Toe pau i lalo le totogi o uta mo le itumalo o le Manu’atele


[ata: NPAS]
ausage@samoanews.com

O le vaiaso nei lea ua fa’alauiloa mai ai e le Ofisa o Uafu ma Malaeva’alele se tala fiafia mo le mamalu o le itumalo o le Manu’atele, i le toe pau lea i lalo o le totogi o uta e la’u mo le itumalo.

 

I le silia ai i le 3 masina o finau pea Faipule ma Senatoa o le Itumalo ina ia toe tu’u i lalo totogi o uta mo Manu’a, o le taeao ananafi na fa’amaonia mai ai e le Fa’atonusili, afioga Taimalelagi Dr. Claire Poumele le talia aloaia o le talosaga ina ia toe tu’u i lalo le totogi o uta.

 

O suiga ua faia mo totogi o uta mo Manu’a, e $2 le tau o soo se afifi lava e fia ave i Manu’a, ae ua aveese le $8 lea sa fa’atulaga e totogi mo le fa’aaogaina o le uafu (terminal fee).

 

O le taimi o le iloiloga a le Komiti o Pulega o Taulaga ma Malaevaalele a le maota o sui i le taeao ananafi, mo le talanoaina o le mataupu e fa’atatau i meatotino a le malo sa fa’atau ese atu i Samoa, e aofia ai Va’a Tosova’a e 2 ma Lagisi e 2, na maua ai le avanoa o le Sui Fofoga Fetalai na te fesiligia ai le Fa’atonusili e tusa ai o totogi o uta i Manu’a.

 

Saunoa Taimalelagi e fa’apea, e le o se fa’aiuga faigofie lea ua faia e toe sui ai totogi o uta mo le itumalo. Sa ia taua le mae’a lea ona aumaia o se fautauga mai le Kovana, atoa ai ma lona iloilo toto’a o se tusi sa tuuina atu e le Sui Fofoga Fetalai e talosagaina ai le tu’u i lalo o totogi o uta mo Manu’a.

 

Saunoa Taimalelagi e fa’apea, o isi uma tau mo uta eseese sa fuafuaina mo Manu’a, ua mae’a ona toe fetu’una’i. O le itu sa mafuli i ai le silasila a le Matagaluega, o le totogi o uta ta’itasi o lo o malaga atu ma le mamalu o le itumalo o Manu’a, ona ua fa’aalia e le to’atele le maualuga tele o le totogi e $8 sa i ai.

 

Na fa’amanino atili fo’i e le Tama’ita’i Fa’atonusili e fa’apea, o le aso Faraile nei lea ua fa’atulaga e faia ai se fonotaga fa’alaua’itele a le Matagaluega ma tagata Manu’a e fa’atatau i totogi o uta e la’u i le itumalo, mo le fa’amautuina o le tau sa’o e tatau ona i ai le totogi o uta e la’u i le itumalo.

 

Saunoa Fetui Fetu Jr e fa’apea, o le tusi sa tuuina atu, e le o se tusi mai ia te ia poo se tusi mai sui faipule o Manu’a, ae o le tusi sa fa’aalia ai finagalo atoa o le maota.

 

Talu lava ona fa’amamalu e le Matagaluega totogi fou mo uta i Manu’a, e le i malolo lava Faipule o le itumalo i lo latou finauina lea o lenei mataupu, atoa ai ma le taumafai e saili se auala e tu’u ai i lalo totogi o uta.

 

Saunoa le isi faipule mai Manu’a, afioga Vesi Talalelei Fautanu Jr e fa’apea, e le taitai gafatia e le tagata o le itumalo ona fa’afetai le maualuluga o totogi ua fa’atulaga atu e le Matagaluega. E le gata i lea, e le talafeagai le $8 lea na totogi mo soo se uta e la’u i Manu’a, ona tusa lava pe laititi le afifi e fia momoli i aiga i Manu’a, pe tele fo’i, e tasi lava le $8 sa totogi e tagata.

 

Na taua e Fetui e fa’apea, o le agaga o le tusi sa tuuina atu e talosagaina ai le taofia o siitaga i totogi o uta mo Manu’a, e le o se agaga ina ia taofi e taua le toe faia, ae tatau ona fa’asa’o muamua le auala na mafua ai ona faia.

 

E talitonu Fetui, e i ai iloiloga fa’alaua’itele e tatau ona faia e le Matagaluega ma tagatanu’u o le Itumalo, ina ia malamalama ma silafia ai suiga uma o le a faia.

 

Saunoa Taimalelagi e fa’apea, o lo o fa’atali pea se fautuaga mai le Loia e tusa ai o le talosaga sa tuuina atu i le tusi. Na aofia fo’i i le saunoaga a Taimalelagi le taua tele o le fautuaga, i le tatau lea ona soalaupule muamua le Matagaluega ma le itumalo mo le talanoaina o siitaga i totogi o uta mo Manu’a.

Comment Here