Ads by Google Ads by Google

Le mautonu se fesoasoani mo mai i le malo mo aumalaga

Na faamaonia mai e le Sui Failautusi o le Ofisa o Mataupu Tau Samoa, le tofa Nanai Afuola e fa’apea, o lo o faatali pea se tali mai le malo, mo nuu o le a malaga atu e tali valaaulia i mai Samoa, mo le  faamanatuina o le 50 tausaga o lana fu’a, lea o le a amata faamanatuina i le vaiaso fou.

“O loo faatali pea se tali mai le alii kovana, na pau le tulaga lea ua tuuina atu i ai, o talosaga mo ni nai vaega tupe ina ia fesoasoani ai i nuu o le a malaga,” o le saunoaga lea a le tofa Nanai Afuola i se talanoaga i luga o le telefoni i le afiafi ananafi.

O le mataupu e uiga i ni fesoasoani tau tupe mai le malo mo nuu o le a malaga, sa fesiligia ai foi e se tootoo le alii kovana i luga o lana polokalama i le faaiuga o le masina na te’a nei, e ui e le’i tuuina mai i ai se tali maoti mai le afioga i le matua ia Togiola Tulafono.

Ae na taua e lea tootoo, afai o valaaulai nei o lo o faia i le va o malo e lua, e tatau foi la ona i ai se fesoasoani a le malo o Samoa atoa ai ma le malo o Amerika Samoa e fesoasoani ai  i tapenaga a nuu ma afioaga o le a  masii atu i faamoemoe faapenei i tausaga taitasi.

“Afai ua manatu le malo e tuu atu lona tauau e fesoasoani ai i au malaga ma a latou tapenaga, e tatau foi la ona tofutofusia uma au malaga o le a autovaa atu i Samoa,” o le saunoaga lea a se tasi o tamalii o loo faauluulu i ai se tasi o aumalaga e lei finagalo e faailoa lona suafa.

Na taua e lea tamalii, soo se valaaulia lava mai Samoa mo aso faapitoa faapenei e i ai au siva, pese, au taaalo ma isi lava valaaulia, e tatau ona tuu atu i ai se fesoasoani a le malo.

E lei faailoaina mai foi e le tofa Nanai pe fia se aofai o ni meaalofa o loo talosagaina mai le malo, na pau lana saunoaga, o loo faatali se tali a le alii kovana.

O au malaga ua faamaonia le malaga atu i Samoa e aofia ai le itumalo o Alataua lea o le a latou tapenaina le pese faaleaganuu, o Aasu lea o le a latou saunia le siva, faapea ai ma le ausiva a le afioga a Satele Galu Satele mai Vailoa, ae o le afioaga o Vatia lea o le a malaga atu lana au kirikiti e tali foi i le valaaulia mai Samoa.

O le Aso Gafua o le vaiaso fou lea ua faamoemoe e amata gasolo ai aumalaga mo Apia, e ala i le tautua a le tamaitai o Lady Naomi, ma ua faailoa mai foi e nisi o sui o aumalaga o le a tuuvaa atu i Samoa, o loo malaga fua uma au malaga i le vaa a le malo o Samoa mo lenei faamoemoe.

E lei faailoa mai po o fea lea o le a api ai le au malaga a le afioaga o Vatia ma lana au kirikiti, ae o le aumalaga a le Itumalo o Alataua o le a tali i le afioaga o Vaimoso i le taulaga i Apia, ae o le au malaga a Aasu o le a tali e le afioaga o Afega.

E ese mai i aumalaga mai nuu, o isi au malaga ua faamaonia le malaga atu e aofia ai le au volipolo e tasi faapea ai ma le aufusu.