Valaau Kovana le Fono Faapitoa mo le Fono Faitulafono

ausage@samoanews.com

E 10 aso le umi o le ulua’i Fono Faapitoa o le Nofoaiga lona 35 a le Fono Faitulafono lea ua valaauina e le afioga i le ali’i Kovana o le atunu’u, le tofa Lolo Matalasi Moliga, mo le talanoaina o ni isi o mataupu taua e fa’atatau i le faigamalo a Amerika Samoa.

 

I sana tusi sa tuuina atu i Ta’ita’i o le Fono Faitulafono e fa’atatau i le fono faapitoa, o lo o taua ai mataupu e 2 ua finagalo le Kovana e talanoaina i lea fonotaga.

 

O ia mataupu e aofia ai le talanoaina o le teuteuga i le tulafono na fa’avae ai le Faletupe Faateritori a Amerika Samoa, atoa ai ma le mataupu i le filifilia lea o le afioga i le ali’i Senatoa ia Paepae Iosefa Fai’ai e avea ma Fa’amasino Lagolago o le Fa’amasinoga Maualuga a Amerika Samoa.

 

Na taua e Lolo i ta’ita’i o le Fono Faitulafono lona talitonuina atoatoa o le tofa ma le fa’autaga i le Fono Faitulafono, mo le iloiloina atoa fo’i ma le pasiaina o mataupu e pei ona fuafuaina mo lenei fono faapitoa.

 

O le aso Gafua o le vaiaso fou, Novema 27 e o o atu i le aso 8 Tesema, o le umi lea ua fa’atulaga e le Kovana e nofoia ai le Fono Faapitoa.

 

Na taua e ni isi o afioga i Faipule le mae’a lea ona fa’ailoa atu ia te i latou o le fono faapitoa a le kovana, ma ua latou sauni fo’i mo lea fa’amoemoe. O ni isi o afioga i Faipule o lo o malaga i fafo mo a latou talavai, ma ua fa’amoemoe e toe taliu mai i le atunu’u i le po o le aso Faraile nei, e sauni ai mo le Fono Faapitoa.

 

O se tasi o mataupu sa aofia i mataupu na talanoaina i le malaga a le ali’i kovana lea na fa’atoa mae’a atu nei, o le talanoaina lea o le tulaga e fa’atatau i le auaunaga a le Faletupe Fa’ateritori a le malo, ina ia mafai ai ona fa’aleleia atili lana auaunaga mo le atunu’u.

Comment Here