Toe i’u lava tagata Manu’a i le va’a o le MV Sili


Le taimi na la’u ai le uta a le MV Sili i le aso Lulu na te’a nei mo lana malaga mo Manu’a i le vaiaso nei. [ata AF]
ausage@samoanews.com

Na taua e ni isi o le itumalo o Manu’a o latou lagona su’ifefiloi i le vaiaso nei i le Samoa News, ina ua toe i’u lava le itumalo e fa’aaoga le va’a tuai a le malo mo malaga i Manu’a, e ui o lea ua taunu’u mai le va’a fou sa folafola o le a avea ma fa’aola mo le itumalo.

 

Na taua e se tasi o Tama matua na malaga ai i le va’a a le MV Sili mo Manu’a i le po o le aso Lulu na te’a nei e fa’apea, e tele lava lagona e fia fai e fa’atatau i le mafua’aga ua toe i’u ai le itumalo e fa’aaoga le va’a tuai mo faigamalaga i Manu’a, ae ona o le popole ma le manatu ina nei faitioina ai i latou.

 

“O lea mea moni lava ua ese upu ma tala sa tu’uina mai, ese le tulaga lea ua vaaia i le taimi nei, o folafolaga sa tu’uina mai, o le taimi lava e taunu’u mai ai le va’a fou o le MV Manu’atele, o le taimi fo’i lea e ea ai le pologa o tagata Manu’a sa tauamo mai i le tele o tausaga ua mavae, o le a le toe fa’aaogaina fo’i le MV Sili, peita’i o le tu ai o le va’a fou e aunoa ma se fa’amatalaga sa’o e tu’uina mai i le mafu’aaga ua le fealua’i ai, ua atagia ai le maoaluma o lagona o tagata, ma ua moni ai le upu a le atunu’u, ua salu vale lau ta’amu a Aopo”, o le saunoaga lea a se tasi o Tama matua e le’i finagalo e fa’ailoa lona suafa.

 

E to’alua isi Tina matutua na la taua i le Samoa News e fa’apea, e oo mai lava i le taimi nei o loo tu’u fesili pea le itumalo i le mafua’aga ua le faia ai se malaga a le va’a fou mo Manu’a.

 

Na taua e ni tagata faigaluega a le Pulega o Uafu ma Malaeva’alele i le Samoa News e fa’apea, “pau ripoti o loo matou fa’alogo i ai, o loo i ai vaega o le va’a o loo fa’aletonu, ma o loo fa’atali totoga o loo oka i fafo i le taimi nei”.

 

E lei manuia taumafaiga a le Samoa News mo se fa’amalamalamaga o lenei mataupu, ina ua tu’uina atu ni fesili i le tama’ita’i Fa’atonusili le tumau o le Pulega o Uafu ma Taulaga, le afioga ia Taimalelagi Dr. Claire Poumele, peita’i e tusa ai o ripoti na maua e le Samoa News, na mafua ona le taunu’u le malaga a le MV Manu’atele sa fuafuaina mo le vaiaso na te’a nei i Manu’a, o loo i ai ni isi o vaega o le va’a o loo fa’aletonu, o le mafua’aga lea na taofia ai e le Ofisa o le US Coast Guard le fa’ataunu’uina o le malaga atu i Manu’a.

 

Na taua e le sui o le US Coast Guard ia Joe Twiddy i le Samoa News i le vaiaso nei e fa’apea, o ni isi o vaega o loo fa’aletonu o le va’a e moomia le fa’aleleia, o le suau’u lea e sisina i le vaega e teu ai uta a le va’a, ma masini e tape ai ni afi e alia’e mai i taimi o malaga i totonu o le potu e nonofo ai pasese e le o lelei.

 

I le taimi na taunu’u mai ai le va’a fou lenei a le malo e tusa ma le $13.6 miliona tau, na taua ai e ta’ita’i o le malo e aofia ai le itumalo o Manu’a, le avea o lenei va’a fou o se fa’aola totoga mo tagata uma o Manu’a, talu mai ona pologa le itumalo i tulaga o femalagaaiga mo le silia i le 50 tausaga ua mavae.

 

E le o manino mai lava i le taimi nei se taimi e mafai ai ona foia vaega o loo fa’aletonu o le va’a.

Comment Here