O le tulaga fa’aletonu sa i ai le gataifale o le atunu’u i le taeao nei, na faia ai loa le fa’aiuga a le Komiti o Tuuga Fautasi ina toe tolopo le tuuga mo le sailiina o le siamupini o Faigamea i le Tai i lenei tausaga i le itula e 8:00 i le taeao o le aso Toona’i o le vaiaso nei.

O Sa e 7 lea ua lautogia mo le tuuga e sailia ai le siamupini e aofia ai le Paepaeulupoo II mai Aua, Fuao mai Vatia, Manulele Tausala I mai Nuuuli, Taema II mai Leone, Iseula ole Moana mai Fagatogo, ma le Fetu o le Afiafi mai le Faga’alu.

E lei manuia taumafaiga a le Sa o le Aeto mai Pago Pago ma le Fealofani Samoa III mai le afioaga i Fagasa, ina ua le ausia taimi e fa’atulagaina ai Sa e 7 pito i luga.

Ae mo le tuuga faapitoa lea sa tausinio ai Sa fa’apitoa e 3 i le aoauli nei, o lea ua sola ai le Sa o le God is Great na alo e le aumaga a le afioaga i Pago Pago ma le siamupini, tulaga lua ai le Sa mai le itumalo o Sua ma Vaifanua lea sa alo e fanau aoga mai le aoga maualuga a Fagaitua, ae tulaga tolu ai le Sa o le Manulele Tausala II mai le afioaga i Nu’uuli.

O le itula e 9:00 i le taeao nei na fa’amoemoe e fa’ataunu’uina ai le tuuga e saili ai le siamupini o Faigamea i le Tai o lenei tausaga, ae talu ai o tulaga fa’aletonu sa i ai le gataifale i le taeao nei, atoa ai ma tulaga fa’aletonu sa molimauina e le Komiti i ni isi o Sa sa fa’amoemoe i le tuuga faapitoa, ina ua sao le vai i le Sa mai le afioaga i Fagatogo ma Nu’uuli, na faia ai loa le fa’aiuga a le Komiti ina ia fa’aleaoga loa le tuuga e saili ai le siamupini sa fuafua e fa’ataunu’uina i le taeao nei, ae tu’u atu i le aso Toona’i, se’i vagana ai le tuuga faapitoa sa fa’ataunu’uina pea.

Na fa’amaonia mai e le afioga i le Maoputasi ia Mauga Tasi Asuega, o le Ta’ita’ifono lea o le Komiti o Tuuga Fautasi o le Fua o lenei tausaga e fa’apea, o le tulaga i le saogalemu o ali’i va’a ma auva’a uma o loo fuafua e tausinio i le tuuga e saili ai le siamupini, ua manatu ai le Komiti e toe tolopo le tuuga.

“O lea ua maua mai se ripoti i le tulaga siisii ua i ai le gataifale i lenei aso, ma ua manatu ai le Komiti ina ia fa’amuamua pea le tulaga o le saogalemu o auva’a ma ali’i va’a, ina ia aua ne’i tula’i mai se fa’alavelave e ono lamatia ai se soifua o se tagata, ae saili malu pea i nai aso o loo totoe o lenei vaiaso”, o le saunoaga lea a le afioga i le Maputasi.

Ina ua fesiligia i se isi fuafuaga a le Komiti pe afai e oo atu lava i le aso Toona’i o tulaga fa’aletonu pea le gataifale, ae na saunoa le afioga i le Maoputasi e fa’apea, “O le a fuafua lava le tulaga o le tuuga mulimuli e saili ai le siamupini o le fu’a i lenei tausaga i le tala o le tau, afai lava e oo atu i le aso Toonai ae o loo siisii pea le gataifale, ona toe fono lea o le Komiti ma ali’i va’a mo se fa’aiuga mautu”.

Na taua e ni isi o ali’i va’a ma kapeteni i le Samoa News lagona popole o lo o i ai, ina nei fa’aluaina le fa’aletonu lea na tula’i mai i le tuuga fautasi o le tausaga na te’a nei, ina ua avea le tuai o le fa’ataunu’uina o le tuuga ma auala na i’u ai lava ina taofia le tuuga e saili ai le siamupini, ona o le tulaga fa’aletonu sa i ai le tau.

“E le fesiligia le fa’aiuga a le Komiti o le Fu’a o lenei tausaga, peitai o le lagona sa ou fa’aleoina i fonotaga a Kapeteni ma le Komiti ao tau tapena mai lenei fa’amoemoe, ia fa’ataunu’u le tuuga i le aso Gafua na te’e nei ae saili ai loa le siamupini i le aso Lua e sosoo ai, lea la ua toe sui fa’afuase’i mai le tulaga o le gataifale i le aso Lulu, lona uiga o le ata lava lea o le a alu atu ai ma le fa’aiuga o le vaiaso, ae o popolega na o loo i ai, ina ne’i faaletonu le tala o le tau i le aso Toonai ma avea ai ma auala e le fa’ataunu’uina ai le tuuga faapitoa e saili ai le siamupini mo lenei tausaga”, o le saunoaga lea a se tasi o ali’i kapeteni e lei finagalo e fa’ailoa lona suafa.

O se tasi o itu na tele i ai fesili a le mamalu o le atunu’u ae maise ai lava i le afioaga i Pago Pago, o le tulaga e pei ona fesiligia ai taimi o Sa e 7 lea ua lautogia mo le sailiga siamupini i le aso Toonai nei.

E tusa ai ma le pepa sa maua e le Samoa News, e sili atu le taimi o le Sa o le Aeto i le Iseula o le Moana, ae o loo maua le avanoa o le Iseula o le Moana e tausinio ai i le tuuga e saili ai le siamupini. E “37.27.44” le taimi a le Aeto o loo taua i le lisi a le Komiti, ae “37.55.12” le taimi a le Iseula o le Moana.

Na taua e le afioga i le ali’i Senatoa ia Tuaolo M. Fruean i le Samoa News le fa’ateia o le afioaga i le tulaga na tula’i mai i lo latou Sa i le ulua’i tuuga, lea ua mafua ai ona le maua sona avanoa i le sailiina o le siamupini.

Ae mo le tuuga fautasi fa’apitoa lea na fa’ataunu’uina i le aoauli nei, e na o le 3 Fautasi na mafai ona tausinio ai mai Sa e 4 sa fa’amoemoe e tausinio ai. O Sa e 3 na auai i lenei tuuga faapitoa e aofia ai le Sa o le Itumalo o Sua, poo le Sa lea a le Sinapioa sa alo e fanau aoga mai le aoga maualuga a Fagaitua, o le Manulele Tausala II mai Nu’uuli, ma le Sa o le God is Great lea na alo e le afioaga i Pago Pago. O le Sa o le Iseula o le Moana mai Fagatogo e lei mafai ona tausinio.