Ads by Google Ads by Google

Tulaga lelei tupe LBJ Kuata muamua tausaga tupe lenei

ausage@samoanews.com

Na taua e le Teutupe a le Falema’i o le LBJ i Fagaalu i le fonotaga a le Kapeneta sa faia i le 2 vaiaso talu ai, le aga’i pea i luma o le tulaga lelei ua i ai teugatupe a le falema’i a le atunu’u i le taimi nei, fa’atusatusa i ni isi o tausaga ua mavae sa alia’e mai ai tulaga fa’aletonu.

 

“E ui e le o iloga tele ona tulaga malosi mai le itu tau tupe, peitai o le mea moni lava ia, ua tele le suiga o le tulaga lea ua i ai tupe a le falema’i i le taimi nei, talu mai le silia i le 3 tausaga talu ai ina ua fa’atoa ou ulufale mai i lenei galuega”, o le saunoaga lea a le Teutupe a le LBJ ia Pauline Gebauer i luma o le Kapeneta.

 

Ina ua fesiligia le teutupe a le falema’i i le tualga o lo o i ai aitalafu a le falema’i, na taua ai e Gebauer le fa’aauau pea lea ona totogi pili ma aitalafu a le falema’i, ma o lo o sologa lelei lava le auala o lo o fa’aaoga e totogi atu ai aitalafu.

 

“O le agaga fa’afetai i le Ofisa a le Medicaid faapea ai le Komiti Faafoe a le ASEDA, ona o isi ia vaega o lo o fesoasoani malosi i le pito laau a le falema’i, ae o le tulaga o aitalafu ma pili a le falema’i, o lo o fa’aauau pea ona totogi ma o lo o ausia lava fo’i taimi fa’atapula’a e tatau ai ona totogi pili a le falema’i”, o le saunoaga lea a le tama’ita’i teutupe.

 

O ni isi o auala na taua e Gebauer o lo o maua mai ai tupe a le falema’i e fa’atino ai lana tautua, e le gata o tupe o lo o totogi e le atunu’u i le taimi e fa’aaogaina ai le atutua a le falema’i, ae o lo o maua mai fo’i i pili o lo o ao mai i aitalafu a le atunu’u, fa’apea ai ma isi vaega tupe o lo o fesoasoani mai ai le malo.

 

“O le taimi nei ua mafai ona matou vaavaai i nai vaega tupe itiiti ua mafai ona teu ma fa’aagaga mo isi manaoga a le falema’i, ma o lo o matou galulue malosi pea e fa’atino auala uma ina ia mafai ai ona maua mai pea vaega tupe e fesoasoani i le fa’atinoina o la matou pito laau i le atunu’u”, o le saunoaga lea Gebauer.

 

Na fa’afetaia e le afioga i le ali’i kovana ia Lolo Matalasi Moliga le teutupe a le falema’i e tusa ai o le latou tautua fa’aaua pea i le atunu’u, aemaise ai o le galulue malosi e saili auala uma e foia ai lu’itau tau tupe o lo o a’afia ai le tautua a le falema’i i le tele o taimi.

 

Saunoa Lolo e fa’apea, tusa lava poo a faafitauli tau tupe e fetaia’i ma isi vaega o le malo, e le mafai ona foia pe afai e le galulue fa’atasi le malo atoa e faia gaioiga e maua ai tali o ia faafitauli, e pei o le galulue faatasi o le Fono Faitulafono, Faamasinoga faapea ai ma le Vaega Fa’amalosi Tulafono.