Ads by Google Ads by Google

Ua leva ona i ai fa’afitauli o fualaau fa’asaina totonu aoga i le atunu’u


Susuga i Puleaoga o aoga maualuluga a le malo i Tutuila, i le taimi o le iloiloga sa faia i luma o le maota maualuga a le Senate i le taeao ananafi. [ata AF]

Afioga i Senatoa i le taimi o le iloiloga ma sui o aoga a le malo i le taeao ananafi, i le tau sailiina o se fofo o le fa’afitauli o fualaau fa’asaina i totonu o aoga. [ata AF]
ausage@samoanews.com

Na manino i molimau a sui o le Matagaluega o Aoga i le iloiloga lea sa faia i luma o le maota maualuga i le taeao ananafi, ua leva ona i ai i totonu o aoga a le atunu’u le fa’afitauli o fualaau fa’asania, ae o lo o taumafai pea le Ofisa o Aoga e saili se auala e foia ai lea fa’afitauli.

 

O le iloiloga lea na fa’ataunu’uina a le Komiti o Aoga a le Senate i le taeao ananafi, lea na galulue fa’atasi i lalo o le ta’ita’iga a le afioga i le ali’i senatoa ia Faiivae Godinet, galulue fa’atasi ai ma le Komiti o le Sailiga o le malo a le afioga i le ali’i senatoa ia Galea’i M. Tu’ufuli, sa fesiligia ai molimau a le malo e tusa ai o le fa’afitauli lea ua alia’e mai i le maua o fualaau fa’asaina i fanau aoga mai aoga maualuluga a le malo.

 

O molimau na auai e aofia ai le afioga i le Maoputasi ia Mauga Tasi Asuega o le Ofisa o Mataupu Tau Samoa, Komesina o Leoleo ia Le’i Sonny Thompson, Sui Faatonusili o Aoga ia Fa’auifono Vaitautolu, Ta’ita’i o Leoleo Su’esu’e ia Cpt. Pou Supapo, ma Puleaoga o Aoga maualuluga e 5 - Leone, Tafuna, Vo-Tech, Samoana ma Fagaitua.

 

O le mataupu lea na alia’e mai i fanau aoga mai le aoga maualuga i Fagaitua ina ua tu’uaia i le umiaina o fualaau fa’asaina, na mafua ai loa ona valaauina e le maota maualuga lenei iloiloga, ae na saunoa Le’i e fa’apea, ua mae’a ona faia le su’esu’ega e uiga i lenei mataupu, ma ua tu’uina atu le ripoti i luga o le Ofisa o le Loia Sili.

 

Sa fa’amaonia e le Komesina o Leoleo i luma o afioga i Senatoa, e to’afitu fanau aoga ua fa’amaonia le a’afia i le mataupu e pei ona tula’i mai i le aoga i Fagaitua.

 

Na fesili le afioga i le ali’i senatoa ia Magalei Logovi’i i puleaoga pe o a’afia uma aoga maualuluga i Tutuila i le fa’afitauli lenei, lea fo’i na ta’utino susuga i Puleaoga, o loo a’afia uma a latou aoga i le fa’afitauli lenei.

 

“Afai la o lo o a’afia uma aoga maualuluga i Tutuila i lenei fa’afitauli i fualaau fa’asaina, aemaise ai o le leva o lenei fa’afitauli, o le a la se gaioiga a le Ofisa o Aoga o loo faia ina ia foia ai le fa’atupulaia pea o lenei fa’afitauli, o outou taumafai e saili i latou o loo fa’apogai mai ai fualaau fa’asaina pe na o le taumafai lava e taula’i na o fanau aoga o loo a’afia”, o le fesili lea a Magalei, ae na saunoa le Puleaoga a Tafuna ia Beauty Tuiasosopo e fa’apea, “Soo se taimi lava e tula’i mai ai fa’afitauli nei i totonu o aoga, e le gata e valaau e faiaoga matua o le tamaititi ua aafia ae toe valaau fo’i Leoleo ina ia aga’i atu mo le su’esu’eina o le mataupu”.

