E 56 tausaga o se Tama ua taofia nei i le toese i Tafuna, ona o tu’uaiga i lona faia lea o ni uiga mataga i lona afafine moni lava e 13 tausaga le matua.

O moliaga ua tu’uaia ai e le malo le ali’i amio valea ua molia e aofia ai moliaga mamafa e 4, fa’apea ai ma le moliaga mama e tasi.

O moliaga mamafa e aofia ai lona faia o uiga mataga faasotoma fa’asaga i se teineititi e laititi i lalo o le tulafono, tagofia o itutinosa o se teineititi laititi, faia o amioga mataga fa’afeusuaiga, fa’apea ai ma lona faia o uiga mataga i se teineitiiti e aiga i ai, ma le moliaga mama o lona faia lea o ni gaioiga e ono lamatia ai le saogalemu o fanau laiti.

O moliaga fa’asaga i le ali’i ua molia na alia’e mai i le taeao o le aso 6 Tesema 2016, ma aga’i atu ai loa le teineititi na a’afia fa’apea ai ma le tagata matua o lo o tausia o ia e faila le la tagi i le Ofisa o Leoleo i Tafuna.

Na taua e le teineititi na a’afia i Leoleo e fa’apea, i le taeao po lava o le aso e pei ona taua, na fa’ateia ai o ia ina ua tago atu lona Tama ia te ia, ao la momoe fa’atasi i luga o le moega, ae o lona Tina ma nai ona tei o lo o momoe i lalo o le fola o le latou fale.

Na ala i luga le teineititi na a’afia ina ua pisapisao lona Tina ma ona uso e sauni e o i le galuega i le kamupani i’a, ae ina ua latou tuua le fale, sa toe alu ai loa ma toe moe, peita’i sa ia toe fa’alogoina fo’i le tago tago atu o lona Tama ia te ia.

O le tiga o lona manava ina ua fa’amamafa atu i ai se tagata, na mafua ai loa ona toe ala i luga le teineititi na a’afia, ma ia vaaia ai lona Tama o lo o taoto atu i ona luga, o lo o ia faia ni uiga mataga fa’asotoma ia te ia.

Na taua atili e le teineititi i Leoleo le aveese e lona Tama o lona ofuvae sa ofu, ma fa’aauau ai lava ona ia faia uiga mataga ia te ia ma le fa’amoemoe e fa’amalie ai ona lagona tu’inanau o lo o i ai, ma e ui i lona taumafai malosi e una’i ese o ia mai ona luga, ae sa faigata ona e mamafa ma malosi o ia.

O le mae’a ai ona tu’uina atu e le teineineititi na a’afia o lana fa’amatalaga i Leoleo, na aga’i atu ai loa Leoleo e saili mai le ua molia mo le fa’atalatalanoaina o ia e uiga i lenei mataupu, lea na ia ta’utino ai i Leoleo lona faia o uiga mataga e pei ona taua e lona afafine, e ala i lona tagofia o ona itutinosa i se auala e fa’amalie ai ona lagona tu’inanau.

O le aoauli nei lea ua fa’amoemoe e faia ai le ulua’i iloiloga o le mataupu a le ua molia i luma o le fa’amasinoga fa’aitumalo, e iloilo ai e le fa’amasinoga fa’amaumauga a le malo e uiga i lenei mataupu, pe fa’amaonia sa i ai se vaega o le tulafono ua soli, ae pe moni fo’i o le ali’i ua taofia nei i le toese o lo o tu’uaia i lona soli o le tulafono.

E $25,000 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala le ua molia i tua, e fa’atali ai taualumaga o lana mataupu, ae a mafai ona tatala o ia i tua, ua fa’asa ona ia toe taumafai e fa’afeso’ota’i lona afafine na a’afia i lenei mataupu, po o le toe taumafai fo’i e alu i le fale o lo o nofo ai o ia, ae sili pe a saili se isi nofoaga e nofo ai ma aua ne’i ona toe solia se tulafono a le malo.