Ads by Google Ads by Google

Le manuia taumafaiga Talavalu ta’ito’a 7 i Ausetalia

O le le manuia o taumafaiga a le ‘au lakapi a le teritori, o le TALAVALU, i le latou ta’aloga ma le ‘au a le Atu Kuki, i le Aso To’ona’i na se’i mavae atu nei, ua misi ai so latou avanoa mo so latou tulaga i totonu o le ta’amilosaga ta’ito’a 7 o le Oceania, e pei ona alo atu ai i Ausetalia ae le gata i lea, o so lato avanoa mo le Ipu o le Lalolagi i Ta’aloga Ta’ito’a 7, i Lusia i le 2013.

O lea ua tula’i mai ai le Talavalu i le #6 i fa’atulagaga o ‘au e valu o le Pasefika sa auai i lenei ta’amilosaga, ae tulaga lua ai le ‘au a le Manu mai Samoa, lea na le’i manuia fo’i le latou taumafaiga i le latou ta’aloga ma Ausetalia, 12-7.

Ui o lea, na mataina le amataina o taaloga a le tatou au i le Aso Faraile na te’a nei ina ua faiaina le au malosi mai Tonga i ai e 14-7, sosoo ai loa ma le taaloga lona lua ma Ausetalia, lea na faiaina ai le Talavalu i ai e 22-7 i se taaloga finau, ae manumalo ai i le taaloga faai’u o Pool games ia Solomona i ai e 34-12, ma tulaga lua ai loa le Talavalu a Amerika Samoa i le faatulagaina o le Pool B, ae manumalo ai Ausetalia.

Na taua i ni ripoti mai le upega o fesootaiga mai Ausetalia a le IRB e faapea, e ui i le tulaga na ausia e Amerika Samoa i lenei taamilosaga, peitai o se tasi lenei o au fou na faateia ai le toatele ina ua faiaina ai le au malosi a Tonga, atoa ai ma le finau o le la taaloga ma Ausetalia.

I se saunoaga a le faiaoga o le au a le atunuu, le afioga ia Leota Setefano Fata ina ua fesiligia e se sui o le IRB i le faaiuga o le la taaloga ma Tonga, sa ia taua ai e faapea, “O le mea mautinoa lava sa manatu mama le au a Tonga i la’u au, ae sa matou faailoa atu i ai e mafai foi ona matou tauva i le tulaga maualuga lea ua i ai le lakapi i le lalolagi i le taimi nei.”

Saunoa Leota, “O se taimi muamua lenei ua matou maua ai se avanoa e tausinio ai i taamilosaga faapitoa nei a le IRB, ma o se avanoa foi ua mafai ai ona matou faailoa atu le taleni o loo ia te i matou, o se laasaga tele foi lea mo le atina’eina o le taaloga lakapi i Amerika Samoa.”

E 47-0 ai na manumalo ai Ausetalia ia Solomona, ae 45-0 na manumalo ai ia Tonga, peitai ina ua oo mai i le Talavalu, e 22-7 ai na manumalo ai Ausetalia.

E 8 au mai le Pasefika na tausinio i le taamilosaga lenei, peitai e na o le lua lava au e piki mai e faaatoa ai au e 5 mai le Pasefika e tausinio i taamilosaga a le IRB lea e faagasolo i tausaga taitasi.

O au a le Pasefika e tolu ua mautu a latou avanoa e aofia ai Niu Sila, Fiti ma Samoa, peitai o lea ua faaopoopo atu i ai Ausetalia ma Cook Island.

O le taamilosaga taitoa 7 a le IRB lea e faagasolo i tausaga taitasi, le Sevens World Series ua faamoemoe e amata i le aso 13 ma le 14 Oketopa i Ausetalia, sosoo atu ai loa ma Dubai ma South Africa i le faaiuga o Novema ma Tesema. O le masina o Fepuari e toe faaauau ai i le taamilosaga i Ueligitone, sosoo atu ai ma USA, Hong Kong, Japan, Scotland ma faaiu ai loa i le taamilosaga i England i le aso 11 ma le 12 Me 2013.

I le faatulagaina la o au mai le taamilosaga lenei, ua tulaga muamua ai Ausetalia, tulaga lua Samoa, Tonga, Cook Island, Papua Niu Kini, Amerika Samoa, Solomona ma Tahiti i le tulaga 8.

E pei ona silafia e le atunuu, o le tulaga lava foi lea na maua e le au a le atunuu ina ua faatoa ofi i le taamilosaga lenei a le Oceania i le tausaga na te’a nei, lea na talimalo ai Samoa, ina ua faiaina i le au a Niue i le sailiina o le tulaga 5 ma le 6.

Ua faamoemoe e tatau taunuu mai le au a le atunuu i le ogatotonu o le vaiaso nei. E ui ua le manuia le taumafaiga a le tatou au taitoa 7, peitai o le faanaunauga i le afioga i le kovana sili, o ia foi lea o le taitaifono o le Iuni Lakapi a Amerika Samoa, le matua ia Togiola Tulafono, ia taumafai pea kalapu ma tupulaga e atina’e le taaloga lakapi mo le lumanai manuia o tupulaga talavou.