Na fulisia finagalo o afioga i Senatoa i le taeao o le aso Tofi ina ua mae’a se iloiloga sa faatautaia e le Komiti o Tulafono a le Maota, o le a le vave faia sa latou faaiuga i le pili lea ua pasia e afioga i Faipule e faaopoopo ai se isi nofoa mo le itumalo o Tualauta i le Maota o Sui.

O le pili e pei ona talanoaina e le Senate, na faaulufale e le afioga i le Tama’ita’i Faipule mai le itumalo o Tualauta, Vui Florence Saulo.

O le afioga a Tapaau Dr. Dan Aga, o le Faatonusili lea o le Ofisa e Gafa ma le Suesueina o Tulaga o le Va i Fafo o le faigamalo a Amerika Samoa, na molimau i le iloiloga.

Na faamanino e Tapaau i luma o le Komiti le tele o tulaga e ao ona taula’i i ai la latou silasila, a o le i faia se faaiuga mautu e faatatau i lenei tulafono. Sa ia taua fo’i e fa’apea, e taua tele le tulafono e pei ona pasia e Faipule, pe a fuafua i le tulaga to’atele ua i ai le faitau aofa’i o tagata o le itumalo i Tualauta.

O ni isi o tulaga na faamanino e Tapaau na aga’i i ai suesuega a lona Ofisa e uiga i lenei tulafono, pe i ai se feteenaiga ma Tulafono ma le Faavae o Amerika Samoa, faapea ai ma Tulafono ma Faavae o le Iunaite Setete o lo o lima ta’ita’iina ai galuega fa’atino a Amerika Samoa. Sa ia taua e fa’apea, e leai se tulaga e feteena’i ai lenei tulafono ma vaega e pei ona ia taua, sei vagana ai ni nai vaega laiti e ao ona toe silasila toto’a i ai.

O isi tulaga na aofia i le folasaga a Tapaau, poo suiga ua fuafua e faia e aafia ai le tulaga o le paketi a le Fono Faitulafono, atoa ai ma le soifua manuia o tagata o le atunu’u i le lumana’i.

Na faamanino atili fo’i e Tapaau e faapea, i lalo o le Fa’avae o Amerika Samoa, o lo o taua ai le tatau lea ona ta’i 5 tausaga ma toe fa’atulaga le aofa’i o faipule i le Fono Faitulafono. E ui e le i faia lava le tulaga, ae o se tulaga taua le tatau loa ona fuafua lea vaega o le Fa’avae, ina ia mafai ai loa ona fa’atulaga le aofa’i o sui e tatau ona i ai i le maota o sui.

Na fesili le Ta’ita’i Komiti, afioga i le Sui Peresetene ia Nuanuaolefeagaiga S. Nua, pe talafeagai le talanoaina na o suiga mo le itumalo e tasi, pe tatau fo’i ona aofia ai ma isi uma itumalo, ae na saunoa Tapaau e fa’apea, o se fesili e faigata tele ona ia taliina lea fesili.

Sa ia toe faatepa le Komiti i le Fono o le Faavae sa usuia i le 2010, lea na talanoaina ai ni isi o suiga mo Senatoa ma Faipule. I lea suiga, toeititi lava oo i le 50 le aofa’i o le Fono Faitulafono, ma o se tulaga e matua maoa’e lea numera.

Saunoa le afioga i le ali’i Senatoa mai Tualauta ia Magalei Logovi’i e fa’apea, afai e le faia se faiga ina ia faatapula’a ai le aofa’i o sui o le maota o sui, lona uiga e sui lava le aofa’i o faipule i tausaga ta’itasi.

I lana fautuaga, ua tatau ona faamalosia le fautauga a le Faavae, e faatulaga ai ma faatapula’a le aofa’i o faipule i le maota o sui, e aofia ai ma le faatulaga pe to’afia le aofa’i o tagata e sui e le faipule e to’atasi.

Saunoa atili Magalei e faapea, e mananao uma lava itumalo e faaopoopo a latou sui i le maota o sui, ae afai e le faatapulaaina le aofai o sui mo itumalo taitasi e tatau ona i ai, e ono avea ma faafitauli lenei mataupu i le lumana’i.

Sa fesiligia fo’i le tulaga o le maota maualuga, pe tatau ona aofia ai i le faatulagaina o ona sui e tatau ona i ai, peita’i na saunoa Nua, e le tatau ona aofia ai ma le Senate, ona o afioga i Senatoa o lo o filifilia mai e itumalo taitasi, ae o faipule o lo o palotaina e le atunu’u.