O fualaau fa’asaina lea ua tu’uaia e le malo le ali’i o Marty Tanielu sa ia umia i le vaiaso na te’a nei, o lo o tu’uaia na ia fa’atauina mai i le nofoaga o lo o i ai le pisinisi o Le Aute.

E 2 moliaga mamafa o le umia fa’asolitulafono o vaega o le pauta fa’asaina o le aisa ua tu’uaia ai e le malo ia Tanielu, i le mae’a ai lea o le fa’alavelave lea na taofia ai e Leooleo lana ta’avale i Tafuna i le vaiaso na te’a nei, e mafua mai i se poloaiga mai le Fa’amasinoga Fa’aitumalo e pu’e fa’apagota mai ai o ia, ona o lona le auai i ana iloiloga e 2 sa fa’atulaga e le Fa’amasinoga.

O le taeao nei lea ua fa’atulaga e toe tula’i ai Tainelu i luma o le Fa’amasinoga Fa’aitumalo, mo le fa’atulagaina o le aso e fa’ataunu’u aloaia ai loa lana ulua’i iloiloga.

E tusa ai o fa’amaumauga a Leoleo o lo o taua ai e fa’apea, i le taeao o le aso Lulu o le vaiaso na te’a nei, na vaaia ai e se Leoleo le ulufafo mai o Tanielu mai totonu o se faleoloa ma aga’i atu i le itu o lo o paka ai lana ta’avale.

Na afe le ta’avale Leoleo ma paka i tua o le ta’avale a Tanielu, ma aga’i atu ai loa le Leoleo ma fa’ailoa atu ia te ia, le poloaiga mai le Fa’amasinoga e pu’e fa’apagota atu ai o ia, e mafua mai i lona le auai i ana iloiloga e 2 ua mae’a ona valaauina. E masani lelei lava le Leoleo ia Tanielu, o le mafua’aga fo’i lea na faigofie ai ona ia iloaina o ia i luma o le faleoloa.

Ona o puipuiga i le saogalemu o Leoleo, na fa’atonuina ai loa le ua molia mo se avanoa e saili ai lona tino poo i ai ni a’upega poo nisi lava tulaga e ono a’afia ai le saogalemu o le Leoleo, ma fa’atonuina ai loa o ia e aveese uma ni mea totino o loo i totou o tago o lona ofuvae o loo laei i le taimi lea.

I le taimi na aveese ai e le ua molia meatotino mai totonu o le taga o lona ofu o lo o fai, na molimauina ai e le Leoleo se paipa e masani ona ula ai e tagata le pauta oona o le aisa. Ona o lea vaaiga, na fautuaina ai loa le ua molia e tusa ai o ona aia tatau, atoa ai ma le tatau lea ona ia fa’ailoaina atu o ni fualaau fa’asaina o loo ia te ia.

I totonu o le paipa o lo o tu’uaia sa maua ia Tanielu, sa i ai i totonu se vaega o le pauta oona o le aisa, lea na faia i ai se suega faapitoa a Leoleo ma faamaonia ai, o se vaega ia o le pauta fa’asaina o le aisa.

I totonu o le pepa sikaleti a le ua molia sa tu’uina atu i Leoleo, sa maua ai i totonu se straw ua uma ona ta tipi ona tulimanu, o lo o tumu fo’i i vaega o le pauta pa’epa’e. Sa fai e Leoleo se su’ega faapitoa i le pauta pa’epa’e lea ma faamaonia ai, o vaega ia o le pauta oona o le aisa.

Na taua e Leoleo le musu o le ua molia e faia sana fa’amatalata tusitusia e tusa ai o vaega o fualaau fa’asaina sa maua ia te ia, ae na mafai ona fesiligia ma su’esu’e e Leoleo le isi ali’i sa to’alua ma Tanielu i totonu o lana ta’avale i le taimi na taofia ai o ia e Leoleo.

Na taua e le ali’i lea i Leoleo e fa’apea, e fa’alua ona la o ma Tanielu e fa’atau mai a la fualaau fa’asaina o le aisa mai le nofoaga o Le Aute. O le taimi muamua sa la malaga ai o le po lea o le aso Lua o le vaiaso na te’a nei, aso 21 Novema pe tusa o le itula e 9:00, lea na latou malaga ai ma Tanielu ma le isi ali’i i le ta’avale a le ua molia ma latou aga’i i se auala pefu i tua i Malaeloa, le nofoaga autu o Le Aute.

Ina ua latou taunu’u i le nofoaga, sa ia vaaia le aga’i ane o ni ali’i se to’atolu ma taofi le ta’avale, ona oso lea i fafo o Tanielu ma aga’i atu i ali’i o lo o taofia le ta’avale, ma ia vaaia ai le tu’u atu e Tanielu o le tupe i ali’i ia ae aumai e ali’i ia fualaau fa’asaina ia Tanielu.

Na toe fo’i atu le ua molia i totonu o le ta’avale, ona ia tago lea ua utu le pauta o le aisa na alu atu ma ia i totonu o le paipa, ona amata ai loa lea ona latou ula fa’asolosolo ao alu le ta’avale. Ina ua mae’a, sa momoli e le ua molia o ia i lona fale.

O le taimi lona lua na la fa’atau mai ai fualaau fa’asaina mai Le Aute, o le taeao po lava o le aso Lulu lea na maua ai laua e Leoleo. Ina ua mae’a ona toso e le ua molia lana ta’avale sa pe i Faganeanea, na la aga’i atu ai loa i le nofoaga o Le Aute ma fa’atau mai ai isi pauta o le aisa.

O vaega la ia o fualaau fa’asaina sa la feoa’i ma laua i le taeao lea, ae mulimuli ai loa maua i laua e Leoleo ma taofia ai Tanielu.

E $5,000 le vaega tupe lea ua fa’atulaga e totogi ona fa’atoa mafai lea ona tatala Tanielu i tua mai le toese i Tafuna.