Ads by Google Ads by Google

Tulafono su’e ai tagata faigaluega malo ‘ava malosi ma fualaau faasaina

ausage@samoanews.com

Ua i luma nei o le maota maualuga a le Senate i le Fono Faitulafono se pili mo se tulafono tau fa’aofi, e faia ai suega mo tagata faigaluega uma a le malo po o latou fa’aaogaina fualaau fa’asaina e aofia ai ma le ‘ava oona.

 

Afai ae pasia e le fono faitulafono le Mataupu 5 lea ua fa’avaeina nei (7.0501 - 7.0515) ma sainia e le kovana, o le a fa’atinoina loa suega mo tagata faigaluega uma a le malo, e aofia ai i latou e talosaga mo ni galuega, alii mautofi palotaina, faapea ai i latou uma o lo o i lalo o tofiga a le kovana e aofia ai i latou o loo galulue faakonekarate.

 

I le faatomuga o lenei tulafono taufa’aofi, o lo o taua mai ai le fatuaiga tausi a le malo o Amerika Samoa, o le puipuia lea o le saogalemu a ona tagata, atoa ai ma le mautinoa lelei lea o le malu puipuia o lo latou soifua maloloina ma le soifua manuia o ana tagata faigaluega, i nofoaga taitasi o loo galulue ai i latou i soo se taimi.

 

E pei ona manino i le saunoaga a le afioga i le ali’i kovana ia Lolo Matalasi Moliga i se taimi ua mavae, ua maitauina le to’atele o i latou ua latou soona fa’aaoga ma le le tusa fualaau fa’asaina faapea ai ma le ‘ava malosi.

 

Poo fea lava e soona fa’aaoga ai le ‘ava malosi ma fualaau fa’asaina, e mafai lava ona afaina ai le to’atele o tagata, e le gata i tagata faigaluega ae aofia ai fo’i i latou e ana galuega o lo o galulue ai le atunu’u.

 

O aafiaga e oo ia i latou e fa’aaogaina fualaau fa’asaina, e le gata o le a afaina ai auala latou te fa’atinoina ai galuega, tele le tia’i galuega, ae faapea ai fo’i ma le taugata o le tausiaina i latou i le falema’i, o le mafua’aga lena ua a’e ai se finagalo i le Kovana ma ta’ita’i o le malo, ia galulue fa’atasi vaega uma o le malo e saili auala e foia ai lenei fa’afitauli, ma ia faavae se tulafono e toe fuata’i ai tagata faigaluega o lo o a’afia ai.

 

O le mafua’aga autu o le fa’avaeina o le mataupu fou lenei o le tulafono, ina ia mafai ai e le malo o Amerika Samoa ona faatino lana fatuaiga tausi, o le puipuia lea o le ola manuia ma nofoaga o lo o fa’atino ai galuega a tagata faigaluega, mai le fa’aaoga faaletatau o fualaau fa’asaina ma le ‘ava malosi.

 

E le faatagaina tagata faigaluega ona latou aga’i atu i fale faigaluega pe afai o aafia i latou i le ‘ava malosi poo fualaau fa’asaina.

 

Afai e te aga’i atu i le galuega ae o lo o i ai lou tino se vaega o le ‘ava malosi e i le va o le 0.02% e oo atu i le 0.04%, o le a faia loa se suega i lou tino.

 

O tagata fou uma e talosaga mo avanoa faigaluega a le malo, e muamua faia suega i lo latou tino ina ia faamaonia ai latou te le o fa’aaogaina le ‘ava malosi poo fualaau fa’asaina, ae lumana’i ai le filifilia o i latou i avanoa faigaluega.

 

Afai e musu le tagata talosaga e faia lana suega, ae saili ane sa aafia i solitulafono e fesootai ma le faaaogaina o le ava malosi poo fualaau fa’asaina, o le a le filifilia o ia mo le galuega.

 

O le a mafai ona faia se suega i se tagata faigaluega, pe afai e vaaia ni amioga e ono masalomia ai o ia, ae o ia amioga e le masani ai o ia i le tele o taimi faigaluega.

 

O suega e fa’amaonia ai poo tagofia le ‘ava malosi poo fualaau fa’asaina, o le a fa’atinoina i taimi eseese, ae mafai fo’i ona sili atu i le fa’atasi ona faia lea suega. O fa’aiuga o suega uma nei o le a tu’uina atu i le tagata faigaluega e ana le suega, e mafai fo’i ona fesootai o ia i se loia fautua e tusa ai o fa’aiuga o ana suega.

 

O lenei tulafono na faaulufaleina e afioga i ali’i senatoa ia Paepae Faiai ma Nuanuaolefeagaiga S. Nua.