Ads by Google Ads by Google

Valaaulia aufusu a AS i fusuaga o le fu’a a Samoa ia Iuni

Le Ipu a le Kovana lea sa tausinio i ai aufusu a Samoa e lua i fusuaga o le fu’a sa faia i le vaiaso na te’a nei, lea ua manumalo ai le aufusu a Amerika Samoa. [ata AF]

I le mae’a ai o le ta’amilosaga o fusuaga mo le fa’amanatuina o le sisiga fu’a a Amerika Samoa i le fa’aiuga o le vaiaso na te’a nei, na valaaulia fa’apitoa ai loa e le ta’ita’i o le au fusu mai Samoa le au fusu a Amerika Samoa, ina ia auai atu i le ta’amilosaga o fusuaga mo le fu’a a Samoa, lea ua fa’amoemoe e faia i le masina o Iuni o le tausaga nei i Samoa.

Na taua e le afioga a Tapusoa Fifita i le Samoa News e fa’apea, o le valaaulia ua tuuina mai mo le au fusu a Amerika Samoa, o faiga masani lava a Asosi Fusu e atunu’u e lua i tausaga uma lava, lea e malaga mai ai le au fusu mai Samoa i le ta’amilosaga o le fu’a a Amerika Samoa, e fa’apena fo’i Amerika Samoa ma lana au fusu, lea fo’i e malaga atu i le ta’amilosaga o fusuaga a Samoa i le taimi o lana sisiga fu’a.

“O tausaga uma lava matou te malaga mai ai i Amerika Samoa nei, e tausinio ma le au fusu a Amerika Samoa mo le Ipu a le Kovana, a mae’a, ona malaga atu fo’i lea o le au fusu a Amerika Samoa e lu’i le Ipu a le Palemia o lo o fa’atautaia ai a matou ta’amilosaga mo le fu’a i Samoa”, o le saunoaga lea a Tapusoa i le Samoa.

Ina ua fesiligia e le Samoa News ia Tapusoa i le fa’aiuga o le fusuaga sa alo atu i ai au fusu e lua, e pei ona sola ai le au fusu mai Amerika Samoa ma le siamupini, na soisoi Tapusoa ma saunoa e faapea, o aga lava na o le ta’aloga i so o se taimi e fa’ataunuuina ai.

“E le mua uma ni va’a se lua e pei o le upu e fai i faigamea i le tai, fa’afetai fo’i i le au fusu a Amerika Samoa i le lava tapena o le latou au fusu mo lenei fa’amoemoe, o lena sa silasila uma le to’atele o le atunu’u i fusuaga o lenei tausaga, afai ua le atoa la matou taumafaiga i lenei tausaga, o le a matou toe tapena lelei mai i le isi tausaga o lo o lumana’i nei”, o le saunoaga lea a Tapusoa.

Saunoa atili Tapusoa e fa’apea, e i ai isi tama fusu lelei ua le maua le avanoa e malaga mai ai, ona o lo o tapena ni isi o a latou fusuaga mo le masina fou, ae ua faamoemoe o le latou fusuaga o le fu’a ia Iuni o le tausaga nei, lea fo’i ua valaaulia ai le au fusu a Amerika Samoa, o le a sili atu ona lelei la latou tapenaga e faatinoina ai.

Ina ua fesiligia e le Samoa News le afioga i le ali’i faiaoga o le au fusu a Amerika Samoa ia Toleafoa Henry Tavake e tusa ai o le valaaulia, na fa’amaonia mai ai e Toleafoa le saunoaga a Tapusoa.

“O lea ua taunu’u mai le valaaulia a Samoa mo le au fusu a Amerika Samoa, afai ae mae’a le ta’amilosaga o le fu’a lea ua matou manumalo ai, ona tapena loa lea o se au lelei e malaga atu i le valaaulia”, o le saunoaga lea a Toleafoa.

Saunoa atili Toleafoa e fa’apea, e lagona le fiafia ina ua faamanuiaina le au fusu a Amerika Samoa i le tausinioga sa faia ma le au fusu mai Samoa.

“E le faigofie le au fusu mai Samoa sa malaga mai, e matua lelei lava tama fusu sa fai ma sui o Samoa i lenei tausaga, ae fa’afetai i la tatou au fusu ina ua latou finau i le manumalo, ma matou toe manumalo ai i le Ipu a le Kovana i lenei tausaga”, o le saunoaga lea a Toleafoa.

O ni isi o igoa lelei sa malaga mai i le au fusu a Samoa e aofia ai le ali’i o Petelo Matagi, lea ua sauni e fai ma sui o Samoa i ta’aloga a le Olimipeka i Rio i le ogatotonu o le tausaga lenei.

Na manumalo le ali’i o Matagi i le la fusuaga ma Paofe Se’eti o Amerika Samoa i le aupaga o le heavy weight, ina ua au fa’atasi fa’amasino e tu’uina atu le manumalo ia te ia.

Ae mo Amerika Samoa, o ni isi o ali’i ua lau silafia i lenei ta’aloga e aofia ai le ali’i o George Tanoa Jr ma lona uso ia Keach Tanoa, lea fo’i na manumalo uma i laua i a la fusuaga.

O le vaiaso fou lea ua faamaonia mai e Toleafoa o le a amata tu’u fa’atasia ai le au fusu mo Samoa mo le amataina o a latou tapenaga.