O le masina o Mati o le tausaga nei lea ua fa’amoemoe le Ofisa o Fa’atoaga a Amerika Samoa, e tatau ona o o atu i ai ua fa’ataga le toe auina mai o le taro mai Samoa. I se iloiloga sa faia i luma o le Komiti o Fa’atoaga a le maota o sui i le vaiaso na te’a nei, na fa’amaonia ai e le Faatonusili o Faatoaga ia Filifaatali Michael Fuiava lea tulaga.

Na taua e Filifaatali e fa’apea, o le mataupu e fa’atatau i le taro mai Samoa, o se tasi lea o mataupu sa talanoaina i le Fono a Samoa e Lua na usuia i Samoa i le faaiuga o le tausaga na te’a nei.

I lea fonotaga e pei ona saunoa Filifaatali, na mafai ai ona faamaonia le mae’a ona faia o suesuega i le ituaiga fa’ama’i na a’afia ai le taro i Samoa. O faaiuga o ia suega sa auina atu i le Fale Suesue i Hawaii, ua mae’a ona tauaao e le Ofisa o Fa’atoaga a Amerika Samoa, ma ua mae’a fo’i ona latou fa’amaonia le faaiuga o le suega sa tuuina mai.

Saunoa Filifaatali e fa’apea, ua mae’a ona faia feutanaiga ma le Ofisa o Fa’atoaga a Samoa e uiga i lenei mataupu, ma ua mae’a fo’i ona faailoa atu i ai le faaiuga ua faia e toe talia ai le auina mai o le taro mai Samoa i Amerika Samoa nei.

Na taua e ni isi o afioga i Faipule e fa’apea, na avea le faaiuga e taofia ai le toe auina mai o le taro mai Samoa ma itu ua iloa ai, e matua tele naua le taro o lo o toto e le aufai fa’atoaga a le atunu’u i le taimi nei.

Na faafetaia e afioga i Fetaipule le faaiuga ua faia ina ia toe tatala ai le auina mai o le taro mai Samoa. Saunoa le afioga a Toeaina Faufano Autele e fa’apea, e ui e leai ni ona aiga i Samoa, ae taua tele le fesoasoani atu o Amerika Samoa i nai tagata fai fa’atoaga mai Samoa o lo o tau saili ni avanoa e la’u mai ai a latou fua o fa’atoaga e fa’atau i le teritori.

O le taua o lea faiga e pei ona saunoa Toeaina, o le a mafai ai ona maua le avanoa e fa’aauau ai fefaatauaiga i le va o Samoa e lua, e le gata i oloa tau fa’atoaga ae faapena fo’i i tulaga o isi ituaiga oloa o lo o mafai ona gaosia i totonu lava o Samoa e lua.

I le talanoaina ai o le mataupu i le atina’e o le taro, na fesiligia ai e Toeaina le tulaga o le taro i Manu’a, ma le fa’amoemoe ina ia fa’aleleia faatoaga taro i Manua ma mafai ai ona la’u mai e fa’atau i Tutuila nei.

Saunoa Filifaatali e fa’apea, e le o toe umi se taimi ae tulaga lelei loa le fa’atoaga taro i Manu’a, ona fuafua ai loa lea mo le la’uina mai i le atunu’u.

Na faamanino atili e Fuiava e fa’apea, o lo o tulaga lelei pea lava le taro i Amerika Samoa nei, e aofia ai Tutuila ma Manu’a, ma ua fautuaina e le Ofisa o Fa’atoaga le aufai fa’atoaga i le atunu’u, ina ia fa’amalolosi i le totoina o le taro mo le fofoga taumafa.

O atugaluga e pei ona taua e ni isi o Faipule, ia avea faafitauli faapenei e fai ma auala e unaia ai le aufai faatoaga e toto le taro e tua i ai le atunu’u aemaise ai le fofoga taumafa a le fanau aoga, i lalo o le polokalamea le School Lunch.

O le siama lea na aafia ai le taro i Samoa i le tausaga na te’a nei, e le tutusa ma le ituaiga fa’ama’i o le Lega lea na aafia ai le taro i Samoa i se taimi o le 1990, lea ua oo mai ai lava i le taimi nei e le o toe vaaia le taro Samoa moni sa tua i ai le atunu’u i tulaga o taumafa.