Toe lelei le masini e pu’e ai ata o ID i le Ofisa o Femalagaaiga

ausage@samoanews.com

O le vaiaso nei lea na toe amata fa’agasolo ai le pu’eina o ata mo ID a tagata mai fafo i le Ofisa o Femalagaaiga i Utulei, ina ua mae’a ona toe fa’aleleia vaega sa faaleagaina o le masini i le fa’aiuga o le vaiaso na te’a nei.

 

Na fa’amaonia mai e se sui Sinia o le Ofisa o Femalagaaiga i le Samoa News, le toe amata pu’e o ID o tagata mai fafo i le aso Gafua o le vaiaso nei, ina ua maea ona vave foia le fa’aletonu sa tula’i mai i le vaiaso na te’a nei.

 

Na asia e le Samoa News le Ofisa o Femalagaaiga a le atunu’u i le amataga o le vaiaso nei, na fa’amaonia ai le fa’agasolo o le galuega mo le pu’eina o ata o ID a tagata mai fafo.

 

E pei ona fa’amaonia mai e le Loia Sili a le malo i se talanoaga ma le Samoa News i le vaiaso na te’a nei e fa’apea, o le tele o galuega poo ata na pu’e i le masini i le aso e tasi, o le mafua’aga lea na mafua ai ona tula’i mai ai se fa’aletonu i le vaiaso na te’a nei.

 

O le masini na fa’aletonu i le taimi tonu lava na tula’i mai ai suiga sa faia i le Ofisa o Femalagaaiga i le 3 vaiaso talu ai, ina ua tasi le aso e pu’e ai ID a tagata mai fafo, e na o le aso Lulu.

 

Na taua e se sui sinia o le Ofisa o Femalagaaiga i le Samoa News e fa’apea, o le suiga lea na mafua ai loa ona tula’i mai le fa’aletonu ma fa’aleagaina ai le masini, ina ua le gafatia e le malosi o le masini ona tauave le galuega i le aso atoa.

 

Ina ua fesiligia le Loia Sili i le vaiaso na te’a nei, poo suiga ua faia e pu’e ai ID o tagata mai fafo i le aso e tasi, o le mafua’aga lea o le fa’aletonu o le masini, na saunoa Talauega Eleasalo Ale e fa’apea, e faigata ona fa’amaonia lea tulaga, pau le itu ua maitauina, e foliga mai ua avea le tele o galuega ua fa’atino e le masini ma auala ua leaga ai.

 

Sa ia taua atili fo’i e fa’apea, o le suiga sa faia ina ia tasi le aso e pue ai ID o tagata mai fafo, o se taumafaiga lava ina ia taofiofi ai tulaga fa’aletonu sa tula’i mai i le tuuina atu o ID i tagata mai Asia, a o fa’agasolo ai su’esu’ega a lona Ofisa e uiga i lenei mataupu.

 

E na o le 2 lava vaiaso na faagasolo ai le suiga fou mo le pu’eina o ID i le aso e tasi, o le aso Lulu lea, ae toe fa’alauiloa e Talauega i le vaiaso na te’a nei le toe fo’i o le auaunaga a le Ofisa i le tulaga masani.

 

“O le suiga lea ua i ai, o le aso Gafua e oo atu i le aso Tofi lea ua fa’atulaga e pu’e ai ata mo le toe fa’afouina o ID, ae o le aso Faraile lea ua fa’atulaga e pu’e ai ata mo ID fou fa’atoa pasia a latou iugafono,” o le saunoaga lea a Talauega.

Comment Here