Ads by Google Ads by Google

Tolopo malaga a le malo mo Manu’a i le masina fou


Le Faatonusili o le Ofisa o Pulega o Taulaga ma Malaevaalele ia Taimalelagi Dr. Claire Poumele i le taimi na ia fa’amalamalama ai i luma o le Kapeneta le tulaga o le va’a fou mo Manu’a lea ua fuafua e taunu’u mai i le masina fou. [ata AF]
ausage@samoanews.com

O le malaga a le kovana ma lana faigamalo lea na fuafua mo le itumalo o Manu’a i le vaiaso nei, mo le fa’amoemoe e fa’apaia ai le va’a fou mo Manu’a atoa ai ma le fa’aulufaleina o ni isi o galuega a le malo o loo fausia i Ofu, ua toe tolopo lea malaga mo le masina fou o Ianuari, fetaui lelei ma le taimi lea ua fa’atulaga e taunu’u mai ai le va’a a le malo lea ua fuafua e tautuina le itumalo o Manu’a.

 

O le aso Tofi nei ma le aso Faraile a taeao, o aso ia e lua na fa’atulaga e le kovana i le fonotaga a le Kapeneta sa faia ia Novema e tatau ona fa’ataunu’u ai le malaga mo Manu’a, ae talu ai o lea ua toe tolopo le taimi e taunu’u mai ai le va’a a le malo mo Manu’a, o le mafua’aga fo’i lea o le toe tolopo o le polokalame.

 

Na taua e le Faatonusili o le Pulega o Uafu ma Malaeva’alele ia Taimalelagi Dr. Claire Poumele i luma o le fonotaga a le Kapeneta i le vaiaso na te’a nei e fa’apea, talu ai o le umi o suega a le US Coast Guard sa faia i vaega uma o le va’a ina ia mautinoa ua lelei atoatoa ma saogalemu mo Amerika Samoa, o le mafua’aga lea o le tuai ona fa’amatu’u mai o le va’a ia Amerika Samoa.

 

O le aso Toona’i na te’a nei lea na taua e Taimalelagi na fa’atoa taunu’u ane ai le va’a i Hawaii, ma malolo ai loa mo ni nai aso e tapena ai mo le malaga mai i Amerika Samoa.

 

“Ua i ai le fa’amoemoe o le aso 4 o Ianuari lea ua fa’amoemoe e tatau ona taunu’u mai ai le va’a i Amerika Samoa, ma fuafua ai loa tapenaga mo le malaga atu i Manu’a”, o le saunoaga lea a Taimalelagi.

 

Sa ia taua fo’i le talia o le talosaga sa tu’uina ane e ni isi o aiga o le atunu’u o loo alala i Hawaii, mo se avanoa e la’u mai ai a latou uta fa’amomoli i le malaga a le va’a pe a tuua Hawaii, mo le fa’amoemoe e maua ai le avanoa e momoli mai ai a latou uta mo aiga ma uo i Amerika Samoa nei.

 

“O le agaga atoa o le malo ia maua le avanoa e nai o tatou tagata i Hawaii e la’u mai ai a latou fa’amomoli ma uta mo aiga i Amerika Samoa nei, aua aso fa’ai’u o le tausaga, ae o se avanoa lelei fo’i lea e fa’aaoga ai le malaga mai o le va’a i le atunu’u”, o le saunoaga lea a Taimalelagi.

 

Na taua atili e le tama’ita’i Faatonusili le mae’a lea ona pasia ma aloaia ali’i va’a sa malaga atu i Amerika Samoa e le US Coast Guard mo le fa’atautaia mai o le malaga a le va’a i le atunu’u.

 

Saunoa le afioga i le ali’i kovana ia Lolo Matalasi Moliga e fa’apea, e ui lava i le tele o fa’asea ma faitioga a le atunu’u e fa’atatau i le va’a, ae o le itu taua ua alu aoga tupe a le malo e fa’atau ai le va’a e tautua ai le itumalo o Manu’a fa’apea ai fo’i ma Tutuila.

 

“Tusa lava pe tele faitiogaa a le atunu’u, e le taofia ai lava le fa’ataunu’uina o galuega lelei a le malo mo tagata lautele, o le tiute lena o le malo na mafua ai ona filifili e le atunu’u, o le tautua ma auauna i tagata”, o le saunoaga lea a Lolo.

 

O galuega ua fuafua e fa’apaiaina i Manu’a i le taimi e malaga ai le malo pe a taunu’u mai le va’a fou e aofia ai le fa’aulufaleina o le maota o le malo i Ofu, le EOB, atoa ai ma le tatalaina o le galuega a le Pulega o le Eletise ma le Suavai (ASPA) lea ua fa’aaoga ai le malosi o le la e maua mai ai le eletise mo Ofu ma Olosega/Sili.