Ua taoto atu nei i luma o le Fono Faitulafono mo lana fa’amaoniga, tofiga a le kovana mo fa’atonusili o le Matagaluega o Paka ma Malaetaalo ma le Matagaluega o Auaunaga mo Tagata ma le Soifua Manuia Lautele (DHSS).

I lana tusi i le aso 4 o Ianuari 2018 na tofia ai e le afioga i le Kovana Sili, Lolo Matalasi Moliga, Kenneth Soala Tupua e avea ma fa’atonusili o le Matagaluega o Paka ma Malaetaalo. I se vaega o lana tusi, i ta’ita’i o le Fono Faitulafono, sa taua ai e Lolo e faapea, o Tupua ua silia i le 30 tausaga o lona tomai masani i galuega tau pulega i totonu o Fuavaalele a le Iunaite Setete (US Air Force), o galeuga tua, atoa ai foi ma le Malo o Amerika Samoa.

E 20 tausaga na ia tautua ai i le Air Force ma sa ia tu’ua le vaega ‘au i le 1984. O lona tomai i galuega tua e aofia ai le tauavega o tulaga ta’ita’i mo le latalata i le 10 tausaga i le Samoa Packing.

O le tausaga e 2005 na amata galuega ai Tupua i le vaega o Paka ma Malaetaalo ma sa avea o ia ma sui faatonu lagolago o lea matagaluega talu mai le tausaga 2013.

Taua e Lolo i lana tusi e faapea, o le tele o tomai masani a Tupua ma lona avea ai ma faatonusili lagolago o le matagaluega, ua iloga ai lona agava’a e tauave le tulafono o le fa’atonusili.

O lo’o iloga fo’i le tautua a Tupua i le tulaga o ta’aloga i totonu o le atunu’u, e pei ona avea ai o ia ma failautusi aoao o le American Samoa National Olympic Committee (ASNOC) mai le 1993 i le 2009 ma sa avea foi ma peresitene o le ASNOC.

I le tofiga a le kovana mo le fa’atonusili o le DHSS, o lo’o taua ai e Lolo ia lana tusi ia Ianuari 4, 2018 le tofia o Muavaefa’atasi John Edward Suisala, lea o lo’o avea nei ma sui fa’atonu lagolago.

I se vaega o lana tusi, o lo’o taua ai e Lolo e faapea, o Muavaefa’atasi ua silia i le 20 tausaga o lona tomai masani i galuega tua atoa ai ma galuega a le malo. Ma sa maua lona tikeri o Pulega o Fa’amasinoga i le 1983 ma amata galue ai loa mo le malo o Amerika Samoa seia o o i le 1989.

Na toe fo’i mai Muavaefa’atasi ma galue i le malo o Amerika Samoa i le tausaga e 1994 e avea ma fa’atonu o le Ofisa o Tagata Matutua (Agency on Aging). Mo galuega tua, o le tomai o Muavaefa’atasi e aofia ai lona avea ma peresitene ma le pule sili o le Polynesia Shipping Service mo tausaga e iva.

Na galuega o ia i le DHSS mo le 14 tausaga ma na amata avea ma faatonu lagolago o le matagaluega i le tausaga e 2009.

E pei ona taua i tusitusiga ua tuuina atu i le Fono Faitulafono sa galuega foi Muavaefa’atasi i le Ofisa o Faleomavaega Eni i le vaitaimi o avea Faleomavaega ma faipule o Amerika Samoa i le Konekeresi.

O tofiga nei e lua ia Tupua ma Muavaefa’atasi a le kovana sa fa’auluina i le vaiaso lenei i le Fono faitulafono. Ma o le taeao nei e fa’atautaia ai iloiloga mo le fa’amoniga o ia tofiga i luma o le Maota Maualuga ma e amata i le itula e 9a.m.

I le Maota o Sui, o iloiloga mo Muavaefa’atasi e faia i le taeao nei ae mo Tupua ua fa’atulaga i le aso taeao (aso Faraile.)