu na fesiligia e afioga i faipule, o le tulaga i le soifua maloloina o sui o le komiti, ae na tali ni isi os ui o le komiti e faapea, e ui i tulaga matutua ua i ai tausaga o latou soifua, ae leai se isi o i latou e aafia i ma’i o le tino pe faamama se toto, ae o lo o faaauau pea ona latou galulue mo le atunuu.