Tulafono fa’avae ai tulafono o Tausima’i i Amerika Samoa


Le Peresetene o le Asosi o Tausima’i i Amerika Samoa ia Tofiga Tufele, le afioga i le Kovana ia Lolo Matalasi Moliga ma ni isi o Tausima’i a le atunu’u i le latou ata sa pu’e i le fa’amanatuina o le atoaga o le 100 tausaga o le tautua a Tausima’i i Amerika Samoa i le tausaga na te’a nei. [ata AF]
ausage@samoanews.com

Ua i luma nei o le maota o sui o le Fono Faitulafono se tulafono ua fa’aulutalaina, o se pili e fa’avae ai le tulafono o tausima’i a Amerika Samoa, ma fa’ailoa ai a latou matafaioi fa’atino i lalo o le tulafono.

 

O le vaiaso na te’a nei na fa’ataunu’uina ai se iloiloga i luma o le Komiti o le Soifua Maloloina a le maota o sui, i lalo o le ta’ita’iga a le afioga i le Ta’ita’ifono ia Vesi Talalelei Fautanu Jr, lea fo’i na molimau ai sui o le Asosi o Tausima’i i le atunu’u i le taua o le pili.

 

Na taua e sui o le Asosi o Tausima’i i luma o le maota o sui e fa’apea, o se tasi o itu taua ua naunau ai le Asosi ina ia fa’atulafono loa galuega fa’atino a Tausima’i i Amerika Samoa ma aloaia ai loa le fa’avaeina o le Sosaiete, ona o le naunau lava ina ia unaia fanau a le atunu’u e avea i latou ma Tausima’i.

 

“Afai tou te molimauina suiga ua i ai le tautua a Tausima’i i Amerika Samoa i le taimi nei, ua matua fefiloi lava tagata ua latou fa’atinoina lenei tautua, ua to’atele naua tagata mai le atunu’u o Filipaina ua latou fa’atinoina lenei tautua i Amerika Samoa, e mafua mai i le to’alaiti o fanau a le atunu’u e fiafia e fa’atino lenei tautua, o le taua la lena o le fa’avae o le Sosaiete a Tausima’i, ina ia mafai ona matou galulue e fa’amalosi fanau aoga a le atunu’u e ave mataupu fa’a tausima’i”, o se vaega lea o le molimau a le Peresetene o le Asosi o Tausima’i ia Tofiga Tufele i luma o le komiti a le maota o sui.

 

Na taua atili e Tofiga e fa’apea, o lo o i ai lava fanau aoga o loo naunau e ave le matata fa’a tausima’i, peita’i o le fa’afitauli o lo o tula’i mai e le o toatele i latou e naunau i lea matata.

 

E le gata i galuega fa’a tausima’i ae oo lava fo’i i galuega fa’a foma’i, ua maitauina le tau leai o ni fanau a le atunu’u e fiafia e galulue i lenei galuega.

 

Na taua e ni isi o afioga i Faipule i le taimi o le iloiloga le taua tele o lenei tulafono, lea o le a mafai ai ona fa’amalosia le tautua a tausima’i i totonu o le atunu’u.

 

O ni isi o tiute tauave a le Asosi o Tausima’i i Amerika Samoa pe afai ae pasia lenei tulafono, e le gata o le vaavaai lea i le auala e fa’aleleia ai aoaoga ma tomai mo Tausima’i, ae o le faia fo’i lea o auala ina ia fa’alautele ai le tomai o Tausima’i i soo se auaunaga, e aofia ai le fa’amalosia o le Fa’alaiseneina o Tausima’i e ala i suega talafeagai e tatau ona su’eina.

 

O le mae’a ai o le iloiloga sa faia a le komiti o le Soifua Maloloina a le maota o sui,  na atagia mai ai ni isi o vaega laiti e tatau ona fa’aleleia, ina ia mautinoa e sao le pili ma pasia.

 

Na valaauina e le komiti o le soifua maloloina le loia a le Fono Faitulafono ia Nathaniel Savali, mo le fa’amaninoina o ni isi o vaega taua atoa ai ma suiga laiti ina ia fa’amalosia atili ai le gagana o le tulafono.

 

Na taua e le alii loia ia Savali e fa’apea, o le tulafono lenei na fa’aulufale i le tausaga e 1992 peita’i na teena e le Fono Faitulafono i lea tausaga, ona toe fa’aulufale mai fo’i lea i isi nofoaiga i luma mai e aofia ai ma le fa’aiuga o le tausaga na te’a nei, peita’i sa le’i fa’amanuiaina.

 

Na taua e le afioga ia Vesi e faapea, o le faafitauli lea ua molimauina i le taimi nei, o le to’atele o fanau aoga ua saili galuega i fafo mo le manuia o aiga, e mafua mai i le fa’aletonu o totogi o loo maua e tausima’i i le atunu’u, ae afai e pasia lenei tulafono, e le gata o le a siitia tulaga tau tomai ma aoaoga, ae o le a si’itia ai fo’i ma totogi mo tausima’i, ma to’atele ai pea fanau a le atunu’u e galulue i le falema’i, nai lo le tau fai aga’i uma i fafo ae ulufale mai ai tagatanu’u eseese ma galulue i le falema’i a le atunu’u.

Comment Here