Ua tofu atu nei i luma o le Fa’amasinoga Maualuga le mataupu o lo o tu’uaia ai e le malo le ali’i o Cody Wood, ina ua malie le ua molia e fa’aagafua ona aia faaletulafono, e aua ai ne’i fa’ataunu’uina lana ulua’i iloiloga lea sa fa’atulaga e faia i luma o le Fa’amasinoga Fa’aitumalo i le vaiaso nei.

O le taeao nei lea ua fa’amoemoe e tula’i ai Wood i luma o le Fa’amasinoga Maualuga.

O Wood, o le isi lea e to’atolu i ai i latou na taofia e Leoleo Suesue mai le Vaega a le Vice & Narcotics a le Ofisa o Leoleo, ina ua osofa’i e Leoleo ni fale se lua i le 2 vaiaso talu atu, i lalo o se poloaiga mai le Fa’amasinoga, ina ua masalomia le i ai o fualaau fa’asaina i fale e pei ona sailia.

O vaega na maua e Leoleo mai le latou osofaiga e aofia ai fualaau fa’asaina o le aisa ma le mariana, o se tinoitupe e silia i le $50,000, o vaega e fa’aaoga e ula ma kiliva ai fualaau fa’asaina, atoa ai ma le tele o meatotino a tagata sa masalomia le ave fa’agaoi ma le fa’amoemoe e fa’atau mai ai fualaau fa’asaina.

O i latou e to’atolu na taofia e Leoleo e aofia ai Wood, lea na taofia mai i lona fale i Taputimu, o le ali’i o Lemalie Taisia, o se ali’i ave taxi, faapea ai ma se ali’i sa avea ma Leoleo, susuga Steve Tuatoo, lea o lo o tau sailia pea e Leoleo i le taimi nei.

O le vaiaso na te’a nei na tula’i ai Taisia i luma o le Fa’amasinoga Maualuga, ma ua fa’atulaga lana mataupu e toe valaau i le masina o Ianuari o le tausaga nei, i le mae’a ai lea ona ia teena o le moliaga mamafa e tasi o lo o tu’uaia ai o ia e le malo, le moliaga o le umia fa’asolitulafono lea o vaega o fualaau fa’asaina, le ituaiga o le aisa.

O lo o taofia pea Taisia i le toese i Tafuna ina ua le mafai ona ia totogi le $5,000 na fa’atulaga e tatala ai o ia i tua.

O le susuga a Wood, o lo o taofia fo’i o ia i le toese i Tafuna, ina ua le mafai ona ia totogi le $200,000 ua faatulaga e tatala ai o ia i tua.

O lo o tu’uaia e le malo ia Wood i moliaga eseese e aofia ai le molia fa’asolitulafono o vaega o fualaau fa’asaina o le aisa ma le mariuana, fa’apea ai ma le umia fa’asolitulafono o ia vaega o fualaau fa’asaina ma le fa’amoemoe e tulei ma fa’atau atu i isi tatgata.

O le iloiloga a Wood sa faia i luma o le ali’i Fa’amasino ia Fiti Sunia i le aso Gafua na te’a nei, na aloaia ai loa le avea o le ali’i Loia ia Joshua Rovelli mai le Ofisa RDA Law Firm e avea ma ana loia fautua, e sui tulaga i le ali’i loia fautua ia Ryan Nelson na ulua’i tauaveina mai lana mataupu.

Na taua e le ali’i loia ia Rovelli i le Samoa News e fa’apea, e tele naua fa’amatalaga e tatau ona la iloiloina ma Wood e fa’atatau i lenei mataupu, a o le i tuuina atu le avanoa e filifili ai o ia i le la’asaga e tatau ona i ai lana mataupu.

O le tele o ni isi o mataupu o lo o fia malamalama i ai ni isi o le atunu’u, e pei o le aofa’i sa’o o le tupe na maua i le fale o Wood i le taimi na osofa’i ai e Leoleo, e le i mafai ona fa’amatu’u mai e le ali’i Loia ni fa’amatalaga auiliili e tusa ai o lea tulaga, peita’i sa ia taua, o le a ia tuuina mai i se taimi mulimuli fa’amatalaga e uiga i lenei mataupu i se taimi talafeagai.

Mo le ali’i sa avea ma Leoleo o Tuato’o, e o o mai lava i le taimi nei o lo o tau sailia pea o ia e Leoleo. O ripoti mulimuli na maua e le Samoa News talu mai le vaiaso na te’a nei, na taua ai le masalomia o le tuua e Tuatoo o le atunu’u ina ua tatala o ia mai le toese i Tafuna i le taeao o le aso Toona’i o le 2 vaiaso talu ai, ina ua mae’a le ulua’i 48 itula na taofia ai o ia i le falepuipui.