O le tulaga vevesi lea o lo o tulai mai i le sailiga tofi a Itumalo o Manu’a #2 ma le Itumalo o Alataua mo le tofi Senatoa, ua atagia mai ai le ono tofu atu o ia mataupu i luma o le faamasinoga e fai mai ai se faaiuga faaiu.

O lea tulaga ua maitauina ina ua le maua se tasi i le va o sui o lo o faatutu mai e itu malo taitasi.

I se ripoti o lo o taua ai, ua maea nei ona tuuina atu le mataupu a le Itumalo o Alataua i le Faamasinoga.

O le a maua atu se atoaga o lea mataupu i le isi a tatou lomiga o lo o sosoo ai, ae mo Manu’a #2, e ui o lea ua tasi Olosega/Sili i le tofa i le tootoo ia Malemo Tausaga e fai ma o latou sui, peitai o lea ua faamaonia mai e le Kovana Itumalo a Manu’a lona tofia o le afioga i le Faatui ia Laolagi Fonoti Savali Vaeao e fai ma latou sui.

Ae mo le Itumalo o Alataua, o le tofa i le tau tootoo ia Faletogo Tafavalu Taliloa o lo o finau mai le isi itu ua tasi i ai le Itumalo, ae o lo o finau mai foi le isi itu o le afioga a Faletagoa’i Iati Tuiolemotu lea ua filifilia e fai ma o latou sui i le Senate.

Ae mo le tofi a Manu’a #2, ua faamaonia mai ai e le Kovana Itumalo o le Falelima i Manu’a, le afioga a Misaalefua Hudson, ia le filifilia o le afioga i le alii Faatui ia Laolagi, e avea ma Senatoa o le Itumalo o Manu’a #2, e ui ina sa fa’aalia mai e le tofa i le to’oto’o ia Malemo Tausaga, ia le filifilia o ia e le itumalo, i se fonotaga sa faia i Manu’a i le Aso Faraile o le vaiaso ua tuana’i, e avea ma Senatoa fou o le itumalo.

“O lea ua faamaonia o le afioga i le alii Faatui ia Laolagi o le a fai ma Senatoa o le Itumalo o Manu’a #2, o le faaiuga lea sa tasi i ai le fono sa usuia i le laoa o Le’i i Tafuna i le aso ananafi, ae lei auai ni sui o Olosega.” o le saunoaga lea a Misaalefua.

E lei manuia taumafaiga a le Samoa News i le tau sailiina lea o se finagalo o le Failautusi o le Ofisa o Mataupu Tau Samoa, le afioga i le Faatui ia Lefiti Atiulagi Pese e faatatau i lenei mataupu.

O lea faaiuga sa faia e aunoa ma se sui o le Itumalo o Olosega na auai, e ui o Olosega/Sili lea ua oo i ai le faasologa o le tofi a le Itumalo.

Saunoa Misaalefua, ua maea ona logo le itumalo o Olosega/Sili e faatatau i le fono, peitai na taua e Malemo Tausaga, e le’i logoina o ia ma lona Itumalo i se fono.

O le aso Gafua na te’a nei na lomia ai i le Samoa News le faaiuga o le fono a le itumalo o Olosega/Sili, e pei ona tasi ai i le tofa a Malemo e fai ma o latou Senatoa i le nofoaiga o lo o sosoo ai nei.

Ina ua fesiligia e le Samoa News le afioga ia Laolagi i le aso ananafi, sa ia faamaonia mai ai foi le saunoaga a Misaalefua.

Saunoa Laolagi e faapea, o ia lea na toe filifilia i le fono sa faia i le aso Lulu na te’a nei i le motu o Tutuila nei, ma ua maea ona sainia e le afioga a Misaalefua le pepa e faamaonia ai le filifilia o ia, ma ua tuuina atu foi lea pepa i le Ofisa o Mataupu Tau Samoa i le taeao ananafi mo le failaina.

O le itula e 5:00 i le afiafi na fuafua e faia ai lea feiloaiga i le maota o Le’i Sonny Thompson i Tafuna, peitai ina ua oo i le taimi sa fuafuaina mo le fono, e leai ni sui o le itumalo o Olosega o i ai, o lea na faia ai loa le faaiuga e toe faatuatuai laititi le amataina o le fono, ae sei faatali ni sui o Olosega, ae ina ua tuana’i minute e 30 e lei oo atu lava ni sui o Olosega, sa faaauau ai loa le fono.

O isi sui o le itumalo o Manu’a #2 sa i ai i le fono e aofia ai le afioga i le Kovana Itumalo ia Misaalefua, o le afioga i le kovana sili filifilia ia Lolo Matalasi Moliga, o le afioga i le alii Senatoa ia Velega Savali Jr ma le tofa ia Le’i S. Thompson.

Sa faamaonia foi e Misaalefua i le fonotaga lea, ua maea ona ia logoina taitai o le itumalo o Olosega ma Sili mo le fono, peitai ina ua fesiligia le tofa i le tootoo ia Malemo Tausaga e faatatau i le fonotaga lea, na taua ai e Malemo lona le iloaina o se fonotaga sa faia.

“E le’i logoina maia a’u ma lo’u itumalo i se fono, ae ou te le iloa foi po o le a lena fono ua toe fai, o lea ua maea ona fono le Itumalo i Manu’a,” o le saunoaga lea a Malemo ina ua fesiligia e le Samoa News.

Na taua e Malemo e faapea, o le fonotaga lea na usuia a lona itumalo i le aso Faraile na te’a nei i Manu’a, na filifilia ai o ia e fai ma Senatoa o le Itumalo i le isi nofoaiga o lo o sosoo nei.

“O lea ua taoto le faaiuga a le matou Itumalo, o a’u lea ua sauni e fai ma o matou sui, ae o le fono lea na faia i le vaiaso nei, ou te le iloaina mataupu o lea Fono, e le faia foi i le ala upu a le Itumalo lenei, afai e fia fono le Itumalo, e Fono i Manu’a ae le o Tutuila nei,” o le saunoaga manino lea a Malemo.

Na taua foi e Malemo i le Samoa News e faapea, na te le iloaina poo a nei mea e taumafai le isi itu e tau fafau mai, ae o lea ua maea ona faamaonia e le Faalupega o le itumalo ia Puletasi Aisake le tofiaina o ia, ma ua maea foi ona tuuina atu le pepa o lo o saini ai le Faalupega i le Ofisa o Mataupu Tau Samoa e faailoa atu i ai le faaiuga a le itumalo.

Na faamanino e Malemo e faapea, ua maea ona taoto faaiuga a le Itumalo, a uma Ofu i le tofi, ona oo atu lea ia Olosega ma Sili, afai foi o Ofu lea ua oo i ai le faasologa, e fono lava Ofu latou e saili sa latou sui, e faapena foi le tofi pe afai e oo atu i Olosega, e fono lava Olosega  ma Sili e sali ai so latou sui.

“I lo’u la talitonuga, o Ofu lea o lo o i ai le tofi i le taimi nei, ma ua oo mai nei le faasologa i lo’u itumalo o Olosega/Sili, le mafuaaga lena ua ala ai ona tofia a’u e fai ma o matou Senatoa,” o le saunoaga lea a Malemo.

Na taua e se molimau i le Samoa News e faapea, e le’i i’u lelei le fono a le Itumalo sa usuia i Olosega i le vaiaso na te’a nei, ina ua tula’i ese le afioga Laolagi ma le Fono ae le’i maea.

Saunoa Laolagi, o ia e sauni lava i soo se taimi mo le tautuaina o le Itumalo ma le atunuu e ala i le tofi Senatoa.