Ads by Google Ads by Google

Le mautonu ni isi i le pule fou a le LBJ

Ua fesiligia e ni isi o le atunuu le faaiuga a le Komiti Faafoe a le falema’i o le LBJ lea ua faalauiloa mai, i le filifilia lea o le isi fo’i papalagi mai fafo e avea ma pulesili o le falema’i, e sui tulaga ia Michael Gerstenberger, o seisi foi alii palagi lea ua tuua le teritori.

 

Na taua e ni isi o le atunuu i le Samoa News e faapea, o le filifilia o tagata mai fafo latou te pulea le falema’i o le atili tele ai o faaletonu e fetaia’i ma le atunuu.

 

“Ao pule le papalagi lea ua alu ese atu, e le gata sa sii i luga le totogi o le tele o tautua a le falema’i, ae sa i ai fo’i ni isi o fesuiaiga le manuia sa faia i le lotoifale o le falema’i na aafia ai le toatele o tagata faigaluega,” o le saunoaga lea a le tina o Akenese Amituana’i-Leaupepe.

 

“E le o toe manaomia e le atunuu se isi pulesili na te faaopoopoina le avega i tagata, ua manaomia se tagata na te faia faaiuga e manuia ai le atunuu, ma ia fai ma le alofa”.

 

E to’atolu isi tagata faigaluega a le LBJ e aofia ai ma se sui sinia sa faaalia foi lo latou le lagolagoina o le faaiuga a le Komiti Faafoe ua faia nei.

 

“Ou te talitonu lava a’u e mafai e se alo o le atunuu ona faatino le galuega o le avea ma pule, ou te le faailoga lanu i tagata faigaluega, ae ou te manatu, aisea e toe manaomia ai tagata mai fafo o lea ua i ai le agavaa i tama fanau a le atunuu e faatinoina ai le galuega,” o le saunoaga lea a le isi o le toatolu lea e le’i finagalo e faailoa lona suafa.

 

Ae na taua e se sui sinia o le falema’i e faapea, afai ua manatu le komiti faafoe e aumai papalagi mai fafo latou te faatautaia le falema’i, e tatau foi la ona latou vaavaai toto’a i totogi o tagata nei, ona o le isi lea faafitauli o lo o feagai pea ma le falema’i, e fai mai e le o lava tupe e faatino ai la latou auaunaga a’o totogi o i latou o lo o umia tofiga maualuluga ua fai lava si maoa’e.

 

O le po o le Aso Tofi o le vaiaso na te’a nei na toai taunuu mai ai i le atunuu le pulesili fou o le LBJ, le susuga Joseph J. Davis Fleming, ma amata ai lava lana auaunaga i le Aso Faraile na sosoo ai.

 

I se tusi na tuuina mai e le Taitaifono o le Komiti Faafoe ia Toloitaufa Sandra King-Young i le afioga i le kovana sili ia Lolo Matalasi Moliga i le Aso Tofi na te’a nei, o lo o taua ai le faaiuga ua autasi i ai le komiti.

 

Na taua e Toloitaufa i lana tusi e faapea, “E le’i faigofie le filifilia a le komiti mo le filifilia o le susuga Joseph e avea ma pule sili o le LBJ,” o le saunoaga lea a Toloitaufa, ina ua ia faalauiloa le to’a 33 o i latou na tusi talosaga mo le avanoa, lea e aofia ai ma le to’a 7 mai totonu lava o Amerika Samoa”.

 

Ao lei faia le faaiuga a le komiti, sa maua le avanoa latou te fesiligia ai i latou uma e to’afitu mai Amerika Samoa nei na tusi talosaga, ae mo i latou sa tusi talosaga mai fafo, e filifili e le komiti faafoe tusi talosaga e 10 pito sili ona lelei, ona latou toe filifilia mai ai loa lea o le toat 3 pito i luga, ma o i latou la ia sa fesiligia e le komiti ma faamanuiaina ai loa le susuga a Fleming.

 

O ni isi o vaega na faavae ai luga le filifiliga a le komiti e aofia ai le tagata e i ai lona agavaa i itu tau tupe, o polokalame o lo o faatupe mai e le feterale mo Amerika Samoa e pei o l Medicaid ma le Medicare ma tulafono o lo o faatautaia ai nei polokalame, aemaise ai le agavaa e foia ai faafitauli tau tupe pe a alia’e mai i le falema’i.

 

“Ua matou maua o agavaa uma nei o lo o maua e le susuga Mr. Fleming,” o se vaega lea o le tusi a Toloitaufa i le alii kovana.

 

O lo o umia e le susuga Fleming faailoga e fesootai ma le galuega ua tofia ai o ia, sa avea foi o ia ma pulesili o ni isi o falema’i tetele i fafo e pei o CURE International i Kabul, Afghanistan ma le Square Hospitals Ltd i Dhaka, Bangladesh.

 

Sa galue foi o ia o se Suetusi i le polokalame o le Medicaid i Texas, lea e tusa ma le $12 piliona le tupe sa mafai ona faafaigaluegaina ai.