Ads by Google Ads by Google

Tu'ua le Malo Tofa Taeaoafua Dr Meki Solomona

Taeoafua Dr. Meki Solomona, director of the Department of Human and Social Services, passed away suddenly, yesterday afternoon. He reportedly collapsed at his DHSS office in Utulei. Samoa News sends its condolences to the family in their time of grief.  [SN archives]
Fa'atonu Sili - Matagaluega o Alagamanuia mo Tagata Lautele [DHSS]
tusia: Leua Aiono Frost

I le aoauli o le aso Gafua Tesema 11, 2017 na logona ai le leo i Rama i totonu o le faigamalo a Tutuila ma Manu'a, ua amia se tasi sa tula'i mai o se poutu toa ma o le fa'auluuluga fo'i o le Matagaluega o Alagamanuia mo Tagata Lautele o le tatou Malo fa'ateritori o Amerika Samoa, le tofa Taeaoafua Dr. Meki Solomona.

A'o le'i filifilia o ia e avea ma Fa'atonu sili o lea matagaluega mo le faigamalo a Kovana Lolo Moliga Matalasi Moliga ma le Sui Kovana Lemanu Peleti Mauga i le tausaga e 2013 seia o'o mai i lona tu'ua o le malo, sa mua'i avea o ia ma Pule o Tagata Faigaluega a le Kamupani I'a, Star Kist Samoa Inc. mo se vaitaimi umi o lona olaga galue i Amerika Samoa nei.

E ese mai lea sa avea o ia ma Fa'atonu o le Matagaluega o Fefa'ataua'iga i le faigamalo a Kovana Uifa'atali Peter Coleman ma Lt Kovana o Galea'i Poumele. I lona fa'ato'a taliu mai ua umia lona tusi pasi maualuluga na mua'i avea ma Faia'oga i le potu A'oga i Samoana High, soso'o lea ma le avea ma Pule Lua i Samoana High, ae tomuli ai ina ua tofia e avea ma Pule A'oga i le Laumua lava i Samoana.

Sa avea fo'i o ia ma Sui Tauva mo le tofi Lutena Kovana i le la'ua paga ma le afioga le Aloali'i Afoa Moega Lutu i le palotaga o le 2004, o se tauvaga fo'i sa iloga le malosi o le la'ua taumafaiga. "O se suli e iloga lona soifua finau, ma e finau fo'i i mea e lelei ai le atunu'u ma ona tagata, e iloga i lana tautua mai pisinisi tumaoti e o'o lava i lona malo. Ua misia e Amerika Samoa se tasi o ona atali'i e alofa moni i lona malo ma ona tagata." O se talifuaitau lea a le afioga le Aloali'i  ina ua fesiligia i sona taofi, e tusa o lona iloa lelei o Taeafua Dr Meki Solomona.

O ia o se alo e fa'asino i le susuga le Fa'afeagaiga Taulagi a le LMS lea ua lauiloa nei o le EFKAS, Rev. Si'ulagi Solomona ma le faletua o Fuarosa To'alepai - Solomona. O ia na soifua a'e i Papua Niu Kini i le malo na fa'amisionare ai ona matua, i le tala'iga o le Talalelei.

Ua fa'aipoipo o ia i le tama'ita'i o Vaofu'aomalo Soliai Solomona o Nuuuli ma e to'atasi lava lo la'ua alo tama'ita'i o Katerina Keli'iaione Solomona, lea ua toe maua ai fanau a lana fanau e to'alua.

Na fa'asuafa matai o ia e lona Aiga Sa Faiivae i Leone i lona suafa Tulafale o "Taeaofua" ma ua iloga ai lana tautua i aiga, nu'u, EFKAS i Leone ma le itumalo. E i ai fo'i ona tofi sa galue ai i totonu o lana lea ekalesia i Leone lava, o le Tiakono, ae sa failautusi fo'i i lana lea ekalesia i nisi vaitausaga  a'o se tasi e mau fa'atuatuaina i so'o se mea e auai ai o se totino.

O ana a'oa'oga na amatalia lava i Fagatogo Elementary ma Fiailoa Jr High i Utulei. Ona tu'ua lea e ia lona malo ae malaga e saili lona tusi pasi Tipiloma i le Carson High School i Kalefonia.

Ona soso'o lea ma lona taumafai i le Kolsi i Kalefonia lava mo lona fa'ailoga o le Bachelor of Science in Pre-Law i le UNiversity of California i Riverside. Ina ua mae'a lea sa ia sailia lona fa'ailoga Masters ma le fa'ailoga Doctrate i le Bringham Young University i Provo, Utah.

Fa'afetai Taeaoafua mo lou sao i alo o Amerika Samoa e ala i lou avea ma se faia'oga. E le galo au galuega lelei, ma e fa'afetaia lau auaunaga e lou malo ma ona tagatanu'u.