Tuai ona fa’aleleia Paka i Fagaalu ma Utulei

Le Faatonusili o le Ofisa o Paka ma Malaetaalo ia Maeataanoa Pili Gaoteote  [ata AF]
..... Leai se tusi ata
ausage@samoanews.com

O le leai o se tagata e i ai se agava’a i le tusiaina o ata mo galuega i le toe fausiaina lea ma le fa’aleleia o le paka i Utulei ma Fagaalu, o le fa’afitauli lea na taua e le Faatonusili o le Ofisa o Paka ma Malaetaalo o lo o mafua ai ona taofi le amataina o nei galuega.

 

Ina ua fesiligia tulaga ua i ai le fa’aleleia o paka tetele nei i le atunu’u, na taua ai e Maeataanoa Pili Gaoteote e faapea, ua leva ona taunu’u mai tupe mai le Ofisa o le FEMA a le malo tele e fa’aleleia ai paka ia e lua, ae o le fa’afitauli e le o i ai se tagata tusiata na te tusia ata e mulimulita’i i ai le fausiaina o le galuega.

 

E lei taua e Maeataanoa i luma o le Komiti Soofaatasi o le paketi a le Fono Faitulafono pe fia le aofa’i o le tupe lea ua tauaao e lona Ofisa mai le FEMA mo ia galuega, se’i vagana ai le galuega mo le fa’aleleia o le paka i Onesosopo, lea sa ia taua e $201,000 le tupe ua mae’a ona tauaao mai e le FEMA.

 

Ina ua maua le avanoa o senatoa ma faipule e fesiligia ai le paketi a le Ofisa o Paka ma Malaetaalo, na fesiligia ai e le afioga i le ali’i faipule ia Vaeaitu Mulinu’u Filo Maluia le ali’i fa’atonu, po o i ai se fuafuaga a lona Ofisa e ofo atu ni avanoa sikolasipi mo fanau o lo o aoaoina i le Aoga o Matata Eseese i Nu’uuli (Vo-Tech), ina ia fa’alautele ai lo latou tomai i matata e pei o le inisinia, kamuta, palama, fa’a eletise, atoa ai ma isi lava matata eseese o loo moomia.

 

Na fa’avae le fesili a Vaeaitu i le molimau a Maeata’anoa fai mai, o le tele o galuega e pei o le toe fa’aleleia atoa ai ma le fausiaina o fale, e le o mafai ona fa’atinoina e lona Ofisa, ona e le o i ai ni tagata faigaluega a lona Ofisa e i ai agava’a faapitoa nei e pei o le kamuta, fai eletise, palama, atoa ai ma inisinia latou te faitauina ata o galuega tetele.

 

Saunoa le ali’i fa’atonu e fa’apea, e faigata ona ofo atu e lona Ofisa ni avanoa sikolasipi, ona e fuafua lava galuega fa’atino a le Ofisa i tupe o lo o tu’u atu e le malo mo le paketi i tausaga taitasi.

 

Sa ia fa’aalia fo’i lona lagona fa’anoanoa o i ai, i le tele o tausaga o ia finauina pea le si’i o totogi a lana aufaigaluega e aofia ai ma lana sui fa’atonu, peita’i e oo mai lava i le taimi nei, e le gata e le o i ai lava ni si’itaga i totogi a lana aufaigaluega, ae oo lava fo’i i le totogi o lana sui fa’atonusili, e pito maualalo ai lava lona totogi mai totogi o isi uma sui fa’atonusili a matagaluega ma ofisa uma a le malo.

 

I totonu o le paketi a le ofisa mo le tausaga tupe fou, e $850,500 le tupe lea ua fuafua e fa’atupe ai galuega fa’atino a le ofisa, atoa ai ma le totogiina o ana tagata faigaluega lea ua fa’aitiitia i le to’a 38 mai le to’a 42 o lo o i ai i le tausaga tupe lenei.

 

O ni isi o tagata faigaluega o lo o latou maua totogi e ta’i $11,097, ma le sui fa’atonusili o lo o ia maua le totogi e $44,423 i le tausaga.

 

Na fa’amanino atili e Maeata’anoa e fa’apea i luma o le Komiti Soofaatasi e fa’apea, e ui i le faaletonu o totogi a lana aufaigaluega, ae o lo o molimauina pea le galulue faamaoni o nei alo o le atunu’u i le fa’amamaia lea o paka uma o lo o fa’aaoga e le atunu’u i aso malolo mo tafaoga a aiga ma mafutaga tetele.

 

“E galulue le aufaigaluega i aso e 7 o le vaiaso, tusa lava pe la poo le timu, e galulue lava le aufaigaluega e fa’aleleia nofoaga e tua i ai le atunu’u”, o le saunoaga lea a le ali’i fa’atonusili.

Comment Here