Na fa’ataua e le afioga i le Ao Mamalu o le malo Tuto’atasi o Samoa, afioga Tui Atua Tupua Tamasese Efi i lana saunoaga fa’apitoa, mo le fa’amanatuina o le atoaga o le 117 tausaga o le fu’a a Amerika Samoa i lenei tausaga, le fa’alagolago lea o le ola manuia o tupulaga talavou pe afai latou te fa’amuamua le Atua ma ‘ava i matua.

Na fa’aaoga e le afioga Tui Atua le gagana mamao tua a le atunu’u e fa’aleo ai le feau fa’apitoa mo tupulaga talavou i lenei tausaga, e tusa ai o anatau ua faaautu i ai e le malo le fu’a o lenei tausaga, “O Tupulaga mo a Taeao”.

Na mua’i fa’afetaia e Tui Atua le afioga i le ali’i kovana ia Lolo Matalasi Moliga ma le malo o Amerika Samoa, ina ua valaaulia fa’apitoa o ia na te saunia se feau fa’apitoa o lana sisigafu’a o lenei tausaga.

“E fa’afetai atu mo le fa’aaloalo maualuga Amerika Samoa, e seasea tupu se tulaga faapea i aso faapitoa fa’apenei i le tele o malo, o le lauga o le ta’ita’i o le isi malo i le fa’amanatuina o le fu’a a le isi malo, ae ua mafua ona tula’i mai lea tulaga, ona o le talitonuga o i tatou o le aiga e tasi, e tasi lo ta fa’asinomaga, e tasi lo ta Tama, e tasi lo ta Tina, e tasi lo ta aganu’u, tu ma agaifanua, e tasi fo’i la ta gagana, o le gagana Samoa lea”, o se vaega lea o le malelega a Tui Atua.

O siitaga mai le Tusi Paia atoa ai ma muagagana a Samoa mai aso ua mavae, o ni isi ia o siitaga na fa’aaoga e Tui Atua e fa’afelanulanua’i ai lana saunoaga ao se feau taua e fa’apitoa mo tupulaga talavou a le atunu’u.

“Tupulaga e o le atunu’u, fai mai le isi talitonuga ua masani ai le atunu’u, o Samoa o le ao mamala, e mafua lea tulaga ona ua mae’a ona tu’uina mai e le Atua ana fa’amanuiaga i tuaa ma matua, o i latou ia sa a’oa’oina tupulaga o aso ua mavae ina ia ‘ava ma iloa le va feagai o matua ma fanau, ma afai e i ai se taimi e fa’atamala ai tupulaga e aloaia ia fautuaga, ona malaia lea o latou olaga, o le mafua’aga lena na a’e ai le manatu, o Samoa e mamala lona atunu’u, e mamana upu a ona tuaa”, o se vaega lea o le malelega a Tui Atua.

“Fai mai le tusi o Salamo 137:5-6, Ierusalema e, afai e galo oe ia te a’u, ia galo lava i lo’u lima taumatau, afai ou te le manatuaina oe, ia pipi’i a’e lo’u laulaufaiva. O le fesili mo oe tupulaga e, o ai Ierusalema, o la’u tali, o Ierusalema e pei ona taua e le fai Salamo, o le nu’u, o Ierusalema o le tofi, o Ierusalema fo’i o le laueleele, o le tala fa’asolopito, o le gagana, o le gagana lea fai mai le Tusi Paia afai e galo, ia galo i le lima taumatau”.

“E pei lava fa’amanuiaga sa ave e le Atua i atunu’u eseese o le lalolagi e pei ona i ai a latou gagana e fesootai ai, o fa’amanuiaga ua tuuina atu e matua i taupulaga. E le mafai ona manuia fanau pe afai e le fa’alagolago i aoaoga a matua o loo fa’avae i le Atua, e pei fo’i o le Atua o loo fia mafuta atu i atunu’u eseese ma a latou gagana sa ia fa’amanuia atu i ai, e fa’apena fo’i ia Samoa, e fia mafuta le Atua i tagata Samoa ma lana gagana sa fa’amanuia atu i ai. Afai fo’i e mafuta fa’atasi atu tupulaga i matua ae fa’avae i le Atua, ona molimauina lea o fa’amanuiaga mo le atunu’u”.

“O le mafua’aga lena ua faigofie ai atina’e i soo se faigamalo i le taimi nei, ina ua tofu lava le atunu’u ma le gagana, ae fesoota’i ai i le gagana lautele ua to’atele tupulaga ua lauiloa ai”.

O se tasi o mataupu na fa’amamafa e Tui Atua i lana malelega, o le va tapui o tupulaga ma matua, lea o loo fa’aigoaina o le tuaoi.

Sa ia taua e fa’apea, afai e iloa e tupulaga le laina e gata ai le tuaoi i le va o matua ma fanau, ona taunu’u lea o lo latou olaga i le manuia, ae afai loa e sopo tuaoi tupulaga ma latou teena fautuaga ma aoaoga mai matua, ona atagia mai ai loa lea o lo latou loto fa’amaualuga ma le le mana’o e talia se fautuaga mai matua.

“O le mala au matua, e mafua mai i le fetuu a le matua, ae o le manuia e maua mai i le aoao atu a matua, lona uiga o le mala au matua, e mafua mai ina ua le fa’alogo fanau ma tupulaga talavou i matua, aua o matua na tofi e le Atua e a’oa’o ma fa’afailele fanau, o le mafua’aga fo’i lena e taua ai la latou sao i le lumana’i manuia o tupulaga talavou”, o le saunoaga lea a Tui Atua.

“O le fautuaga i tupulaga talavou, aua tatou te sopo tuaoi, ae o le fautuaga matua, ia a’oa’o tupulaga talavou fa’avae i le Tusi Paia, ae o le o mea fa’afiafia e pei o telefoni ma soo se mea fa’afiafia i ona po nei, aua e fa’alagolago le ola manuia o fanau i auala e a’oa’o ai e matua i latou”.

Na fa’ai’u le malelega a Tui Atua i lona fa’atauaina lea o le va feagai ai o Samoa e lua i le taimi nei, atoa ai ma le fa’asinomaga na afua mai ai i le tele o tausaga ua mavae, lea o loo fa’alupe o paia e amata mai i Manu’a e oo atu i Falealupo.

“O Samoa e pei ona folau mai ai i tausaga ua mavae, o le aiga ma le uso e tasi le fa’asinomaga tasi fo’i le gagana na foa’i mai e le Atua, afai e i ai se isi itu taua e tatau ona manatua e tupulaga, o lana gagana Samoa aua o le meaalofa lena a le Atua na foa’i mai i o tatou tuaao”.