Ads by Google Ads by Google

Toe maua pagota na sosola i tua mai le toese i Tafuna


[ata: foa'i]
ausage@samoanews.com

Ua faamaonia mai e le Komesina o Leoleo le toe maua o al’i pagota e to’alua na sosola ese mai i le toese i Tafuna i le 2 vaiaso talu ai, ma ua toe taofia nei i laua i se nofoaga faapitoa ina ia taofia ai le toe sosola ese mai le falepuipiu.

 

I se fa’atalatalanoaga ma le afioga i le ali’i Komesina ia Le’i Sonny Thompson, sa ia faamaonia mai ai i le Samoa News lenei mataupu.

 

O le faaiuga o le vaiaso na te’a nei na toe maua ai e Leoleo ia Joe Togitogi ma Iosefa Iakopo, talu mai le taimi na la sosola ese mai ai i le toese. Saunoa Le’i e fa’apea, sa galulue malosi ali’i ma tama’ita’i Leoleo i le tau sailia o i laua na sosola i tua, ina ia mautinoa e vave maua ma toe auina atu i totonu o le toese.

 

Talu ai le le malupuipuia o le vaega o le falepuipui fou na taofia muamua ai i laua na sosola i tua, ua faia ai loa le faaiuga ina ia sui se isi nofoaga e loka ai i laua, atoa ai ma le tofia lea o ni Leoleo e tiute ai i le ao ma le po. Na faafetaia e Le’i le lagolago a le atunu’u i le tau sailia o Togitogi ma Iakopo.

 

O le masina o Ianuari na te’a nei na alu ai le ulua’i solaaga a pagota e to’afa, lea fo’i na aofia ai Togitogi ma Iakopo. O isi pagota na aofia ai i le solaaga muamua e aofia ai Timata Naea ma Ryan Pite. E lei atoa se vaiaso na sosola ai i latou i tua ae maua. O le masina lenei i le 2 vaiaso talu ai na alu ai le solaga lona lua, lea na aofia ai na o Togitogi ma Iakopo.

 

O le vaiaso nei na faila ai e le malo moliaga mamafa o le sola ese mai le toese faasaga i le ali’i pagota ia Naea, ma le fa’amoemoe o se taimi o le vaiaso fou e faila ai moliaga fa’asaga i isi pagota sa auai i le solaaga.

 

O le taeao ananafi na tula’i ai Naea i luma o le fa’amasinoga faaitumalo, ma faatulaga ai loa lana ulua’i iloiloga e faia lea i le vaiaso fou.

 

O le masina o Novema o le tausaga na te’a nei na ulua’i taofia ai e Leoleo ia Naea ona o tu’uaiga i le talepe fale ma le gaoi, e mafua mai i le faalavelave lea na ia osofaia ai se fale o se aiga i Tafuna i le masina o Oketopa ae ave faagaoi le tele o oloa ma meatotino sa i totonu e ova ma le $100 le tau aofa’i pe a fa’atupe.

 

I faamaumauga a le malo o lo o taua ai e fa’apea, i le aso 14 Ianuari o le tausaga ne’i, na sola ese ai Naea mai le toese ao taofia ai o ia e fa’atali ai le aso e faia ai lana fa’amasinoga autu, e mafua mai i tuuaiga o le gaoi ma le talepe fale o lo o tu’uaia ai o ia e le malo.

 

Na ta’utino Naea i Leoleo e fa’apea, o le faaiuga sa faia ina ia sola i tua mai le toese, na mafua mai lea ina ua faaosooso atu ana uo pagota ia te ia, ma ia ioe ai loa e auai i le solaaga. Sa ia teena le manatu na mafua ona latou sosola i tua ona o se taumafaiga ina ia fa’atino ni isi solitulafono mamafa e pei o le talepe fale ma le gaoi.