E ui e le fou i le fa’afofoga a le atunu’u ma ona ta’ita’i le mataupu e fa’atatau i le totogi amata i totonu o le teritori, peita’i o finagalo na mafai ona fetufaa’i e sui o le Fono Faitulafono ma le Faipule a le atunu’u i le laumua i Uosigitone i le 2 vaiaso talu ai, na atagia mai ai le tutusa o latou finagalo i le tulaga tonu e ao ona taoto i ai lenei mataupu, o le tu’u mai lea e iloilo e Amerika Samoa le tulaga tonu e tatau ona i ai le totogi amata i le atunu’u, ina ia mafai ona fuafua i le tulaga o loo i ai le malosi o lona tamaoaiga.

Mai le tele o mataupu na mafai ona fa’asoa e le afioga a Aumua i luma o le Fono Faitulafono, o se tasi o mataupu sa tele i ai lana saunoaga, o le mataupu lea e fa’atatau i totogi amata i Amerika Samoa.

E le tau fa’amatalaina a’afiaga ua fetaia’i nei ma le malo talu ona fa’amalosia i Amerika Samoa le tulafono e si’i ai totogi amata i soo se galuega i le atunu’u e pei ona saunoa Aumua, e le gata ua tapunia ai ni isi o galuega e aofia ai le kamupani a tu’uapa o le Chicken of the Sea (COS) poo le Samoa Packing e pei ona iloa ai e le to’atele, ae ua tula’i mai ai fo’i tulaga fa’aitiitia i ni isi o galuega.

Saunoa atili Aumua e fa’apea, o le tapunia ai o le COS i le tausaga e 2009 e mafua mai ina ua sii totogi amata, na atagia mai ai tulaga ma’ale’ale sa i ai le tamaoaiga o le malo i lena vaitau, lea lava o loo fa’aauau mai pea lava seia oo mai i le taimi nei.

“E ui o se fa’amoemoe lelei le fuafuaga ina ia sii totogi amata ona o le manatu alofa i tagata faigaluega ina ia lelei totogi, ae ua avea lea ma itu ua afaina ai le tamaoaiga o le malo, ma ua mana’omia ai se auala tumau e foia ai lea tulaga”, o le saunoaga lea a Aumua.

Na taua e ni isi o senatoa ma faipule na maua le avanoa e fa’asoa ai i lenei mataupu e fa’apea, o se tasi o itu na fesoasoani malosi ai i le tapunia o le COS i le 2009, fa’apea ai ma le lala o le kamupani tu’u apa fou o le Tri Marine lea na tapunia i le fa’aiuga o le tausaga na te’a nei, le Samoa Tuna Processors (STP), o le tulaga fa’aletonu i va’a fagota e aga’i mai ma i’a e fa’atau mai i le kamupani, ina ua suia tulafono tau faiga faiva i ogasami o le Pasefika ma isi vaega o le lalolagi.

“Tatou te fiu lava e saili se auala e fesoasoani ai i le tamaoaiga o le atunu’u ma nai o tatou tagata, ae afai e tumau pea tulafono nei e le mafai ona suia, o le a fa’aauau pea fo’i ona tumau nei fa’afitauli e le o ese ma Amerika Samoa”, o le saunoaga lea a le afioga i le ali’i faipule ia Vesi Talalelei Fautanu Jr.

Na taua e Vesi lona lagolagoina o fuafuaga uma a Aumua o loo fa’agasolo i le taimi nei, e ala i le talosaga lea i le Konekeresi a le malo tele e tu’u mai le mataupu o le totogi amata a Amerika Samoa e taulima lava e ona tagata, ina ia mafai ai ona fuafua siitaga i le malosi o loo i ai le tamaoaiga o le malo.

Saunoa le afioga i le ali’i senatoa ia Tuiagamoa Tavai e fa’apea, e leai lava se tagata faigaluega e le mana’o e si’i sona totogi i luga, e oo lava fo’i i le malo ma ona ta’ita’i, o le lagona lava fo’i lea o loo nonofo ma i latou, ia manuia le malo manuia atu ai ma tagata uma o le atunu’u, peita’i i lona talitonuga, e le mafai ona taumafai le isi itu e fa’aleleia le isi itu ae afaina ai le isi itu.

“E le talafeagai le taumafai e si’i maualuga totogi o tagata ae fa’aletonu ai le tamaoaiga o le malo ma tapunia ai kamupani ma pisinisi o loo ola ai le malo, e le sa’o lea tulaga, ae taua le maualuga o totogi toe ola lelei ma pisinisi ma malosi le tamaoaiga o le malo, ona tula’i mai ai loa lea o le tamaoaiga o le atunu’u i se tulaga manuia”, o le saunoaga lea a Tuiagamoa ma ia taua ai lona lagolagoina o fuafuaga a Aumua, ina ia talosaga i le malo tele e taoto mai pea le iloiloina o le totogi amata e fa’atino e tagata Amerika Samoa, e pei ona sau ai i tausaga ua mavae.

Saunoa atili Tuiagamoa e fa’apea, o le isi fa’afitauli lea ua maitauina i le taimi nei, ua tu leai ni va’a fagota e aga’i mai ma i’a e fa’atau mai i kamupani tu’uapa, ma e le iloa pe mafua aisea lea tulaga, ae o ripoti ua ia maua fai mai ua tau leai ni i’a i ogasami o loo fagogota ai va’a fagota nei, e le gata i lea, ua tapunia isi ogasami sa tele le i’a sa maua mai ai.

“O le fautuaga i lau afioga i le faipule i Uosigitone, silasila toto’a i le isi mataupu lea i tulaga o faiga faiva, e le aoga fo’i le naunau atu o le malo e fa’aleleia kamupani i’a ae a leai ni va’a fagota e aga’i mai la’u mai le i’a, o le a atili lava ona pagatia le tamaoaiga o le atunu’u”, o le isi lea saunoaga a Tuiagamoa.

Na fa’amanino e le afioga i le ali’i faipule ia Kitara Vaiau e fa’apea, o se tasi o itu e mafai ona fesoasoani ai i le atina’e ma le tamaoaiga o le malo, o le vaavaai lea i isi ituaiga pisinisi mai fafo e mafai ona fa’atutu o latou lala i Amerika Samoa, e ese mai i kamupani i’a, ina ia mafai ai ona maua galuega fa’aopoopo mo tagatanu’u ma tele ai tupe maua mo le malo.

Na taua e Vaiau lona lagolagoina o fuafuaga a Aumua o loo faia ina ia mafai ai ona toe tu’uina mai le iloiloina o totogi amata e taulima lava e Amerika Samoa, ina ia mautinoa e le toe tula’i mai tulaga ma’ale’ale e pei o le tapunia o ni isi kamupani ma pisinisi tetele i totonu o le atunu’u i le lumana’i.