Ads by Google Ads by Google

Le manana’o Fono e oo atu sui Komiti Faafoe ASPA e molimau

E lei mafai e sui e toalua o le Komiti Faafoe a le ASPA ona ulufale i totonu o le iloiloga tuu faatasi a le Fono Faitulafono ananafi, mo le talanoaina lea o le latou Paketi, ina ua faia se faaiuga a le Fono, ua lava na o Pulesili ma le Teutupe e molimau.

O le itula e 10:00 i le taeao ananafi na faatulaga ai le iloiloga tuu faatasi a le komiti o le Paketi a maota e lua, mo le talanoaina lea o le paketi a le ASPA mo masina e 9 o loo totoe o le tausaga tupe lenei 2012.

A’o lei amataina le iloiloga i le taeao ananafi, na faatulai e nisi se fesili, pe talafeagai le i ai o sui o le Komiti Faafoe ia ua maea taimi e tatau ai ona avea ma totino o le komiti ona tali atu i fesili a le Fono, ma o le toatele lava o i latou na faaali o latou finagalo i lenei mataupu o afioga i Senatoa, lea foi sa latou taua e faapea, e le talafeagai ona auai totino o le komiti faafoe ua maea o latou taimi i le komiti, sei vagana ai lava i latou e lei maea o latou taimi.

Ao faia felafolafoaiga a le Fono, o le taimi lea ua leva ona i ai i le pito i luga sui o le pulega a le ASPA, e aofia ai le Pulesili, Teutupe, o taitai o isi vaega, taitaifono o le komiti faafoe ia Rev. Asaua Fuimaono, ma se tasi o totino le komiti o Vaa Sukalati.

O le tamaitai Senatoa ia Fonoti Aufata na faatuina le manatu e aua ai ne’i taliaina sui o le komiti faafoe ua maea taimi e avea ai ma sui o le komiti, lea foi sa lagolagoina e le afioga Avegalio Aigamaua, Fuata Dr. I’atala ma Velega Savali Jr.

Peitai o le afioga Alo Dr. P. Stevenson na ia fesiligia le pili lea na pasia e le Senate e faaleaogaina ai totino o le komiti faafoe a le ASPA e maea aso e 60 talu ona maea le taimi e avea ai ma totino o le komiti, ae le’i toe tuuina atu e le kovana lona suafa i luma o le Fono e faamaonia mai ai.

E lei taliaina e Alo le fautuaga mai nisi o Senatoa e taofi le iloiloga o le paketi a le ASPA pe afai ua maea uma taimi faatulagaina, ona o le talitonuga o le alii Senatoa, e taua tele le  faaauau pea o le iloiloga mo le paketi a le ASPA, lea foi sa lagolagoina e nisi o sui o le fono e aofia ai ma le alii Peresetene ia Gaoteote Palaie Tofau.

Na faamanino e le taitaifono o le komiti o le ASPA/TEO o le Senate ia Velega e faapea, o le pili muamua lea na pasia e le Fono e faaleaoga ai ona toe avea ma totino o le komiti faafoe se tasi e silia ma le 60 aso talu ona faamuta le aoga o lana tautua, ae lei toe  tuuina atu i luma o le Fono, na teena e le alii kovana, peitai o le  pili lona lua sa toe faaulu ma pasia e le Senate e sii atu ai le umi o aso i le 90 e tatau ai ona toe tuuina atu le suafa e toe faamaonia mai e le Fono, e oo mai lava i le taimi o loo taoto ai pea i le maota o sui.

Na faamanino e Gaoteote e faapea, e le o sui o le komiti faafoe a le ASPA e mafua ai le faaletonu ma le tuai o le toe faafouina o a latou konekarate, ae o le kovana lava e mafua ai.

Na atagia mai foi i finagalo faaalia a taitai o maota e lua, le le tasi o la finagalo i lenei mataupu, ona sa saunoa Gaoteote,  ua avea ma avega  mamafa le avatu o pili i le maota o sui ma taofi ai e le faia i ai ni faaiuga, peitai na saunoa Savali Talavou Ale e faapea, e i ai lona talitonuga e leai se afaina o le auai pea o totino o le komiti faafoe a le ASPA ua maea a latou taimi i le iloiloga o le latou paketi.

I le maea ai o felafolafoaiga a le fono, na faia ai loa le faaiuga e lava na o le Pulesili ma le Teutupe a le ASPA e oo atu e molimau.