O le ali’i lea na ta’usala e le Fa’amasinoga Maualuga i le tausaga e 2011 i lona faia o uiga mataga i se teineititi e 10 tausaga le matua, ua toe molia nei fo’i o ia e le malo i lona toe faia o isi fo’i uiga mataga i le isi fo’i teineititi e 10 tausaga le matua i le vaiaso na te’a nei.

O Iakimo Felise, 55 tausaga le matua mai le afioaga o Leloaloa na pu’e fa’apagota mai e Leoleo i Nu’uuli i le aso Lua o le vaiaso na te’a nei, ona o tu’uaiga i lona faia o uiga mataga i se teineititi i le taimi o le tuua o aoga.

(E fia faailoa atu e le Samoa News, o lo o taua i fa’amaumauga a le Fa’amasinoga, o Felise e sau mai le afioaga o Leloaloa).

O le taeao o le aso Tofi o le vaiaso na te’a nei na tula’i ai Felise i luma o le Fa’amasinoga Fa’aitumalo, ma fa’atulaga ai loa e le afioga i le ali’i Fa’amasino ia Fiti Sunia le taofia o ia i le toese i Tafuna e aunoa ma se tupe e tatala ai, e mafua mai i le matuia o le gaioiga ua tu’uaia o ia sa ia faia.

O le aso Faraile na te’a nei na fa’atulaga e faia ai le ulua’i iloiloga a Felise, peita’i ua manatu o ia e fa’aagafua lea ulua’i iloiloga, ae tu’u sa’o atu loa lana mataupu e fa’ataunu’u sona iloiloga i luma fa’amasinoga maualuga.

O le itula e 9:00 i le taeao nei lea ua fa’atulaga e tula’i ai Felise i luma o le Fa’amasinoga Maualuga, ma fa’aauau ai lava lana mataupu seia oo i le aso e faia ai lona fa’amasinoga autu, poo le faia fo’i o se maliliega ma le malo e fa’ai’u ai lana mataupu.

E 10 moliaga mamafa ua molia ai e le malo ia Felise. O ia moliaga mamafa e aofia ai moliaga e 3 o le faia o amioga mataga i fanau e i lalo o le 12 tausaga le matutua; 1 le moliaga o le fai’aiga fa’amalosi; 2 moliaga o le faia o uiga mataga fa’asotoma, ma moliaga e 4 o le tagofia o itutinosa o se teineititi e laititi i lalo o le tulafono.

O le mataupu lenei na mafai ona tofu atu i le Ofisa o Leoleo, ona o se galuega lelei sa faia e ni tama’ita’i se to’alua sa la vaaia le teineititi na a’afia o loo tamo’e mai i se auala e aga’i i luga o se mauga i Nu’uuli, ma lona tino e palapala uma. E lei umi ae toe vaaia e tama’ita’i lava nei se tamaloa matua o lo o tamo’e mai ai i tua, e palapala uma fo’i lona tino.

O lagona masalosalo na tutupu a’e ai loto o tama’ita’i nei na mafua ai loa ona la fa’atuina se ta’avale Leoleo na ui ane i luga o le auala i le taimi lea, ma la fa’asino loa i ai le teineititi ma lona tino palapala o lo o savali atu i luga o le auala, ina ia siaki ma fesiligia o ia i le mafua’aga o le palapala o lona tino.

E le i fa’atuai Leoleo e to’alua sa i totonu o le ta’avale, ae ua fa’anatinati atu loa ma taofi le teineititi ae tu’u i totonu o le ta’avale. Ina ua fesiligia e Leoleo le teineititi ao i ai i totonu o le ta’avale, sa ia fa’amatala i Leoleo le Tamaloa na faia uiga mataga ia te ia o loo savali mai i luga o le auala.

Na vavave gaioiga a Leoleo ma maua atu ai ia Felise toeititi lava lilo atu lona tino i tua o se tasi o Faleoloa i Nu’uuli, ma taofia mai ai loa o ia ae tu’u i totonu o le Ta’avale Leoleo, ma aga’i atu ai loa i le Ofisa o Leoleo i Tafuna mo suesuega.

E eseese potu na fa’atalatalanoa ai e Leoleo ia Felise ma le teineititi na a’afia. Na taua e le teineititi i Leoleo e fa’apea, e fa’alima ona ave e Felise o ia i luga o le mauga ma fa’amalosi ai. O taimi uma e 5 sa fa’amalosi ai e  Felise o ia, na te tuuina atu ai se tupe ia te ie e fa’atau ai lana meaai i le aoga. O le aofa’i atoa o le tupe na avatu e Felise ia te ia e $100.70

Na taua atili e le teineititi i Leoleo e fa’apea, o taimi e tuua ai le aoga i le aoauli e alu atu ai Felise ma ave o ia i luga o le mauga ae fa’atino ai gaioiga mataga e pei ona ia fa’amatalaina. Ae i le aso Lulu na te’a nei, sa toe alu atu ai fo’i o ia ma ave o ia i luga o le mauga ma toe fa’amalosi ai.

Ina ua fesiligia e Leoleo ia Felise, sa ia ioeina ai fa’amatalaga uma a le teineititi e fa’atatau i le fa’alavelave sa tula’i mai.

Na taua e Felise i Leoleo e fa’apea, e fa’atolu ona ia faia uiga mataga i le teineititi i le masina o Mati ae fa’alua i le masina o Aperila. Sa ia ta’utino i Leoleo e faapea, o le taimi lava la te taunu’u ai i luga o le mauga, na te fa’amalosia ai loa le teineititi, a mae’a, ona ia ave lea i ai o tupe mo ia.

Na taua i fa’amaumauga a Leoleo ma malosi o le manogi pia i le tino o Felise i le taimi na fesiligia ai o ia e uiga i lenei mataupu.

O le to’atele latou te silafia Felise ona o lana ta’aloga “Ponesi” o lo o fa’atau solo i le maketi i Fagatogo.

O le tausaga e 2011 na ta’usala ai Felise i lona faia o uiga mataga i se teineititi e 10 tausaga le matua, ina ua ia toso le teineititi i tua o le Fale Talimalo a le aiga ma taumafai e fa’amalosi ina ia fa’amalie ai ona lagona tu’inanau, ae na taofi lana gaioiga ina ua valaau atu i ai se tagata o le aiga.