 

Na fa’auilavea le Komesina o Leoleo ia Le’i ma ia saunoa e fa’apea, e le sa’o le molimau a le Ofisa o Aoga fai mai e muamua valaau matua ona fa’atoa valaau ai lea o Leoleo, ae i lona talitonuga, soo se taimi e tula’i mai ai fa’afitauli fa’apenei, o Leoleo lava e tatau ona valaau e suesue le mataupu, ona fa’atoa fai mulimuli ai lea o isi gaioiga i tua atu.

 

Na taua e le afioga i le ali’i senatoa ia Tuaolo M. Fruean i lana saunoaga e fa’apea, o le isi fa’afitauli numera tasi lea ua molimauina i totonu o aoga i le atunu’u i le taimi nei, o tulaga i telefoni feavea’i, e le gata ua fa’a faigofie ai fesootaiga i le va o fanau, ae ua fa’atinoina ai fo’i isi tulaga e le tatau ona tutupu.

 

Na toe fa’atepa e Tuaolo le maota atoa ai ma molimau i le fa’afitauli sa ia maitauina ao avea o ia ma Komesina o Leoleo, i le fiu e tau fa’atulaga ni osofaiga i nofoaga o loo masalomia le maua ai o fualaau fa’asaina i vaega eseese o le atunu’u, ae taunu’u atu lava Leoleo ua leai ma se mea o i ai, e mafua mai ona o le telefoni feavea’i o loo fa’aaoga i fesootaiga.

 

O se tasi o fautuaga sa tu’uina atu e Tuaolo e fesoasoani ai i le foiaina o le fa’afitauli i fualaau fa’asaina, o le toe fa’aauau lea o le polokalame e taua o le D.A.R.E (Drug Abuse Resistance Education) sa fa’atupe mai e le Ofisa o Aoga ae fa’agaioi e le Ofisa o Leoleo i tausaga ua mavae, peita’i o se tala fa’anoanoa e pei ona saunoa le Sui Fa’atonusili o Aoga, ua lata i le 10 tausaga talu ona tapunia lea polokalame, e mafua mai ina ua tapunia le vaega tupe mai le feterale sa fa’atupeina ai.

 

Ae na saunoa le afioga i le ali’i Senatoa ia Fa’amausili Mau Jr e fa’apea, e mafua ona fa’aauau pea i totonu o setete ma teritori i Amerika le polokalame o le D.A.R.E, ona e taua tele ia Amerika le soifua puipuia ma le ola manuia o tupulaga talavou, o i latou ia e fa’alagolago i ai le manuia o le malo i le lumana’i.

 

“O le taua o polokalame fa’apena ao faia i aso a’o avea a’u ma Leoleo, e fa’aali atu e le Leoleo i le tamaititi le ata o le laau mariuana ma fesili atu i ai pe sa ia vaaia, ae tali le tamaititi ma fa’ailoa i le Leoleo, o le laau lena o loo ia vaaia le toto e lona Tama i tua i le latou fale, ona fesoasoani ai lava lea o fa’amatalaga fa’apena i le galuega a Leoleo, o le itu lena e taua ai le polokalame lea”, o le saunoaga lea a Fa’amausili.

 

Na taua e le afioga i le Maoputasi ia Mauga lona lagolagoina o le toe fa’aauau o polokalame e pei ona taua, e fesoasoani ai i fanau aoga ina ia latou silafia le leaga o lenei fa’afitauli, ae na fa’ailoa e le afiogai le ali’i senatoa ia Paepae Faiai i molimau, le matuia tele ma le mamafa o le fa’asalaga a Amerika Samoa mo soo se tasi e fa’amaonia i le umiaina o fualaau fa’asaina, o le fa’asala lea i le toese mo le umi e le itiiti ifo i le 5 tausaga.

 

I le fa’aiuga o lea iloiloga, na malilie ai le maota maualuga ma molimau a le mlao, ina ia fa’aauau pea le galulue fa’atasi i auala e foia ai le toe alia’e mai o nei fa’afitauli i le atunu’u.