Ads by Google Ads by Google

Tulaga ese le ulua’i Fa’aaliga a le Aufai Faiva a le atunu’u

Le afioga i le matua ia Utu ma se tasi o tamali’i o le atunu’u i le taimi o le fa’aaliga a le aufai faiva a le atunu’u i le fa’aiuga o le vaiaso na te’a nei.  [ata AF]
ausage@samoanews.com

Na tulaga ese le ulua’i Fa’aaliga a le Aufai Faiva a le atunu’u i le fa’aiuga o le vaiaso na te’a nei, ina ua molimauina e le to’atele o le atunu’u na lolofi atu latou te molimauina lenei polokalame le mataina o ituaiga i’a eseese na mafai ona maua e le aufai faiva mai a latou fagotaga.

 

Ae o le itu e pito sili ona mataina ai lenei polokalame e pei ona saunoa le Fa’atonusili o le Ofisa o le Puipuiga o le Vaomatua ma le Gataifale ia Ruth Matagi-Tofiga, o le auai mai ai o sui o le aufai faiva mai Manu’a, e pei ona i ai le tofa a Fuega Saite Moliga.

 

E lei malamalama lelei le taeao o le aso To’ona’i na te’a nei, ae ua fa’atumulia le nofoaga o le maketi fou i Fagatogo i le to’atele o le mamalu lautele o le atunu’u, na lolofi atu latou te fia molimauina galuega a le aufai faiva a le atunu’u.

 

O le to’atele o le atunu’u na muamua taunu’u i le vaega sa fa’atinoina ai le fa’aaliga, o i latou ia na fa’atauina le tele o i’a sa mafai ona fa’alauiloa e le aufai faiva a le atunu’u.

 

Na taua e le susuga a Mareko Lelevaga, o se ali’i fai faiva mai Tafuna e fa’apea, o le taua o le polokalame lenei ua fa’atinoina e le malo, o le a mafai ai ona maua le avanoa o tagata fai faiva e o mai fa’atasi ai ma fa’alauiloa a latou.

 

“O le taua o lenei fa’amoemoe, e le gata e maua ai nai vaega tupe mo i matou le aufai faiva, ae maua ai fo’i e le atunu’u le atunu’u latou te fa’atauina ai i’a lelei i se tau taugofie mai le aufai faiva a le atunu’u”, o le saunoaga lea a le Tina o Carol Mauga, o se faletua lea o se tasi o ali’i fai faiva.

 

Na fa’afetaia e le tama’ita’i fa’atonu ia Ruth Matagi-Tofiga le mamalu o le aufai faiva ina ua mafai ona latou tali mai i le polokalame sa fa’atula’i mo i latou i lenei tausaga.

 

“Ou te iloa o le ulua’i fa’aaliga lea a le aufai fa’atoaga a le atunu’u, ma afai ae manuia, o le a toe vaavaai le Ofisa mo le fa’atinoina o le vaega lona lua o le polokalame, ma fa’aauau atu ai lava i masina ta’itasi lenei fa’amoemoe”, o le saunoaga lea a Ruth.

 

Sa ia taua fo’i lona agaga fiafia ina ua mafai ona auai mai se sui o le aufai faiva mai Manu’a, e pei ona i ai le tofa a Fuega.

 

“O le taua tonu lava lea o le polokalame, e le gata e fa’amalosia ai le aufai faiva ina ia aga’i mai e auai i polokalame fa’apenei, ae mafai ai fo’i ona tele fa’amaumauga e fa’atatau i i’a maua ma tulaga o faiga faiva, ina ia fesoasoani ai i le tu’uina mai o ni fesoasoani mai le malo feterale e tusa ai o tulaga fa’a faiga faiva”, o le saunoaga lea a Ruth