Tofu le mataupu a le ali’i mai Asia i luma o le fa’amasinoga maualuga

Tao Liu  [ata AF]
ausage@samoanews.com

O le aso 25 Oketopa lea ua fa’atulaga e toe fofogaina ai i luma o le fa’amasinoga maualuga le mataupu fa’asaga i se ali’i Asia, lea o lo o tu’uaia i lona taumafai lea e fa’aaoga se a’upega mata’utia ua mae’a ona utu i ai pulufana i totonu, i le taimi na taofia ai e Leoleo lana ta’avale i le masina na te’a nei, ina ua masalomia lona fa’afoeina o le ta’avale a’o fa’asua’ava.

 

O lo o tu’uaia e le malo le ali’i o Tao Liu i moliaga e aofia ai lona umia o vaega o fualaau fa’asaina, tete’e atu i leoleo ao taumafai e pu’e fa’apagota o ia, fa’apea ai ma moliaga o lona umia o se a’upega mata’utia atoa ai ma ni pulufana e le o lesitalaina fa’aletulafono.

 

O le aso Gafua na te’a nei na faia ai le ulua’i iloiloga o le mataupu a Liu i luma o le fa’amasinoga fa’aitumalo, mo le iloiloina e le fa’amasinoga o molimau a le malo e uiga i lenei mataupu.

 

I le mae’a ai o le ulua’i iloiloga a Liu sa faia i luma o le afioga i le ali’i fa’amasino ia Elvis P. Patea, na fa’ai’uina ai loa e le fa’amasinoga le lagolagoina o mau sa tu’uina atu e le malo, e fa’amaonia ai ua soli se vaega o le tulafono, ma o le ali’i o lo o taofia i le toese i Tafuna, o ia lea o lo o tu’uaia i le soliina o le tulafono.

 

O lo o taofia pea Liu i le toese i Tafuna e aunoa ma se vaega tupe ua fa’atulaga e le fa’amasinoga e tatala ai o ia, e fa’atalitali ai le aso lea ua fa’atulaga e toe tula’i ai o ia i luma o le fa’amasinoga.

 

Na finau le loia a Liu i le fa’amasinoga mo se avanoa e fa’atulaga ai se vaega tupe e tatala ai o ia i tua, peita’i na taua e le afioga a Patea e fa’apea, o le fa’aiuga ua faia ina ia taofia le ua molia i le toese e aunoa ma se vaega tupe, o lo o fa’avae mai lea i le si’osi’omaga o le fa’alavelave sa tula’i mai, aemaise ai o le saogalemu o ali’i Leoleo na tau a’afia i le fa’alavelave, aemaise ai o le ua molia.

 

O le taeao ananafi na tulai ai Liu i luma o le Fa’amasinoga Maualuga ma ia teena moliaga faasaga ia te ia.

 

O moliaga faasaga ia Liu na tula’i mai ina ua mae’a ona taofi e leoleo le ta’avale a Liu i se vaega o Faganeanea, ona fa’atonuina lea o ia e leoleo e avatu lana laisene ave ta’avale, peita’i sa musu le ua molia, ona fa’atonu ai loa lea o ia e leoleo e oso i fafo ma lana ta’avale, peita’i sa vaaia e leoleo le taumafai o le ua molia e aapa atu lona lima i le isi faitoto’a o le ta’avale, e foliga mai o lo o ia taumafai e aapa atu i se a’upega.

 

Na vave gaioiga a leoleo e ala i lo latou tosoina o le ua molia i fafo mai lana ta’avale, ma latou maua ai se fana o le ituaiga o le .45 o lo o teu i le pito o le faitoto’a o le ta’avale, ua mae’a fo’i ona utu i ai pulu fana i totonu.

 

Na saili e leoleo totonu o le ta’avale ma latou maua ai ni isi o vaega o fualaau fa’asaina e pei o le paipa e ula ai le aisa, lea sa maua i ai ni vaega o le pauta fa’asaina i totonu, atoa ai ma mea e fa’aaoga e tagata e tagofia fualaau fa’asaina e pei o le fua ma se seleulu e tipi ai straw e utu ai i totonu vaega o le pauta fa’asaina o le aisa pe afai e fia fa’atau ese atu.

Comment Here