O le isi fonotaga a ni isi o le aufai fa’atoaga a le atunu’u ma le Fa’atonusili o le Matagaluega o Faatoaga a le malo i le taeao ananafi, na molimauina ai le tumau pea lea o le tele o fa’asea mai le mamalu o le aufai fa’atoaga e le o mafai lava ona maua i ai se tali i le taimi nei.

O ni isi o ia fa’afitauli e aofia ai le maua e tagata e le o i ai ni a latou fa’atoaga o tauofoga o fua o fa’aeleeleaga o loo fa’atau atu i le polokalame o le School Lunch, atoa ai ma le ave uma e le Asosi a le Aufai Fa’atoaga o pauna o fua o fa’aeleeleaga o loo fa’atau atu i le School Lunch, ae pagatia ai le to’atele o le aufai fa’atoaga e le maua ni a latou pauna.

Ona o le tele o nei mau fa’afitauli o loo fa’aauau pea ona fetaia’i ma le aufai fa’atoaga a le atunu’u, ua latou toe talosagaina ai le Ofisa o Fa’atoaga a le malo, tauala atu i le latou Fa’atonusili fou ua i ai nei ia Filifa’atali Mike Fuiava, mo se avanoa e toe fa’afo’i mai ai le fa’atautaiga o le polokalame o le School Lunch e fa’asoasoa e le Ofisa o Fa’atoaga, ina ia mautinoa e fa’amanuiaina uma le aufai fa’atoaga a le atunu’u, ae le na o se vaega to’aitiiti e pei ona fa’amanuiaina i le suiga lea ua fa’afoe mai ai e le Ofisa e Pulea Oloa a le malo tauofoga mo le polokalame a le School Lunch.

Na fa’aalia e se vaega to’atele o le aufai fa’atoaga e fa’apea, o le isi fa’afitauli lea ua latou maitauina i le taimi nei, o le mae’a lea ona latou maua o se tusi fa’amaonia mai le Ofisa e Pulea Oloa a le malo e fa’ailoa mai ai le fa’amanuiaina o a latou tauofoga talu mai le tausaga na te’a nei, ae oo mai lava i le taimi nei o loo latou fa’atali pea lava i le taimi e la’u atu ai fua o a latou fa’atoaga e fa’atau i le School Lunch.

“Talu ai ua ou fiu e fa’atali se taimi e la’u ai a’u taro ma fa’i e fa’atau i le School Lunch, na ou alu ai loa ma saili se isi auala e mafai ai ona fa’atau fua o la’u fa’atoaga ina ia maua ai se tupe, ma talia ai la’u taro e fa’atau i se tasi o faleoloa i Nu’uuli, peita’i o le fa’afitauli tele o loo tula’i mai, e laititi lava pauna o a’u taro o loo mafai ona fa’atau i le faleoloa lea, ona o loo ave uma e pauna o taro mai Samoa”, o le saunoaga lea a se tasi o Tama fai fa’atoaga.

O le isi fa’afitauli na mafai ona fa’aleo i le taimi o le fonotaga, o pauna o fa’i o loo tufatufa atu i le aufai fa’atoaga.

Na taua e se tasi o Tina fai fa’atoaga e fa’apea, o le fa’afitauli lea o loo tula’i mai i pauna fa’i, ua ave uma e le Asosi a le Aufai Faatoaga le tele o pauna fa’i o loo maua mai i le School Lunch, o isi ua oo atu i le ta’i 1,000 pauna fa’i o loo mafai ona la’u ma fa’atau atu i le School Lunch, ae na o le ta’i 200 e oo atu i le tai 600 pauna o loo maua e ni isi o le aufai fa’atoaga.

Ae na taua e le isi Tina fai fa’atoaga e fa’apea, ina ua alu e talosaga i le Asosi a le aufai fa’atoaga mo ni ana pauna fa’i, sa fa’ailoa ane e le Asosi ia te ia ua mae’a ona fa’asoasoa pauna fa’i, ae ina ua ia fa’atalosaga pea i ai mo sina pauna fa’i mo ia, na maua mai ai loa na o pauna e 200, lea na ia foa’i ma lona Tama (o ia fo’i o le isi fai fa’atoaga), ona ua leai ni pauna fa’i a si ona Tama na maua atu, ae o le aso na o ai e fua pauna fa’i a lona Tama i le School Lunch, na latou maua ai o le isi ta’avale sa muamua atu i o latou luma e 2,000 pauna fa’i sa mafai ona fua mai ai.

Na talosagaina e le aufai fa’atoaga le afioga a Filifa’atali mo se avanoa e toe fa’afo’i atu ai le fa’asoasoaina o pauna mo le polokalame a le School Lunch i le Ofisa o Fa’atoaga, ina ia mautinoa e sa’o ma fa’amaoni le auala o lo o fa’atinoina.

I le fa’aiuga o le fonotaga, na fautuaina ai e Filifa’atali le aufai fa’atoaga ina ia faia sa latou fonotaga ma le Asosi a le Aufai Fa’atoaga, mo le sailiina lea o se fofo o le fa’afitauli o loo tula’i mai.

E leai ma se sui o le Komiti Fa’afoe o le Asosi a le Aufai Fa’atoaga sa i ai i le fonotaga ananafi, e ui ua mae’a ona fa’ailoa i ai le fonotaga, se’i vagana ai lava ni isi o totino o le Asosi sa auai i le fonotaga.