Ua toe taofia nei i le toese i Tafuna se ali’i faipisinisi mai Initia, ina ua maua e le Fa’amasinoga Maualuga tulaga fa’aletonu i le ta’avale na fa’aaoga e tatala ai o ia i tua, ina ua fa’atoa tula’i i luma o le fa’amasinoga i ni nai masina ua mamao atu.

Talu ai tulaga fa’aletonu i le ta’avale sa fa’aaoga e tatala ai le ali’i o Mukesh Ghand, ua poloaina ai loa e le fa’amasinoga le toe mana’omia o se isi ta’avale e tatala ai le ua molia i tua, se’i vagana ai le tinoitupe.

O fa’amatalaga e pei ona maua e le fa’amasinoga na mafua ai ona valaau le iloiloga, o le ta’avale lea na fa’aaoga e tatala ai i tua le ali’i Brian Loma, lea ua solofua e le fa’amasinoga lana mataupu o le umia fa’asolitulafono o fualaau fa’asaina, o le ta’avale lava fo’i lea e tasi na fa’aaoga e tatala ai i tua Chand.

O le aso Lulu i le vaiaso lenei na faia ai se iloiloga faapitoa o le mataupu a Chand i luma o le fa’amasinoga, e iloilo ai pe agava’a ona ta’usala o ia i lona le usitaia o poloaiga a le fa’amasinoga sa tu’uina atu.

Na taua e Chand i luma o le fa’amasinoga ina ua mae’a ona fa’atauto o ia, le faigata lea ona ia malamalama i pepa na alu atu le ali’i loia ia Mark Ude e fa’asaini ai o ia, a o taofia o ia i le falepuipui ona o le mataupu e pei ona tu’uaia ai o ia.

Na fesili le afioga i le ali’i fa’amasino sili ia Michael Kruse ia Chand, pe sa ia iloa, o lana ta’avale lea na fa’aaoga e tatala ai i tua Loma, lea fo’i na fa’aaoga e tatala ai o ia i tua, ae na tali le ua molia na te le iloa, na pau lava le tulaga sa ia malamalama i ai, o le taimi na nanati atu ai Ude ma fai atu ia te ia e saini le pepa e tatala mai ai i tua ia Loma.

Sa ia taua atili e fa’apea, a o taofia o ia i le falepuipui, na alu atu Ude ma fa’ailoa atu ia te ia, ua le toe avea o ia ma ana loia, ae mana’omia lona sainia o le pepa e fa’aaoga ai le ta’avale e tatala mai ai se isi tagata i tua.

Na faailoa e Chand i le fa’amasinoga, o lona afafine na tuuina le pepa faamaonia o le ta’avale ia Ude, ae le o ia, ona o le taimi lea o loo taofia o ia i le falepuipui, e faigata fo’i ona ia iloa poo fea le ta’avale lea ua ave e tatala mai ai le tagata o loo mana’o i ai Ude.

Na faailoa e Kruse ia Chand le fiailoa e le fa’amasinoga, pe fai se la pisinisi ma Ude, e ala i le fa’aaogaina o ta’avale e tatala mai ai i tua tagata solitulafono, ae na tali Chand e leai se la pisinisi ma Ude o faia, na te le iloaina fo’i poo ai Loma lea na fa’aaoga e Ude lana ta’avale e tatala mai ai i tua.

Na umi se taimi o nofo le ali’i fa’amasino ma tau to manatu, ma i’u i lona tu’uina mai ai loa le poloaiga faapitoa e fa’aleaoga ai le ta’avale na tatala ai Chand i tua, ae taofia loa o ia i le falepuipui, se’i vagana ua totogi le tinoitupe e $20,000 lea na fa’atulaga e le fa’amasinoga e totogi ona fa’atoa mafai lea ona tatala o ia i tua.

Na liliu atu Kruse i le loia al e malo ia Woodrow Pengelly ma faailoa i ai e fa’apea, o le tiute lea a le malo e tatau ona fai, o le iloilo lelei taavale o lo o avatu e tagata molia ma o latou aiga e tatala ai i latou i tua, aua o ni isi o taimi e le o iloa poo sa’o pepa fa’amaumauga o loo tu’u atu e tagata molia.

Saunoa atili fo’i Kruse e fa’apea, afai o le tulaga lea o le a alia’e mai i tulaga o tupe ma meatotino e tatala ai tagata molia i tua, e ono faia e le fa’amasinoga se gaioiga e ono fa’a faigata ai ona toe maua le avanoa e tatala ai tagata molia i tua, pe afai e tuuina mai se faaiuga e mana’omia ai na o le tinoitupe, ae le toe manaomia ni meatotino e pei o ta’avale.

O Chand o loo tu’uaia e le malo i moliaga mamafa e tolu e aofia ai le faia o uiga faasotoma, faia o gaioiga faafeusuaiga mataga i se teineititi e laititi i lalo o le tulafono, atoa ai ma lona tagofia o itutinosa o se teineititi e le fa’aipoipo i ai.

O tu’uaiga fa’asaga ia Chand na tofu atu i le Ofisa o Leoleo i le masina o Aperila o le tausaga nei, ina ua faila e se Tama se tagi fa’asaga i le ua molia, i lona faia lea o uiga mataga i lona afafine e 17 tausaga le matua.

O le fa’alavelave e pei ona taua i le tagi a le malo na tula’i mai i totonu o le fale o Chand i Iliili, i le taimi sa i ai le tama’ita’i na a’afia, e fesoasoani i lona afafine i le kukaina o taumafa mo Tagata Matutua.

O se taimi o le vaveao e pei ona taua e le tama’ita’i na a’afia ao moe i totonu o le potu malolo, na alu atu ai le ua molia ma fai uiga mataga ia te ia, e aofia ai le tagofia o ona itutinosa.

O lo o taofia pea Chand i le toese i Tafuna i le taimi e fa’atali ai se isi poloaiga mai le fa’amasinoga.