Ads by Google Ads by Google

ToeMaryChristmas Mariner


O le tatou Pepe o le Kerisimasi 2017 o le tama'ita'i mai Malaeloa, Ekalesia Katoliko Roma - ToeMaryChristmas Mariner. Manuia le Kerisimasi! [ata: Leua Aiono Frost]
Tasi le pepe na soifua mai i le Kerisimasi 2017

I lenei Kerisimasi e na'o le to'atasi lava le pepe ua fanau mai i le aso Kerisimasi, o le tama'ita'i lea o ToeMaryChristmas Mariner mai le afio'aga o Malaeloa.

O le tina o le pepe o Telesia Joyce Iole Mariner, sa ia fa'ailoa mai, "O a'u ou te le'i manatu lava o le a ou fanau i le aso Kerisimasi. Sa amata mai le aso e le'i tiga lava lo'u manava, peita'i ina ua o'o i le afiafi ua amata tiga soso'o ma ua manatu loa e o mai i le falema'i. Na taunu'u ma'ua e tusa o le itula e 8:00 i le afiafi i le falemai ae fa'ato'a fanau mai pepe i le 10:00 ae toeitiiti uma itula o le aso Kerisimasi."

Peita'i sa ia fa'ailoa mai, "E ese fo'i lagona ina ua usu mai le pese o le Kerisimasi ia te'i ma'ua ma si a'u tama, ua lagona le fiafia ma ua fa'atumulia le loto i le fa'afetai i le Atua ua ou maua lea avanoa, e fanaua ai se meaalofa sili mo ma'ua ma le tama o le aiga. Ua fai si leva ma'ua moomo'o mo se pepe teine, o lea ua tali fa'aaliali fo'i le Atua ua maua tonu lava i le Kerisimasi le ma'ua meaalofa taua."

E to'alua tuagane matutua o ToeMaryChristmas Mariner, ma ua fa'afiafiaina fo'i Auntie Mary Felise aua o lona igoa lea ua fa'asoso'o i le igoa o le pepe o le Kerisimasi 2017.

O lo'o fa'amautu nei le aiga o Telesia ma Geoffrey Mariner i Malaeloa lea o lo'o ua tatali mai ai matua o Telesia, Sogialofa ma Tina Lene Iole e fa'afeiloa'ia lea latou pepe o le Kerisimasi 2017.

O lo'o galulue i latou i le Ekalesia Katoliko i Malaeloa fa'atasi ai fo'i ma matua ma le aiga atoa o Telesia Iole Mariner. O le aiga lenei, e nofo lelei Telesia e va'ai ma tausia lelei le fanau, a'o le tama ole aiga Geoffrey Mariner e faigaluega o ia i le ASCO Motors i Tafuna.

Manuia le Kerisimasi ma le Tausaga fou i le auaiga Mariners ma Iole i Malaeloa.