Ads by Google Ads by Google

Tu’uaia se ali’i i lona faia uiga mataga teineititi 5 tausaga

ausage@samoanews.com

O le ali’i lea na ulufale mai i Amerika Samoa i se pemita e 30 aso i le masina o Setema 2013, ma fealua’i solitulafono ai lava i totonu o Amerika Samoa e aunoa ma ni pepa nofomau, ua tu’uaia nei o ia e le malo i se solitulafono e sili atu ona matuia, o lona faia lea o ni uiga mataga i se teineititi e 5 tausaga le matua.

 

O moliaga ua tu’uaia ai e le malo le ali’i o Muaiga Siatiu, poo Povi fo’i e pei ona iloa ai o ia e le to’atele, e aofia ai moliaga mamafa e 4 e pei o le faia o uiga mataga i se teineititi e i lalo o le 12 tausaga le matua, faia o uiga fa’a sotoma, faia o gaioiga fa’afeusuaiga, atoa ai ma le tagofia o itutinosa o se teineititi e laititi i lalo o le tulafono, atoa ai ma le moliaga mama e tasi o lona faia lea o ni gaioiga e ono lamatia ai le saogalemu o fanau laiti.

 

O le aso 10 Tesema na te’a nei na faila ai e le Tina o le teineititi na a’afia sana tagi i le Ofisa o Leoleo i Fagatogo e tusa ai o lenei mataupu.

 

E pei ona taua i fa’amaumauga a le fa’amasinoga, o le ali’i o Povi e nofo i Fagatogo i le aiga o le uncle o le teineititi e 5 tausaga na a’afia, ae i le aso na tula’i mai ai le fa’alavelave, na o ai Povi ma le uncle o le teineititi na a’afia i Auasi i le fale o matua o le teineititi na a’afia mo se BBQ sa faia ai.

 

A o i ai le ua molia i Auasi, o iina o lo o tu’uaia ai o ia e le malo na ia faia ai uiga mataga i le teineititi na a’afia, e ala i lona tagofia o ona itutinosa ma le fa’amoemoe e fa’amalie ai ona lagona tu’inanau.

 

Na lagona e le teineitiiti le tiga o lona itutinosa ma ia fa’ailoa ai loa i lona Tina gaioiga sa faia e Povi ia te ia, ma manatu ai loa le Tina e faila sana tagi i le Ofisa o Leoleo. Na taua i fa’amaumauga a le fa’amasinoga le fa’asino e le teineititi na a’afia i Leoleo o le vaega o lona itutinosa na tago i ai le ua molia.

 

O le mae’a ai o su’esu’ega a Leoleo, na auina atu ai loa le teineitiiti na a’afia i le falema’i o le LBJ mo le faia i ai o se siaki fa’apitoa, ma maua ai le avanoa e vaaia ai o ia e le foma’i ia Dr. Luz Adriano.

 

Ina ua fesiligia e Leoleo le ua molia e tusa ai o lenei fa’alavelave, sa ia ioeina ai le faia o uiga mataga i le teineititi na a’afia i totonu o le latou fale.

 

O le masina fou o Ianuari lea ua fa’atulaga e faia ai le ulua’i iloiloga o le mataupu a Povi i luma o le fa’amasinoga maualuga, i le mae’a ai lea o lona teena o moliaga uma fa’asaga ia te ia i le aso Faraile na te’a nei, ma o lo o taofia pea o ia i le toese i Tafuna sei vagana ua totogi le $22,000 ua fa’atulaga e le fa’amasinoga ona fa’atoa mafai lea ona tatala o ia i tua.

 

Afai ae mafai ona totogi le tupe ua fa’atulaga e tatala ai o ia i tua, ona tu’uina atu loa lea o ia i lalo o le vaavaaiga a le Ofisa o Femalagaaiga, ona o tulaga fa’aletonu o ona pepa nofomau o lo o i ai.

 

Afai e mafai ona tatala o ia i tua, ua poloaina e le fa’amasinoga le fa’asa lea ona ia toe alu i Auasi i le fale o le teineititi na a’afia, fa’asa fo’i ona ia toe soli se tulafono a le malo, a ia avea o ia ma tagatanu’u lelei e tausisi i tulafono a le malo i taimi.