O le vaiaso na te’a nei na taofia ai e Leoleo i le toese i Tafuna se ali’i mai Fagatogo, ona o tu’uaiga i lona umia fa’asolitulafono lea o vaega o le pauta fa’asaina o le aisa.

O le taeao ananafi na tula’i ai Falaniko Stowers po o Nicole e pei ona lauiloa ai o ia e le to’atele i luma o le fa’amasinoga maualuga, ma ia teena ai moliaga mamafa e lua lea ua tu’uaia ai o ia e le malo.

O ia moliaga e aofia ai lona umia fa’asolitulafono o vaega o le pauta fa’asaina o le aisa, ma le moliaga o lona umia fa’asolitulafono o vaega o le pauta fa’asaina o le aisa ma le fa’amoemoe e tulei ma fa’atau atu i isi tagata.

O le mataupu e pei ona tu’uaia ai e le malo ia Stowers, na alia’e mai ina ua logo e ni isi o le afioaga o Fagatogo le Ofisa o Leoleo mo se fesoasoani i le masina o Setema 2016, ina ua vaaia le to’atele o tupulaga talavou mai nofoaga eseese e aga’i atu i le fale sa nofo ai Stowers i Fagatogo i soo se taimi o le aso e aofia ai ma le po, ma masalomia ai le ono i ai o ni gaioiga faasolitulafono o lo o tutupu mai ai.

Na taua e le isi molimau i Leoleo e fa’apea, o Stowers sa nofo muamua i le nofoaga o le Aute i Malaeloa, peita’i o lea ua aga’i mai ma nofo i Fagatogo, ma o le tele o taimi o le aso e aofia ai ma le po, e vaaia ai le to’atele o tupulaga e aga’i atu i le fale ma talanoa ma Stowers i fafo mo sina taimi puupuu, ona toe aga’i ese mai lea o ia tagata.

Na taua e le isi molimau i Leoleo e fa’apea, i se tasi o po i le masina o Oketopa na te’a  nei, sa ia vaaia ai ni tagata o aga’i atu i le fale o Stowers, e lei umi ae ona vaaia Stowers ua sau i fafo mai le fale ma talanoa i tagata nei mo se taimi puupuu.

Na taua e le molimau lona vaaia o Stowers o ia tuu se mea i le lima o le tagata la te talanoa, fa’apea fo’i ma lona vaaia o le tagata ua ia tu’u atu se mea i le lima o Stowers, ae talu ai o le pogisa o le po, na faigata ai e le molimau ona ia mautinoa poo a mea sa fepasia’i e Stowers ma tagata sa latou talanoa.

A o fa’agasolo taumafaiga a Leoleo e mata’itu gaioiga e tutupu mai i le fale e pei ona taua, sa fa’afuase’i ona aga’i atu se molimau fa’atuatuaina lava ma fa’ailoa i Leoleo tulaga uma o lo o tutupu i le fale o Stowers, e aofia ai lona fa’atauina atu o vaega o le pauta fa’asaina o le aisa i tagata eseese

Na taua e le molimau fa’atuatuaina lea i Leoleo e fa’apea, o le tele o aso e masani ai ona aga’i atu tagata e fa’atau mai aisa mai ia Stowers, aemaise lava i aso totogi o le malo. Soo se taimi e aga’i atu tagata fa’atau, e tago ai Stowers i totonu o lana tama’i ato fa’afafa e masani lava ona fealua’i ma ia aumai ai i fafo straw ua uma ona tipi tulimanu o loo utu i ai vaega o le pauta oona o le aisa, ma fa’atau atu i tagata i le ta’i $50 i le straw.

O le mae’a ai ona tauaao e Leoleo o fa’amatalaga maumaututu nei mai le latou molimau fa’atuatuaina, na latou talosagaina ai loa se poloaiga mai le Fa’amasinoga e fa’ataga ai i latou e saili ma su’e le fale o Stowers.

Pe tusa o le itula e 4:30 i le afiafi o le aso 28 Novema 2016, na vaaia ai e Leoleo ia Stowers o ti’eti’e ane i se taavale sa ui ane i tafatafa o le Ofisa o Leoleo, ma taofi ai loa e Leoleo le ta’avale ae fa’ailoa ia Stowers le poloaiga a le fa’amasinoga lea ua mae’a ona latou taulimaina e fa’ataga ai ona su’e lona fale.

A o fa’agasolo le talanoaga a Leoleo ma Stowers, sa fesiligia o ia po o i ai se a’upega ma’ai i lona tino, peita’i sa tago le ua molia i totonu o taga o lona ofu ma aumai uma i fafo ma ia fa’ailoa i Leoleo, e leai se a’upega ma’ai o ia te ia, peita’i a o faia ana gaioiga ia, sa molimauina e Leoleo le taumafai o Stowers e nana se pepa sa i totonu o le taga o lona ofu o loo faia, ae ina ua fesili Leoleo poo le a lea tama’ita’i afiafi o loo uu i luma lima, na fa’amatala e le ua molia lona lima ma vaaia ai e Leoleo ni straw se 6 o lo o i ai vaega o le pauta pa’epa’e i totonu.

Na fesili Leoleo ia Stowers poo a ia pauta papa’e o lo o i totonu o straws e 6, ae na ata le ua molia ma tali atu i leoleo e fa’apea, “ua e iloa lava”. Sa faia se suega faapitoa i pauta papa’e nei ma fa’amaonia ai, o vaega ia o le pauta oona o le aisa.

Ae ina ua taumafai e Leoleo e fesiligia Stowers poo ai na aumai ai fualaau faasaina nei, sa toe ata fo’i le ua molia ma tali atu i Leoleo e fa’apea, “Fa’agalo lena tulaga, afai lava ua maua a’u, o lona uiga ua maua lava”.

O lo o taofia pea Stowers i le toese i Tafuna ina ua ia le mafai ona totogi le $10,000 na fa’atulaga e tatala ai o ia i tua, e fa’atali ai le aso 20 Ianuari 2017 lea ua fa’atulaga e toe valaau ai lana mataupu.