Ads by Google Ads by Google

Tofu mataupu a Elijah Tavai i luma o le Fa’amasinoga Maualuga


Elijah Jared Tavai [ata AF]
ausage@samoanews.com

Ua tofu atu nei i luma o le Fa’amasinoga Maualuga le mataupu o lo o tu’uaia ai se ali’i sa avea ma faiaoga i le Aoga Maualuga a Leone, ina ua ia manatu e fa’aagafua ona aia tatau fa’aletulafono, ma le fa’ataunu’uina ai loa le ulua’i iloiloga lea sa fuafuaina e faia i luma o le Fa’amasinoga Fa’aitumalo i le taeao nei.

Ina ua valaau le mataupu a Elijah Jared Tavai i le taeao nei, na fa’ailoa e lana loia fautua ia Marcellus Tala Uiagalelei le mana’o o le ua molia e fa’aagafua ona aia tatau fa’aletulafono, e taofi ai le fa’ataunu’uina o lana ulua’i iloiloga, ae tu’u sa’o atu loa lana mataupu i luma o le Fa’amasinoga Maualuga.

E le i fa’atuiese le loia a le malo ia Christy Dunn i le manatu a Tavai ma lana loia, lea fo’i sa talia e le afioga i le ali’i Fa’amasino ia Fiti Sunia.

O le itula e 9:00 i le taeao o le aso Gafua o le vaiaso fou lea ua fa’atulaga e tula’i ai Tavai i luma o le fa’amasinoga maualuga mo lana ulua’i iloiloga.

Na fa’atumulia totonu o le potu fa’amasino i uo ma aiga a le ua molia, i le taimi na fa’atoa tula’i ai i luma o le Fa’amasinoga Fa’aitumalo i le aso Lulu na te’a nei, atoa ai fo’i ma le taeao ananafi, ina ua faila e le malo le tagi fa’asaga ia te ia, ona o le fa’alavelave lea o lo o tu’uaia ai o ia i lona faia o uiga mataga i se tamaititi aoga e i lalo o le 18 tausaga le matua mai le aoga maualuga a Leone.

O moliaga o lo o tu’uaia ai e le malo ia Tavai e aofia ai le moliaga mamafa e tasi o le faia o sauaga i fanau laiti, o se solitulafono e mafai ona fa’asala ai se tasi i le toese mo le umi e le silia i le 5 tausaga, pe fa’asala i le salatupe e le silia i le $5,000, pe fa’asala fo’i i fa’asalaga uma ia e lua. O lo o molia fo’i o ia i moliaga mama e 2, o le moliaga o lona faia o uiga fa’atalitane fa’asaga i tamaititi e laititi i lalo o le tulafono, fa’apea ai ma le moliaga o lona faia o ni gaioiga e lamatia ai le saogalemu o fanau laiti.

E ui o le masina o Fepuari o le tausaga nei na alia’e mai ai ripoti e fa’atatau i lenei mataupu, ae o le masina o Aokuso na fa’atoa maua ai e Leoleo fa’amatalaga e mafai ai ona fa’agasolo a latou su’esu’ega e uiga i lenei mataupu.

I le fa’aiuga o le masina o Aperila na te’a nei, na fesiligia ai e se sui sinia mai le Ofisa o Aoga le Vaega Suesue o Leoleo, e fa’atatau i se mataupu o lo o a’afia ai se faiaoga mai le aoga maualuga a Leone ma se tamaititi aoga. Na taumafai Leoleo e saili ni isi fa’amatalaga fa’aopoopo e uiga i lenei mataupu mai le Ofisa o le Soifua Maloloina, peita’i e lei manuia sailiga, ona o puipuiga i lalo o le tulafono e le mafai ai ona fa’alauiloa suesuega sa faia i fanau e laiti i lalo o le tulafono.

Na pau le fa’amatalaga na mafai e Leoleo ona maua talu mai le masina o Fepuari o le tausaga nei, e i ai le tamaititi aoga ua faamaonia i se suega sa faia i le Falema’i le a’afia i le fa’ama’i o le ‘ma’i afi,’ e mafua mai ina ua a’afia i gaioiga fa’afeusuaiga ma se faiaoga.

Sa fa’asalalau e le Samoa News ripoti e fa’atatau i lenei mataupu talu mai le masina o Mati. Sa faia fo’i se iloiloga a le maota maualuga a le Senate i le masina o Aperila e uiga lava i lenei mataupu.

Ae i le fa’aiuga o le masina o Aokuso na te’a nei, na fa’atoa mafai ai loa e Leoleo ona maua le igoa o le tamaititi na a’afia, fa’atasi ai ma se molimau fa’atuatuaina na fesoasoani i Leoleo i le fa’amatalaina o le mafua’aga na ala ai ona alia’e lenei mataupu.

I fa’amaumauga a le fa’amasinoga o lo o taua ai e fa’apea, na fa’ailoa e le tamaititi na a’afia i le molimau le a’afiaga ua oo ia te ia, o le tiga lea o lona totogasa pe a fai lana feau vai (tulou), ma ua mana’omia ai se fesoasoani mo ia, ma fautuaina ai loa e le molimau le tamaititi na aafia e alu e vaai le foma’i.

O le molimau ma le uso matua o le ali’i na a’afia, o i laua ia na fesoasoani i le aveina o le tamaititi na a’afia i le falema’i e vaai le Foma’i.

Ina ua fesiligia e le Foma’i le tamaititi i le mafua’aga ua a’afia ai o ia, sa ia pepelo i ai, na mafua mai i le le mafutaga ma lana uo teine, mulimuli ane na toe fa’ailoa e le tamaititi le mea moni, e leai sana uo teine, ae o lana faiaoga fa’a-fafine ia Tavai na mafua ai ona a’afia o ia i lea fa’aletonu.

Na fa’amatala e le tamaititi na a’afia i Leoleo le tele o taimi e tusi atu ai Tavai ia te ia i luga o le Facebook. O le isi aso na tusi atu ai pe mafai ona la feusua’i (tulou). I se tasi o aso ao fa’atali se ta’avale e alu ai le tamaititi e taeele ma ana uo i le sami, na fa’afuase’i ona tu atu le ta’avale a Tavai ma la ti’eti’e ai loa.

O iina lea na fai atu ai loa Tavai ia te ia pe mafai ona la feusua’i i le $350 - sa malie i ai le tamaititi ma fa’atino loa le mana’o o Tavai, ina ua paka le ta’avale a Tavai i luma o lona fale i Puapua, ma fa’atino ai loa le solitulafono e pei ona tu’uaia ai o ia. Ina ua mae’a, sa tu’u i ai e Tavai le $20 i le tamaititi na a’afia ma le fa’aupuga, e fa’auma atu i le aso e sosoo ai i le aoga.

E lei fesiligia e Leoleo ia Tavai e tusa ai o lenei mataupu. O lo o tumau pea tuutuuga o loo tatala ai Tavai i tua, e fa’atali ai le fa’agasoloina o lana mataupu lea ua amata fa’agasolo i le taimi nei.