Ads by Google Ads by Google

Tofu mataupu Olafou Wilson i luma Fa’amasinoga Maualuga


Olafou Wilson (itu taumatau) ma se ali’i leoleo i le aso na fa’atoa tula’i ai i luma o le fa’amasinoga fa’aitumalo. [ata AF]
ausage@samoanews.com

Ua tofu atu nei le mataupu a le ali’i Leoleo o le Falepuipui o Tamaiti Laiti i Tafuna (Juvenile Detention Center - JDC) ia Olafou Wilson i luma o le Fa’amasinoga Maualuga, ina ua mae’a lana ulua’i iloiloga sa fa’agasolo i le Fa’amasinoga Fa’aitumalo i le taeao ananafi, ma fa’ailoa ai e le afioga i le ali’i Fa’amasino ia Fiti Sunia le i ai o mau fa’amaonia e lagolago ai tu’uaiga fa’asaga ia te ia, lea e pei ona fa’ailoa e le malo i luma o le fa’amasinoga.

 

O le ali’i loia ia Douglas Fiaui o lo o tula’i mo Wilson i lenei mataupu, ae o le ali’i loia ia Jedediah Bigelow o lo o tula’i mo le itu a le malo, ma le ali’i leoleo su’esu’e ia Det. Filemoni Amituana’i sa avea ma molimau a le malo, o ia fo’i le leoleo sa autu i ai le su’esu’eina o lenei mataupu, lea e pei ona tu’uaia ai Leoleo e to’afa mai le JDC, i lo latou faia lea o gaioiga fa’asolitulafono e aofia ai le fa’ataga o pagota e sosola i tua, atoa ai ma le fa’aaogaina o fualaau fa’asaina.

 

Ao lei amataina le iloiloga a Wilson i le taeao ananafi, na mua’i fa’aleo e lana loia se talosaga i le fa’amasinoga, e poloaina ai le afioga i le ali’i fa’amasino ia Sunia ina ia tula’i ese o ia mai lona auai i le iloiloina o le mataupu a Wilson, ona o ni isi o mafua’aga sa ia tolaulauina.

 

O se tasi o mafua’aga autu na taua e Fiaui i lana fa’afinauga, talu ai o Sunia lea sa faamaonia le ripoti a leoleo ma ia sainia ai loa le poloaiga e pu’e fa’apagota mai ai Wilson, e talitonu ai o ia, e le tatau la ona toe avea Sunia ma Fa’amasino na te faia le fa’aiuga mo le ulua’i iloiloga, pe lava ma totoe mau a le malo e lagolago ai sa soli se tulafono, ae tatau ona ese se isi fa’amasino na te nofoia le nofoa fa’amasino mo lea iloiloga.

 

Na teena e Sunia le fa’afinauga a le itu tete’e ona o ni isi o mafua’aga sa ia taua, aemaise ai lava le tulaga lea, ua mae’a ona fa’ataoto e le fa’amasinoga le alafua e lima ta’ita’iina ai ana galuega, ma o le auala lava lea ua faia e le fa’amasinoga e le toe suia.

 

E 15 moliaga o lo o tu’uaia ai e le malo ia Wilson, ae i le mae’a ai o lana ulua’i iloiloga i le taeao ananafi, na fa’amalieina ai le fa’amasinoga i le lava o mau faamaonia sa tu’uina atu e le malo e lagolago ai tu’uaiga fa’asaga ia te ia i moliaga e 14, se’i vagana ai le moliaga mamafa lona 15 o lona taumafai lea e fa’aleaga se molimau (tampering of witness) ua fa’aleaoga e le fa’amasinoga, ina ua le mafai e le malo ona tu’uina atu ni mau e lagolagoina ai lea tu’uaiga.

 

O moliaga la e 14 o loo tu’uaia ai Wilson ua tofu atu nei i luma o le fa’amasinoga maualuga, e aofia ai moliaga mama e 3 fa’apea ai ma moliaga mamafa e 11.

