VESI: Ua tatau ona fa’alautele galuega fa’atino a le Fono Faitulafono


Le afioga i le Faipule mai le itumalo o Manu’a #1 ia Vesi Talalelei Fautanu Jr. [ata AF]
ausage@samoanews.com

E ese mai i lana matafaioi o le fausiaina lea o tulafono mo le manuia o le faigamalo a Amerika Samoa, atoa ai ma le faia o iloiloga e fa’amanino ai galuega ma gaioiga o loo fa’atinoina e le faigamalo, ua fautuaina e le afioga i le ali’i faipule mai Manu’a #1 ia Vesi Talalelei Fautanu Jr le tatau lea ona fa’alautele teisi galuega fa’atino a le Fono Faitulafono aemaise lava i le maota o sui, e ala i le o i tua e asia tulaga o loo i ai galuega fa’atino a matagaluega ma vaega eseese o le malo, ina ia silafia ai e Faipule le tulaga tonu o loo taoto ai manaoga mai ia vaega ta’itasi o le malo.

 

E ui sa foliga e le lagolagoina e ni isi o afioga i Faipule le finagalo o le afioga a Vesi, ae na saunoa le ali’i faipule mai Manu’a, o se tasi fo’i sa tautua i vaega ‘au a le malo tele o Amerika mo le tele o tausaga, atoa ai ma le galuega o se faiaoga i le Matagaluega o Aoga a le malo e fa’apea, e le tatau ona gata i iloiloga galuega a Faipule e fa’atino, ae tatau fo’i ona savali le Faipule e siaki, vaai ma fesili i vaega eseese o le malo e pei o le falema’i ma kamupani, ina ia silafia ai le manaoga o loo tula’i mai ai.

 

“Talu lava ona ou oo mai i le maota, ua ou maitauina e pau lava lea o a tatou galuega e fa’atino, e na o le usu mai lava e fai galuega ma fai iloiloga, e aunoa ma lo tatou vaavaai i tua atu o isi auala e fa’aleleia atili ai la tatou tautua”, o le saunoaga lea a Vesi.

 

“Ou te talosaga atu ai ma le agaga fa’aaloalo i le paia o le maota, afai e tusa ai o lo outou finagalo, pe mafai ona fa’alautele teisi atu i tua la tatou galuega e pei o le tatou o e asia ni isi o vaega taua o le malo e pei o kamupani, ina ia tatou malamalama tonu ai i le manaoga o loo tula’i mai ai, aua talu lava ona tapunia le kamupani a le Samoa Tuna Processors (STP), tatou te le o malamalama atili ai lava i le tulaga tonu o loo i ai lea kamupani, ae afai tatou te asia le STP ma vaavaai ai i totonu o le vaega o loo fa’atino ai ana galuega, o iina tatou te malamalama tonu i le manaoga moni lava o loo tula’i mai ai”, o le saunoaga lea a Vesi.

 

Sa ia talosagaina le mamalu o le maota e fa’apea, afai e i ai se aso e le faia ai ni galuega a le maota, ona fa’atulaga loa lea o ni asiasiga e pei ona ia talosagaina, e pei fo’i ona ia fa’atinoina i le komiti o le Soifua Maloloina ma le Falema’i, i lona asia lea o le falema’i i Faga’alu ma tu’u fesili i ai i manaoga o loo mana’omia, e aofia ai manaoga o le le lava o foma’i atoa ai ma le utiuti o le itu tau tupe.

 

Na lagolagoina e le afioga i le ali’i faipule mai Manu’a #2 ia Toeaina Faufano Autele le finagalo o Vesi, ma ia taua ai le tatau lea ona muamua asia e le maota tulaga o loo i ai aoga i totonu o le atunu’u i le taimi nei, aemaise lava i le taimi e tuua ai aoga, ina ia silafia ai e Faipule le tulaga pagatia o loo feagai ma fanau aoga i le taimi nei, o le savavali i le vevela o le la e tau saili pasi e o ai i aiga, ona e le lava pasi aoga o loo tautuaina fanau aoga.

 

“E le tofu ta’avale uma fanau aoga ma o latou aiga, o isi aiga e lima vaivai ma tau fa’asoasoa le itu tau tupe e pei o ni isi o tatou, e fa’alagolago lava le tamaoaiga i tupe e maua mai i siaki i vaiaso totogi ta’itasi, o le taua lena o le asia muamua o tulaga o loo i ai aoga, ina ia silafia ai e le maota le manaoga o loo tula’i mai i aoga”, o le saunoaga lea a Toeaina na lagolagoina e le sui fofoga fetalai ia Fetu Fetui Jr.

 

Pau popolega o asiasiga e pei ona saunoa le sui fofoga fetalai, ina ne’i fa’alavelave ai faipule i le taimi o lo o fa’atinoina ai galuega a ofisa ma pisinisi, ae o se fautauga taua tele e tatua ona manatunatu toto’a i ai le maota i le lumana’i.

Comment Here