Toe molia fo’i le isi pagota i le sola i tua mai le toese


[ata: archive]
ausage@samoanews.com

O le vaiaso nei lea fa’atoa faila ai e le malo le moliaga mamafa o le sola i tua mai le toese i Tafuna, fa’asaga i le ali’i pagota o Joeita Fa’aaliga lea o lo o taofia i le falepuipui i le taimi nei, e mafua mai i le fa’alavelave lea na ia sola ai i tua mai le falepuipui i le masina o Aperila 2016.

 

E pei ona taua i fa’amaumauga a le fa’amasinoga e fa’apea, e le gata na sola i tua le ua molia, ae sa ia fa’atinoina ai fo’i isi solitulafono e pei o le gaoi, ina ua ia osofaia se faleoloa ma gaoia mai ai ni mea aoga, fa’apea ai ma lona gaoia o se ato tupe a se tama’ita’i a o nofo i totonu o lana ta’avale i le vaega e paka ai ta’avale a le Ofisa o Pulega o le Eletise ma le Suavai (ASPA) i Tafuna.

 

A o taofia ai Fa’aaliga i le falepuipui i Tafuna, sa tofia ai o ia e avea o se tasi o pagota fa’atuatuaina (trustee), e fesoasoani i ali’i ma tama’ita’i leoleo o le toese mo le fa’atinoina o a latou tiute.

 

O ni isi o tiute tauave a pagota ua tofia e avea ma trustee e aofia ai le galulue i le ao ma le po i le vaavaaia o le faitoto’a tele o lo o ulufale atu ai tagata i totonu o le lotoa, ma fesoasoani fo’i i isi lava tiute o lo o fa’atino e leoleo i le vaavaaia lea o le saogalemu o le aiga toese.

 

A o avea ai Fa’aaliga ma pagota fa’atuatuaina, sa ia fa’aaogaina ai lea avanoa e sola ese ai i tua mai le falepuipui i se taimi o le po i le masina o Aperila 2016, ma ia aga’i atu ai i tua e fa’atino ni isi o solitulafono.

 

O le solaaga muamua a Fa’aaliga i tua na ia osofaia ai se ta’avale sa paka i le vaega e paka ai ta’avale a le ASPA i Tafuna, ma ia gaoia ai se ato tupe a se tama’ita’i sa nofonofo i totonu o lana ta’avale, ae o lana solaaga lona lua na ia osofaia ai se faleoloa i Tafuna lava ma gaoia ai ni oloa mai totonu. E lua moliaga o le sola i tua mai le toese i Tafuna ua tu’uaia ai e le malo ia Fa’aaliga.

 

O le moliaga o le sola ese mai le toese ao taofia ai o ia, o se solitulafono D i le fa’atulagaina o solitulafono mamafa, lea e mafai ona fa’asala ai o ia i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000.

 

O le taeao ananafi lea na fa’amoemoe e faia ai le ulua’i iloiloga o le mataupu a Fa’aaliga, ae i le mae’a ai ona talanoa o le ua molia ma lana loia, na ia manatu ai loa e fa’aagafua lona aia e fa’ataunu’u ai lana ulua’i iloiloga, ae tu’u sa’o atu loa lana mataupu i luma o le fa’amasinoga maualuga e fa’ataunu’u ai lana fa’amasinoga autu, poo le faia o se maliliega ma le malo e fa’amuta aloaia ai loa taualumaga o lana mataupu.

 

E pei ona taua i fa’amaumauga a le fa’amasinoga, e le fou le ali’i o Fa’aaliga i fa’amaumauga a le fa’amasinoga, ae na ta’usalaina fo’i o ia e le fa’amasinoga maualuga i moliaga mamafa e lua o le talepe fale i le tulaga muamua faapea ai ma le talepe fale i le tulaga lua, e mafua mai i le fa’alavelave lea na ia osofaia ai se faleoloa i Pava’ia’i i le 2013, ma ia gaoia ai le tele o oloa fa’apea ai ma se tinoitupe e tusa ma le $3,000.

 

O le masina o Novema 2013 na fa’asala ai loa e le fa’amasinoga ia Fa’aaliga, ma poloaina ai le taofia o ia i le toese i Tafuna mo le umi e 40 masina, o se tasi lea o tuutuuga o lana nofovaavaaia e 10 tausaga, a mae’a ona tuli lana fa’asalaga fa’a falepuipui, ona ia tuua lea o le atunu’u ae toe fo’i atu i Samoa ma aumau ai mo le umi e 10 tausaga. Na poloaina fo’i o ia na te totogiina le salatupe e $5,000.

 

O le itula e 9:00 i le taeao nei lea ua fa’amoemoe e tula’i ai Fa’aaliga i luma o le fa’amasinoga maualuga.

Comment Here