 

O moliaga mama e 3 e aofia ai moliaga e 2 o le faia o gaioiga e ono lamatia ai le saogalemu o fanau, ma le moliaga mama e tasi o le gaoi, ae o le moliaga mamafa e 11 e aofia ai moliaga e 2 o le umia fa’asolitulafono o vaega  le pauta oona o le aisa, 2 moliaga o le fa’asoa atu fa’asolitulafono o vaega o le pauta fa’asaina o le aisa i isi tagata, tasi le moliaga o le gaoi, 3 moliaga o le fesoasoani i pagota e sosola i tua mai le toese, ma moliaga e 3 o lona fa’atagaina lea o pagota e sosola i tua mai le toese o loo taofia ai latou.

 

E pei ona manino i le molimau a le ali’i leoleo su’esu’e ia Det. Amituana’i i le taeao ananafi, e to’atolu ali’i pagota talavou o loo taua i fa’amaumauga a le fa’amasinoga sa a’afia i gaioiga a le ali’i leoleo ia Wilson, ma o i latou ia o loo taua i totonu o le ripoti o le ‘victim #2’, ‘victim #3’ ma le ‘victim #6’.

 

Na taua e Det. Amituana’i le la talanoaga ma le victim #2, lea na ia fa’amatala atu ia te ia le po na latou malaga atu ai ma Wilson, o victim #3 ma victim #6 i le vaega e paka ai ta’avale i se tasi o fale’aiga i Tafuna, ma le fa’amoemoe e feiloa’i ai ma tagata o latou aiga, mo le fia mauaina mai o se tupe mo i latou.

 

Na taua atili e victim #2 i leoleo se tasi o po ao tiute Wilson, na fa’atonu ai e le ua molia o ia e alu e talepe le kapeneta a le Ofisa o Aoga i totonu o le JDC ae aveese mai le laptop sa i ai ma latou taaalo ai i le laptop i le po atoa, ae ina ua manava le ua molia, sa ia tago ma tu’u le laptop i lana ato ma alu ma ia i lona aiga.

 

Na taua e Det. Amituana’i le faamaonia atu e le Ofisa o Aoga ia te ia, e 2 a latou masini laptop na leiloloa mai i le JDC, lea e tusa ma le $2,000 le tau o le laptop e tasi, ma ua mae’a fo’i ona faila la latou ripoti i le ofisa o leoleo e tusa ai o lea mataupu.

 

Na taua e victim #2 ma victim #6 lo la vaaia o Wilson o ia ulaina le pauta oona o le aisa e fa’aaoga i ai le paipa. Na taua e vicitim #2 ma victim #3 le tu’u atu e Wilson o le paipa o loo i ai vaega o le pauta oona o le aisa ma latou ulaula fa’atasi ai.

 

Na fesili Fiaui i le molimau pe na maua e leoleo ni mau fa’amaonia mai ia Wilson e lagolago ai tu’uaiga fa’asaga ia te ia, na tali le molimau e leai, sa toe fesiligia fo’i e Fiaui le molimau pe sa i ai lava se taimi na aumai ai se ripoti e fa’atatau i ni pagota ua sosola i tua mai le JDC, na tali le molimau e leai.

 

Na finau Fiaui e fa’apea, o tu’uaiga o loo faia fa’asaga ia Wilson, ua na o ni tu’uaiga o loo fa’avae i luga o fa’amatalaga ma upu, e aunoa ma ni mau fa’amaonia e lagolagoina ai. Sa ia finau foi i le fa’amasinoga le auala na fa’atino ai e Det. Amituana’i lana su’esu’ega fa’asaga i lenei mataupu, i lona fesiligia lea o tamaiti talavou na a’afia e aunoa ma le i ai o latou matua, peita’i na tali Det. Amituana’i e fa’apea, na mafua ona leai ni matua o tamaiti i le taimi na fesiligia ai i latou, ona e le o se suesuega e faia ai ni moliaga fa’asaga ia tei latou, ae o i latou o loo a’afia i le mataupu e pei ona su’esu’eina.

 

I le fa’aiuga o le iloiloga, na taua ai e Sunia le fa’amalieina o le fa’amasinoga i mau faamaonia sa folasia e le malo, e lagolago ai sa i ai le vaega o le tulafono ua soli, ma ua tofu atu nei le mataupu a Wilson i luma o le fa’amasinoga maualuga e fa’agasolo ai ana iloiloga, ma o loo taofia pea o ia i le toese se’i vagana ua totogi le $75,000 ona fa’atoa mafai lea ona tatala i tua.